កំពត : បុរសជនជាតិជប៉ុនម្នាក់ ដែលប៉ូលិសអន្តរជាតិ កំពុងស្វែងរកចាប់ខ្លួន ពីបទមនុស្សឃាតសម្លាប់ស្ត្រីជនជាតិន័រវេសឈ្មោះ Nerid Hooiness អាយុ ៣០ ឆ្នាំ នៅក្នុងប្រទេសឡាវ ។ ជននេះ បានរត់គេច មកលាក់ខ្លួននៅប្រទេសកម្ពុជា ហើយត្រូវសមត្ថកិច្ចអន្តោប្រវេសន៍កម្ពុជា ប្រកាសស្វែករកចាប់ខ្លួន ។ នេះបើយោងតាមការចុះផ្សាយរបស់កាសែត dagbladet កាលពីថ្ងៃទី១៥ ខែមេសា ឆ្នាំ២០២០ ។
ប្រភពដដែលបានឲ្យដឹងថា បុរសជនជាតិជប៉ុនឈ្មោះ Hiroyuki “Hiro” Ogu អាយុ ៣៨ ឆ្នាំ ដែលប៉ូលិសអន្តរជាតិកំពុងតាមប្រមាញ់ ពីបទសម្លាប់ស្ត្រីជនជាតិន័រវេសម្នាក់ នៅក្នុងប្រទេសឡាវ ត្រូវបានគេរាយការណ៍ថា បានប្រទះឃើញនៅក្នុងទឹកដីខេត្តកំពត ប្រទេសកម្ពុជា កាលពីថ្ងៃ១៤ មេសា ។
កាសែតអនឡាញ CNE (Cambodia News English) បានរាយការណ៍កាលពីថ្ងៃចន្ទថា មានតម្រុយជាច្រើនទៅលើការលាក់ខ្លួន របស់ជនសង្ស័យ Hiroyuki Ogu នៅប្រទេសកម្ពុជា ។
ពាក់ព័ន្ធនឹងករណីខាងលើនេះ នៅថ្ងៃទី១៧ ខែមេសា ឆ្នាំ២០២០ តាមរយៈទំព័រហ្វេសប៊ុក ផែនការងារអន្តោប្រវេសន៍ខេត្តកំពត បានបង្ហោះសារឲ្យដឹងថា៖ “ប្រសិនបើបងប្អូនបានឃើញជនបរទេសខាងក្រោម សូមរាយការណ៍មកកាន់សមត្ថកិច្ចជាបន្ទាន់ ។ រាយការណ៍តាមរយៈលេខទូរស័ព្ទ 087 289 431 012 289 431, 096 366 5596” ។
ពាក់ព័ន្ធនឹងការចាប់ខ្លួនបុរសជប៉ុនខាងលើនេះ បើតាមកាសែត dagbladet បានបញ្ជាក់ឲ្យដឹងទៀតថា ការស៊ើបអង្កេតបង្ហាញថា Nerid និង “Hiro” បានធ្វើដំណើរពីកោះ Koh Phangan ក្នុងប្រទេសថៃ ទៅប្រទេសឡាវ នាឱកាសចូលឆ្នាំថ្មី ក្នុងខែមករា ឆ្នាំ២០២០។ ប៉ូលិសជឿជាក់ថា Nerid ត្រូវបានវាយ និងច្របាច់ក រហូតដល់ស្លាប់នៅក្នុងបន្ទប់ផ្ទះសំណាក់។
ម្តាយ Ellen Høiness បាននិយាយថា “បន្ទាប់ពីធ្វើបាប Nerid ដោយវាយលើដងខ្លួនជាមួយកំណាត់ឫស្សី បន្ទាប់មកវាបានចងភ្ជាប់កូនស្រីតែមួយគត់របស់ខ្ញុំទៅនឹងម៉ូតូ មុនពេលរត់ចូលព្រៃ ហើយបោះសាកសព Nerid ចោលដូចសំរាមអ៊ីចឹង”។
ស្ត្រីជាម្តាយបានបន្តថា៖ “កូនស្រីរបស់ខ្ញុំ ត្រូវបានរំលោភបំពាន និងសម្លាប់ ។ សាកសពរបស់នាង ត្រូវបានបោះចោលនៅក្នុងព្រៃយ៉ាងអាណោចអាធ័មជាទីបំផុត ។ សាកសពរបស់នាង មានសភាពរលួយទៅហើយ ស្ថិតក្រោមកំដៅថ្ងៃ ៣០ ដឺក្រេ” ៕
ប្រែសម្រួល៖ លឹម ហុង (ប្រភព៖ dagbladet, ផែនការងារអន្តោប្រវេសន៍ ខេត្តកំពត)
