ភ្នំពេញ៖ ថ្ងៃនេះ ទី១៧ ខែមេសា ឆ្នាំ២០២០ ថ្ងៃខួប៤៥ឆ្នាំនៃការឡើងកាន់អំណាចរបស់ខ្មែរក្រហមក្នុងរយៈពេល៣ឆ្នាំ ៨ខែ និង ២០ថ្ងៃ ដែលខ្មែរក្រហមកាន់អំណាច ហើយបានធ្វើឳ្យកម្ពុជាក្លាយទៅជានរកលោកិយ ប្រជាជនរងទុក្ខទារុណកម្ម និងការកាប់សម្លាប់ដ៏ឃោរឃៅបំផុត។ ក្នុងរបបនេះ អ្នកជំនាញ និងអ្នកស្រាវជ្រាវបានប៉ាន់ស្មានថា ចំនួនមនុស្សស្លាប់ក្រោមរបបកម្ពុជាប្រជាធិបតេយ្យខ្មែរក្រហមនេះ សរុបមានប្រមាណដល់ទៅជាង២លាននាក់ ពោលគឺចំនួននេះច្រើនជាង១ភាគ៤នៃចំនួនប្រជាជនកម្ពុជាសរុបនាពេលនោះ ហើយការស្លាប់នៃអ្នកទាំងនោះគឺបណ្តាលមកពី ការធ្វើទារុណកម្មយ៉ាងព្រៃផ្សៃ ការសម្លាប់ ខ្វះខាតអាហារបរិភោគ និងមានជម្ងឺដែលអត់បានទទួលការព្យាបាល។
ការសម្លាប់នេះមានរបៀបបែបបទជាច្រើនដូចខាងក្រោមនេះ
-វត្តមានផែនការសម្លាប់រង្គាលដោយមានខ្សែរយៈ ប្រព្រឹត្តទៅលើប្រជាជនគ្រប់ស្រទាប់គ្រប់ប្រភេទក្នុងសភាពសាហាវឃោរឃៅបំផុត៖ បនប៉ុលពត និងអៀងសារី បានសម្លាប់រង្គាលដោយគ្មានរើសមុខជាទាហាន ឬពលទាហានរបស់របបចាស់ សម្លាប់រង្គាលនូវបញ្ញវន្តគ្រប់ជាន់ថ្នាក់ សម្លាប់រង្គាលទាំងមនុស្សទូទៅដែលពួកវាយល់ថា ប្រឆាំងនឹងពួកវា។
-ការកាន់សម្លាន់អ្នកដឹកនាំសាសនា សាសនិកជន ការលប់បំបាត់សាសនា ការកាប់សម្លាប់ជនជាតិភាគតិច។
-ការបណ្តេញប្រជាជនចេញពីរដ្ឋធានីភ្នំពេញ ពីទីក្រុង និងជនបទដែលទើបរំដោះ នាំឱ្យមានការវិនាសហិនហោចដល់មូលដ្ឋានគ្រួសារ មូលដ្ឋានសង្គម និងនាំឱ្យមានការសម្លាប់រង្គាលដល់ពូជមនុស្ស។
-ប្រមូលបង្ខំប្រជាជនឱ្យចូល “សហករណ៍” ដែលជាជំរំប្រមូលផ្តុំក្លែងភេទគាបសង្កត់ប្រជាជនឱ្យធ្វើការ និងរស់នៅក្នុងលក្ខណៈវិនាសអន្តរាយទាំងរូបកាយទាំងស្មារតី សម្លាប់ព្យាបាទយ៉ាងរង្គាល។
-ឃាតកម្មលើកុមារ និងការបង្វឹកខួរកុមារជំទង់ឱ្យទៅជាជនឃោរឃៅកាចសាហាវក្រៃលែង។
-ការបំផ្លាញរចនាសម្ព័ន្ធសេដ្ឋកិច្ចជាតិ បំផ្លាញខឿនវប្បធម៌ជាតិ ប្រព័ន្ធអប់រំ និងខឿនសុខាភិបាល។
-ក្រោយត្រូវកងកម្លាំងប្រដាប់អាវុធស្មោះត្រង់វាយរំលំ បនប៉ុលពត អៀងសារី នៅតែរឹងរូសបន្តការតតាំងនឹងបដិវត្តន៍ដោយប្រព្រឹត្តបទឧក្រិដ្ឋថ្មីៗទៀត។
-រយៈពេលជិត៤ឆ្នាំដែលពួកវាប្លន់យករដ្ឋអំណាចដឹកនាំប្រទេស បនប៉ុនពត អៀងសារី បានអនុវត្តសម្លាប់មនុស្សយ៉ាងព្រៃផ្សៃបំផុត។
ប៉ុលពត ក្នុងតួនាទីជាលេខាអង្គការ “អង្គការបក្ស” និងជានាយករដ្ឋមន្ត្រីនៃរដ្ឋាភិបាល មានបន្ទុកខ្ពស់បំផុតក្នុងការដឹកនាំក្បាលម៉ាស៊ីនរដ្ឋទាំងមូល ជាអ្នកលើកគោលការណ៍ និងមាគ៌ាក្នុងប្រទេស ក្រៅប្រទេស ណែនាំក្បាលម៉ាស៊ីនឱ្យអនុវត្ត។ គឺប៉ុលពតខ្លួនឯងដែលបានចុះទៅតំបន់នានាក្នុងប្រទេសដើម្បីណែនាំ និងត្រួតពិនិត្យដោយផ្ទាល់នូវការបោសសម្អាតប្រជាជនគ្រប់ស្រទាប់ជាន់ថ្នាក់ដែលពួកវាចាត់ទុកថា ជាអ្នកប្រឆាំង។
អៀងសារី ក្នុងតួនាទីជាសមាជិកគណៈអចិន្ត្រៃយ៍នៃការិយាល័យនយោបាយ និងជាឧបនាយករដ្ឋមន្ត្រីរបស់រដ្ឋាភិបាលទទួលបន្ទុកកិច្ចការបរទេសដែលជាបន្ទុកខ្ពស់ មានសិទ្ធិអំណាចបរិបូរ បានរួមជាមួយ ប៉ុលពត ដឹកនាំរួមជាអ្នករចនា និងអនុវត្តចំណងទាក់ទងឃុបឃិតជាមួយបនប្រតិកិរិយាអន្តរជាតិផ្សេងៗទៀតដែលជាអ្នកចាំជួយដោះសានូវអំពើប្រល័យពូជសាសន៍របស់ពួកវានៅលើឆាកអន្តរជាតិ។ គឺ អៀងសារី នេះហើយជាអ្នកចេញអាជ្ញាឱ្យហៅបញ្ញវន្ត និស្សិត ដែលកំពុងប្រកបការងាររៀនសូត្រឯប្រទេសក្រៅឱ្យចូលមកស្រុកវិញ គឺ អៀងសារី នេះហើយជាអ្នកទទួលខុសត្រូវដោយផ្ទាល់អំពីទោសសម្លាប់បញ្ញវន្ត និស្សិតជាតិឯងដោយបោកបញ្ឆោតយកមកពីបរទេស៕ដោយ៖ CEN