ម៉ាឡេស៊ី៖ ខណៈពេលដែលមនុស្សគ្រប់គ្នា ត្រូវបានឲ្យស្នាក់នៅផ្ទះទាំងបង្ខំចិត្ត ក្នុងអំឡុងពេលទប់ស្កាត់ការរីករាលដាលនៃជំងឺកូវីដ១៩ ជាអកុសល ភ្លៀងធ្លាក់មួយមេធំ បានធ្វើឲ្យលិចលង់រហូតដល់ខាងក្នុងផ្ទះ របស់ប្រជាពលរដ្ឋនៅក្នុងតំបន់ Petaling Jaya ។
កាលពីថ្ងៃទី១៦ មេសា នៅតំបន់ Pettaling Jaya ប្រទេសម៉ាឡេស៊ី បានរងនូវការលិចលង់ដោយទឹកជំនន់ បន្ទាប់ពីមានភ្លៀងធ្លាក់នៅពេលរសៀលដ៏ខ្លាំងក្លា និងបានវាយប្រហារមកលើតំបន់ជាច្រើន ។
ដោយតែភ្លៀងធ្លាក់យ៉ាងគំហុក ដែលជាហេតុធ្វើឲ្យទឹកជោរជន់ក្នុងកម្រិតឡើងដល់ ៣ ហ្វ៊ីត (ជិត១ម៉ែត្រ) ចូលទៅក្នុងផ្ទះសម្បែងប្រជាជន ។ ពលរដ្ឋខ្លះសូម្បីនិយាយថា ទឹកលិចចូលផ្ទះសឹងពាក់កណ្តាលខ្លួន ។ នេះបើតាម Sin Chew Daily រាយការណ៍ ។
ពុំត្រឹមតែធ្វើឲ្យផ្ទះសម្បែងរងផលប៉ះពាល់ទេ គឺសូម្បីតែកន្លែងដាក់តាំងបង្ហាញម៉ូតូទំនើបៗ Ducati PJ ក៏បានជួបប្រទះនូវទឹកជំនន់ដ៏អាក្រក់បំផុតនេះផងដែរ ដូចដែលរូបភាពត្រូវបានបង្ហោះឲ្យឃើញជាក់ស្តែងនៅលើអនឡាញ គឺលិចលង់ទាំងស្រុងតែម្តង។
មនុស្សគ្រប់គ្នាសង្ឃឹមថា នឹងសម្ងំស្នាក់នៅផ្ទះ ដើម្បីទប់ស្កាត់ការរីករាលដាលជំងឺកូវីដ ១៩ ប៉ុន្តែ នៅពេលនេះពួកគេកាន់តែពិបាកចិត្តបន្ថែមទៀត ខណៈរដូវភ្លៀងទើបបានចាប់ផ្តើមឈានចូលមកដល់ បង្កការលំបាកយ៉ាងនេះទៅហើយ ចុះទម្រាំថ្ងៃបន្ទាប់ទៀតនឹងយ៉ាងណា ។ ទោះយ៉ាងណា នេះជាគ្រោះធម្មជាតិ ដែលយើងទាំងអស់គ្នាត្រូវតែបន្តចូលរួមដោះស្រាយ ៕
ប្រែសម្រួល៖ លឹម ហុង (ប្រភព៖ worldobuzz)
