ភ្នំពេញ៖ ក្នុងរយៈកាលកន្លងមកនេះ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែងនិងបង្ក្រាបការក្លែងបន្លំ បានចុះពិនិត្យនៅទីតាំងលក់ឱសថនិងទំនិញជាច្រើនកន្លែង ដោយបានរកឃើញទឹកអាល់កុលលាងដៃ លក់តាមទីផ្សាររហូតដល់ទៅ៨០តោន បានធ្វើពីសារធាតុមេតាណុល ដែលបង្កបញ្ហាខាតបង់ថវិកា និងប៉ះពាល់ដល់សុខភាព របស់អ្នកប្រើប្រាស់។
តាមរយៈសេចក្តីជូនដំណឹងស្តីពីការរកឃើញសារធាតុមេតាណុលក្នុងផលិតផលអាល់កុលលាងសម្អាតដៃ នៅថ្ងៃទី១៧ ខែមេសា ឆ្នាំ២០២០នេះ ក្រសួងពាណិជ្ជកម្ម បានបញ្ជាក់ថា កន្លងមកអគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) នៃក្រសួងពាណិជ្ជកម្ម បានសហការជាមួយស្ថាប័នពាក់ព័ន្ធចុះត្រួតពិនិត្យគុណភាព អាល់កុលលាងសម្អាតដៃ ដែលកំពុងតែចរាចរ និងចែកចាយនៅទីផ្សារ និងនៅតាមទីកន្លែងផ្សេងៗទៀត។ តាមរយៈកិច្ចប្រតិបត្តិការនេះ បានរកឃើញមានការលួចបន្លំប្រើប្រាស់ នូវសារធាតុមេតាណុលជាច្រើន ធ្វើជាអាល់កុលលាងសម្អាតដៃ សម្រាប់កម្ចាត់មេរោគកូវីដ-១៩ រហូតជាង ៨០តោន។ បញ្ហានេះមិនត្រឹមតែធ្វើឲ្យបាត់បង់នូវថវិការបស់ប្រជាពលរដ្ឋប៉ុណ្ណោះទេ ប៉ុន្តែថែមទាំងបង្កគ្រោះថ្នាក់ដល់សុខភាពយ៉ាងធ្ងន់ធ្ងរទៀតផង។
ក្រសួងពាណិជ្ជកម្ម សូមធ្វើការអំពាវនាវ និងទទូចស្នើសុំឱ្យអាជីវករ ពាណិជ្ជករ ក្រុមហ៊ុន-សហគ្រាស និងបុគ្គល ដែលធ្វើអាជីវកម្មលើផលិតផលដែលប្រើប្រាស់សារធាតុមេតាណុល បញ្ឈប់ការដាក់លក់ និងចែកចាយផលិតផលទាំងនោះនៅក្នុងទីផ្សារ ដើម្បីជាប្រយោជន៍រួមរបស់ប្រជាពលរដ្ឋទាំងមូល។
ក្នុងករណីដែលក្រសួងពាណិជ្ជកម្ម នៅតែពិនិត្យឃើញថា អាជីវករ ពាណិជ្ជករ ក្រុមហ៊ុន សហគ្រាស និងបុគ្គលណាមួយនៅតែឆ្លៀតឱកាសលក់ និងចែកចាយទឹកអាល់កុលធ្វើពីមេតាណុល ក្នុងអំឡុងពេលកម្ពុជាកំពុងជួបប្រទះ នឹងការរាតត្បាតជាសកលនៃជំងឺកូវីដ-១៩ ក្រសួងពាណិជ្ជកម្ម នឹងចាត់វិធានការតាមផ្លូវច្បាប់ជាធរមាន។
មេតាណុល គឺជាប្រភេទអាល់កុលពុល គ្មានពណ៌ ថ្លា គ្មានក្លិន ដែលមានលក្ខណៈស្រដៀងគ្នាខ្លាំងទៅនឹងអាល់កុលធម្មតា (អេទីលអាល់កុល) ដែលភាគច្រើនត្រូវបានប្រើប្រាស់ជាសារធាតុរំលាយ។ មេតាណុល ជាសារធាតុរលាយក្នុងទឹកទាំងស្រុង ហើយងាយឆាបឆេះ។ ជាទូទៅសារធាតុនេះនៅលើទីផ្សារមានឈ្មោះពាណិជ្ជកម្មផ្សេងៗគ្នា ដូចជា មេទីលអាល់កុល (Methyl Alcohol) មេទីលអ៊ីដ្រាត (Methyl hydrate) មេទីលអ៊ីដ្រុកស៊ីត (Methyl hydroxide) មេទីលឡុល (Methylol), Wood Naphtha និង Wood Spirit ។ល។
យោងតាមសេចក្តីណែនាំរបស់អង្គការសុខភាពពិភពលោក សារធាតុមេតាណុល មិនត្រូវបានអនុញ្ញាតឱ្យប្រើប្រាស់ជាសារធាតុផ្សំសកម្ម នៅក្នុងការផលិតសារធាតុលាងសម្អាតដៃឡើយ។
ផលប៉ះពាល់មេតាណុលទៅលើសុខភាពតាមរយៈការស្រូបចូល ជ្រាបចូលតាមស្បែក ឬការលេបចូល ក្នុងនោះសម្រាប់រយៈពេលខ្លី វានឹងធ្វើឱ្យរលាកស្បែក រលាកភ្នែក ឈឺក្បាល វិលមុខ ងងុយដេក ច្របូលច្របល់ បាត់ស្មារតី ក្អួត រំខានដល់ការរំលាយអាហារ និងធ្វើឱ្យស្រវាំងភ្នែក។ រយៈពេលវែង វាអាចពុលដល់ប្រព័ន្ធរាងកាយ ខូចដល់ប្រព័ន្ធខួរក្បាល ការមើលឃើញចុះខ្សោយ ឬស្រវាំង និងអាចងងឹតទាំងស្រុង។ គ្រោះថ្នាក់ដល់ស្លាប់ ប្រសិនបើមានការដាក់លាយជាមួយស្រា ឬជាមួយភេសជ្ជៈផ្សេងៗ។ ករណីពុលស្រា ធ្លាប់មានកើតឡើងជាញឹកញាប់នៅក្នុងប្រទេសយើង ក៏ដូចជានៅតាមបណ្តាប្រទេសមួយចំនួនដែលនិយមផឹកស្រា។
សូមបញ្ជាក់ថា អាល់កុលក្លែងក្លាយ (មេតាណុល) ដែលជាសារធាតុពុលមិនអាចយកប្រើប្រាស់ ក្នុងការកំចាត់មេរោគសរុបជាង ៦ម៉ឺន ៤ពាន់លីត្រ ត្រូវបានសមត្ថកិច្ចចម្រុះ សហការជាមួយសាលារាជធានីភ្នំពេញ ដឹកនាំដោយព្រះរាជអាជ្ញារងអមសាលាដំបូងរាជធានីភ្នំពេញធ្វើការបំផ្លាញចោល។ ប្រតិបត្តិការនេះ បានធ្វើឡើង នៅព្រឹកថ្ងៃសុក្រ ទី១០ ខែមេសា ឆ្នាំ២០២០នេះ នៅទីតាំងស្ថានីយ៏បូមទឹកស្អុយទី១ ទំនប់កប់ស្រូវ ស្ថិតនៅភូមិផ្សារលិច សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ ។
ឯកឧត្តម ឌឹម ថេង អគ្គនាយករង នៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ ក.ប.ប. នៃក្រសួងពាណិជ្ជកម្ម បានមានប្រសាសន៍ថា នៅក្នុងពេលស្ថានភាពប្រទេសជាតិ ក៏ដូចជាពិភពលោកទាំងមូល កំពុងតែជួបប្រទះ នូវការរាតត្បាតនៃវីរុសកូវីដ១៩ តម្រូវការអាល់កុល ដើម្បីប្រើប្រាស់ជាសារធាតុសម្រាប់លាងសំអាតដៃ កំចាត់មេរោគ បានកើនឡើងយ៉ាងខ្លាំង ដែលជាហេតុដែលបង្កឱ្យមានការឆ្លៀតឱកាសកេងចំណេញផ្នែកសេដ្ឋកិច្ច ពីសំណាក់ជនខិលខូចមួយចំនួន ដោយលួចបន្លំចែកចាយ នូវអាល់កុលក្លែងក្លាយ (មេតាណុល) ដែលជាសារធាតុពុល មិនអាចយកទៅប្រើប្រាស់ ក្នុងការកម្ចាត់មេរោគ និងបណ្តាលឱ្យមានគ្រោះថ្នាក់ធ្ងន់ធ្ងរដល់សុខភាពអ្នកប្រើប្រាស់។ ក្នុងនោះដែរ អគ្គនាយក ក.ប.ប. ដែលមានអាណត្តិផ្តល់ដោយច្បាប់បាន បន្តស្រាវជ្រាវ ស៊ើបអង្កេត និងបង្ក្រាប បានជាបន្តបន្ទាប់នូវសារធាតុមេតាណុលទាំងនេះ ដែលជនខិលខូចដាក់លក់ក្នុងរូបភាពជាអាល់កុលសម្រាប់ប្រើប្រាស់កំចាត់មេរោគ ដែលធ្វើឱ្យអ្នកប្រើប្រាស់មានការភាន់ច្រឡំជាអាល់កុលពិត។
អគ្គនាយកដ្ឋាន ក.ប.ប. ក៏បានអំពាវនាវដល់សាធារណជន ជាពិសេសអាជីវករទាំងអស់ មេត្តាចូលរួមសហការ និងស្វែងយល់អំពីការ ប្រកបអាជីវកម្ម ដោយការទទួលខុសត្រូវ ជៀសវាងធ្វើឱ្យប៉ះពាល់ដល់សុខភាពអ្នកប្រើប្រាស់៕
ដោយ៖កូឡាប
