ភ្នំពេញ៖ ឯកឧត្តម នាយឧត្តមសេនីយ៍ មៀច សុផាន់ណា រដ្ឋលេខាធិការ ក្រសួងមហាផ្ទៃ និងជាប្រធាន គណៈកម្មាធិការ ប្រយុទ្ធប្រឆាំងផលិតផលក្លែងក្លាយ បានថ្លែងថា កម្ពុជាកំពុងជួបជំងឺ កូវីដ-១៩ ក៏មានជនខិលខូចមួយចំនួន បានលួចនាំចូល និងចែកចាយនូវឧបករណ៍បរិក្ខារពេទ្យ ដូចជា អាល់កុល ជែល សារធាតុសម្លាប់មេរោគ ដែលគ្មានប្រភពច្បាសលាស់ មកកម្ពុជា ហើយ គណៈកម្មាធិការ ក៏បានបង្ក្រាបទាន់ពេលវេលាផងដែរ។
ក្នុងពិធីចុះហត្ថលេខា លើកិច្ចព្រមព្រៀងសហការជាមួយ ក្រុមហ៊ុន ធី អ អ៊ី អ៊ីមផក អិចផត ឯ.ក នាថ្ងៃទី១៧ ខែមេសា ឆ្នាំ២០២០ នៅទីស្ដីការ ក្រសួងមហាផ្ទៃ ឯកឧត្តម នាយឧត្តម សេនីយ៍ មៀច សុផាន់ណា បានឲ្យដឹងថា ក្នុងក្នុងស្ថានភាព កូវីដ-១៩ កើតមានឡើងនៅ កម្ពុជា គណៈកម្មាធិការ ប្រយុទ្ធប្រឆាំងផលិតផលក្លែងក្លាយ បានចុះបង្ក្រាបបទល្មើស ផលិតផលគ្មានច្បាប់ ដូចជា អាល់កុល ជែល ជាដើម បានច្រើនករណីផងដែរ។
ឯកឧត្តម មានប្រសាសន៍ថា “ការរាលដាលជំងឺកូវីដ-១៩ ដោយខណៈពេលដែលសកលលោក ក៏ដូចជា ប្រទេសកម្ពុជាកំពុងជួបមានករណីជំងឺ កូវីដ-១៩ ដែលស្ថិតក្នុង ស្ថានភាព ដ៏ពិបាកនេះ ក៏មានជនខិលខូចមួយចំនួន បានលួចនាំចូល និងចែកចាយ នូវឧបករណ៍ បរិក្ខរពេទ្យ អាល់កុល ជែល និងសារធាតុ សម្លាប់មេរោគ ដែលគ្មាន ប្រភពច្បាសលាស់ គ្មានគុណភាពគ្រប់គ្រាន់ ដោយពុំទាន់ទទួល បានលិខិត អនុញ្ញាតពីក្រសួង ស្ថាប័នមានសមត្ថកិច្ចនៅឡើយទេ ហើយសកម្មភាពទាំងនេះ គឺជាអំពើល្មើសច្បាប់ ដែលអាចប៉ះពាល់យ៉ាងធ្ងន់ធ្ងរដល់សុខភាពប្រជាពលរដ្ឋយើង”។
ទន្ទឹមនឹងនោះ ឯកឧត្តម នាយឧត្តមសេនីយ៍ ក៏បានបន្ដលើឡើងថា ដើម្បីបង្ហាញឲ្យឃើញថា ក្រុមហ៊ុនដែលមានច្បាប់ទម្លាប់ត្រឹមត្រូវ គឺត្រូវតែទទួលស្គាល់ និងលើកទឹកចិត្តឲ្យបន្ដសកម្មភាពធុរកិច្ចរបស់ខ្លួន ឲ្យបានកាន់តែរីកចម្រើនថែមទៀត។ ឯកឧត្តមបន្ថែមថា ប្រជាពលរដ្ឋដែលពុំទាន់មានច្បាប់ទម្លាប់ត្រឹមត្រូវ ត្រូវប្រញាប់ទៅបំពេញបែបបទចុះបញ្ជីស្នាមឲ្យបានត្រឹមត្រូវ ដើម្បីឲ្យពលរដ្ឋ ដែលជាអ្នកប្រើប្រាស់ ទទួលបាននូវផលិតផល និងសេវាកម្មដែលមានគុណភាពហើយស្របច្បាប់។
ដោយមើលឃើញពីស្ថានភាពការរីករាលដាល នៃផលិតផលក្លែងក្លាយ និងខុសច្បាប់ ដែលប៉ះពាល់សុខភាព និងសុវត្ថិភាពសង្គម ទើប គ.ប.ផ.ក រៀបចំឲ្យមានកិច្ចព្រមព្រៀងសហការ រវាង គ.ប.ផ.ក និងក្រុមហ៊ុន គឺដើម្បីធ្វើកិច្ចសហការរួមគ្នា ក្នុងការប្រយុទ្ធប្រឆាំងការនាំចូល ការផលិត និងការចែកចាយនូវផលិតផល ដែលក្លែងក្លាយ និងខុសច្បាប់ នៅក្នុងព្រះរាជាណាចក្រកម្ពុជា និងដើម្បីជួយការពារផលប្រយោជន៍ស្របច្បាប់ របស់ក្រុមហ៊ុនប្រកបអាជីវកម្ម និងរួមចំណែកយ៉ាងសំខាន់ក្នុងបុព្វហេតុ និងបេសកកម្មថែរក្សាលើកកម្ពស់សុខភាពសាធារណៈជូនប្រជាពលរដ្ឋ។
នាឱកាសនោះ លោកស្រី តែ ស៊ូអេង អគ្គនាយិកាក្រុមហ៊ុន ធី អ អ៉ី បានឲ្យដឹងថា ក្រុមហ៊ុន ធី អ អ៉ី គឺជាក្រុមមហ៊ុនស្របច្បាប់ ដែលបាននាំចូលផ្តាច់មុខ និងចែកចាយផលិតផលគ្រឿងសម្អាង ចំណីអាហារ និងផលិតជំនួយសុខភាព ពីបណ្តាប្រទេសនៅប៉ែកអាស៉ី និងអឺរ៉ុប មានដូចជាប្រទេសអ៉ីតាលី ថៃ កូរ៉េ បារាំង ជាដើម។ លោកស្រី បានបន្តថា ក្រុមហ៊ុនបានរួមចំណែកលើកស្ទួយវិស័យអប់រំ ថែរក្សាការពារបរិស្ថាន យុទ្ធនាការប្រឆាំងគ្រឿងញៀន ផលិតផលក្លែងក្លាយ និងសកម្មភាពផ្សេងៗជាច្រើនទៀត ដែលយើងអាចធ្វើទៅបាន ដើម្បីសង្គមជាតិយើង។
គូសបញ្ជាក់ផងដែរ គណៈកម្មាធិការ បានប្រតិបត្តិការបង្ក្រាប និងបំផ្លាញចោលផលិតផលខុសច្បាប់ជាច្រើនលើក និងមានចំនួនរាប់រយតោនរួមមានៈ ផលិតផលឱសថ គ្រឿងសំអាង ផលិតផលប្រើប្រាស់ និងគ្រឿងឧបភោគ-បរិភោគខុសច្បាប់ និងខូចគុណភាពជាច្រើនសន្ធឹកសន្ធាប់ និងបានឃាត់ខ្លួនជនសង្ស័យបញ្ជូនទៅតុលាការដើម្បីផ្តន្ទាទោសតាមច្បាប់ជាច្រើននាក់ផងដែរ ៕
ដោយ៖កូឡាប
