បាត់ដំបងៈ កម្លាំងប៉ូលិសខេត្តបាត់ដំបង បានចុះបង្ក្រាបក្រុមក្មេងៗទំនើងចំនួន២ក្រុម ក្នុងភូមិសាស្ត្រក្រុងបាត់ដំបង ដែលមួយក្រុមបង្ហោះម៉ូតូ (នៅផ្លូវហាយវេក្រវ៉ាត់ក្រុង) និងមួយក្រុមទៀត មានប្រដាប់ដោយដាវ ប៉ុនប៉ងធ្វើសកម្មភាពបើកឆាកប្រយុទ្ធកាប់ចាក់គ្នា ក្នុងឱ
កាសបុណ្យចូលឆ្នាំថ្មី ដើម្បីយកមកធ្វើការអប់រំណែនាំ និងធ្វើកិច្ចសន្យាឲ្យអាណាព្យាបាល មកធានាយកទៅអប់រំនៅលំនៅដ្ឋានវិញ។
លោកវរសេនីយ៍ឯក ឆាង វណ្ណឆៃ អធិការនគរបាលក្រុងបាត់ដំបង បានឲ្យដឹងថា កម្លាំងចុះបង្ក្រាបក្រុមក្មេងៗនេះ ចំនួន២ក្រុម ក្នុងភូមិសាស្ត្រក្រុងបាត់ដំបង ដែលមួយក្រុមបង្ហោះម៉ូតូ និងមួយក្រុមទៀត មានប្រដាប់ដោយដាវប៉ុនប៉ងធ្វើសកម្មភាព បើកឆាកប្រយុទ្ធកាប់ចាក់គ្នា ក្នុងឱកាសបុណ្យចូលឆ្នាំថ្មីកាលពីថ្ងៃទី ១៤ ខែ មេសា ឆ្នាំ២០២០ តាមបទបញ្ជារបស់ឯកឧត្តម ឧត្តមសេនីយ៍ទោអ៊ុច សុខុន ស្នង ការនៃស្នងការដ្ឋាននគរបាលខេត្ត។ កម្លាំងបានចុះចាប់ឃាត់ខ្លួនក្រុមទី១ ជិះម៉ូតូដឹកដាវបម្រុងធ្វើសកម្មភាពហិង្សាមាន ទី១ ឈ្មោះ រស់ រស្មី ភេទ ប្រុស អាយុ ១៨ឆ្នាំ ទីលំនៅ ភូមិឥន្ទជឹត ឃុំឈើ ទាល ស្រុកបាណន់ ខេត្តបាត់ដំបង( ម្ចាស់អាវុធ)។ ទី២ ឈ្មោះ ភាព ផាត់ជា ភេទ ប្រុស អាយុ ២០ឆ្នាំ ទីលំនៅ ភូមិឥន្ទជឹត ឃុំឈើទាល ស្រុកបាណន់ខេត្តបាត់ដំបង។ ទី៣ ឈ្មោះ ម៉ែន វណ្ណា ភេទ ប្រុស អាយុ ១៧ឆ្នាំ ទីលំនៅ ភូមិឥន្ទជឹត ឃុំឈើទាល ស្រុកបាណន់ ខេត្តបាត់ដំបង។ ទី៤ ឈ្មោះ តេង សុចិត្រ ភេទ ប្រុស អាយុ ១៥ឆ្នាំ ទីលំនៅ ភូមិឥន្ទជឹត ឃុំឈើទាល ស្រុកបាណន់ ខេត្តបាត់ដំបង។ ចំណែកក្រុម ទី២ ក្រុមបង្ហោះម៉ូតូនៅផ្លូវហាយវេក្រវ៉ាត់ក្រុង ទី១ ឈ្មោះ ឆក់ ថាថៃ ភេទ ប្រុស អាយុ ១៥ឆ្នាំ ទីលំនៅ ភូមិភ្នំគល់ ឃុំកន្ទឺរ២ ស្រុកបាណន់ ខេត្តបាត់ដំបង។ ទី២ ឈ្មោះ ថន វណ្ណឆៃ ភេទ ប្រុស អាយុ ១៥ឆ្នាំ ទីលំនៅ ភូមិភ្នំគល់ ឃុំកន្ទឺរ២ ស្រុកបាណន់ ខេត្តបាត់ដំបង។ ទី៣ ឈ្មោះ រៀម សុវណ្ណៈ ភេទ ប្រុស អាយុ ១៥ឆ្នាំ ទីលំនៅ ភូមិភ្នំគល់ ឃុំកន្ទឺរ២ ស្រុកបាណន់ ខេត្តបាត់ដំបង។
លោកឧត្តមសេនីយ៍ត្រី ជេត វណ្ណនី ស្នងការរងផែនការងារព្រហ្មទណ្ឌ បានបញ្ជាក់ឲ្យដឹងថា ក្រោយពេលឃាត់ខ្លួនសាកសួរ ស្រាវជ្រាវរួច កម្លាំងនគរបាលបានធ្វើការអប់រំណែនាំ និងធ្វើកិច្ចសន្យា ដោយឲ្យអាណាព្យាបាល មកធានាយកទៅអប់រំនៅលំនៅដ្ឋានវិញ។ ក្នុងនាមស្នងការនៃស្នងការដ្ឋាននគរបាលខេត្តបាត់ដំបង សូមអរគុណចំពោះការចូលរួមផ្តល់ព័ត៌មាន ពីមហាជននៅគ្រប់មជ្ឈដ្ឋាន ចំពោះសកម្មភាពក្មេងទំនើង ក៏ដូចជាសកម្មភាពផ្សេងៗទៀត ដែលពួកគេតែងតែបង្ក នូវការលំបាកស្មុគ្រស្មាញដល់សង្គម ដោយទង្វើរនិងសកម្មភាព អនាធិបតេយ្យរបស់ពួកគេ។ សមត្ថកិច្ចនគរបាលខេត្តបាត់ដំបង សូមទទួលយកនូវមតិរិះគន់ ពីគ្រប់មជ្ឈដ្ឋានប្រកបដោយន័យស្ថាបនា និងប្តេជ្ញារក្សាបាននូវសន្តិសុខ សុវត្ថិភាពសណ្តាប់ធ្នាប់សង្គមជូនប្រជាពលរដ្ឋ ៕ ដោយ ៖ អ៊ុងសារុំ
