បាត់ដំបង៖ ក្រសួងយុត្តិធម៌ បាននាំសម្ភារប្រើប្រាស់មួយចំនួន ដែលជាអំណោយរបស់ ឯកឧត្តម អង្គ វង្សវឌ្ឍនា ទេសរដ្ឋមន្ត្រី រដ្ឋមន្ត្រីទទួលបេសកកម្មពិសេស និងឯកឧត្តម កើត រិទ្ធ រដ្ឋមន្ត្រីក្រសួងយុត្តិធម៌ រួមមាន អាវ សម្រាប់គ្រូពេទ្យចំនួន ១០០ វ៉ែនតាការពារសម្រាប់គ្រូពេទ្យចំនួន ១០០ ម៉ាស ៣៥០០និងជែលលាងដៃ ៣៦០ លីត្រ ផ្ដល់ជួនដល់ក្រុមគ្រូពេទ្យជួរមុខមន្ទីរពេទ្យបង្អែកខេត្តបាត់ដំបងសម្រាប់ប្រើប្រាស់ព្យាបាលអ្នកជំងឺកូវីដ១៩។
ពិធីប្រគល់សម្ភារនេះ បានធ្វើឡើងកាលពីល្ងាចថ្ងៃទី១៧ ខែមេសា ឆ្នាំ២០២០ក្រោមអធិបតីភាព ឯកឧត្តម ងួន រតន អភិបាលខេត្តបាត់ដំបង និងលោក នួន សាន ព្រះរាជអាជ្ញាជាតំណាងឲ្យក្រសួងយុត្តិធម៌ និងមានការអញ្ជើញចូលរួមពីលោក លោកស្រី ប្រធាន អនុប្រធាន មន្ទីរសុខាភិបាលខេត្ត លោក ប្រធានមន្ទីរពេទ្យបង្អែកខេត្ត និងលោកគ្រូ អ្នកគ្រូពេទ្យជាច្រើននាក់ផងដែរ។
លោក កាក់ សិលា ប្រធានមន្ទីរពេទ្យបង្អែកខេត្ត បានថ្លែងអំណរគុណដល់ឯកឧត្តម អង្គ វង្ស វឌ្ឍនា និងឯកឧត្តម កើត រិទ្ធ ដែលបានគិតគូរដល់ក្រុមគ្រូពេទ្យជួរ មុខ និងបានផ្តល់សម្ភារមួយចំនួន ដល់ក្រុមគ្រូពេទ្យក្នុងបំពេញបេសកកម្មព្យាបាល បងប្អូនប្រជាពលរដ្ឋដែលមានជំងឺកូវីដ ១៩ នៅមន្ទីរពេទ្យបង្អែកខេត្តបាត់ដំបងផងដែរ។
គួរបញ្ជាក់ផងដែរថាជំងឺកូវីដ ១៩ កំពុងរាតត្បាតជាសាកល ហើយប្រទេសកម្ពុជាយើងក៏មានអ្នកឆ្លងជំងឺកូវីដ ១៩ នេះដែរ។ ដោយឡែកខេត្តបាត់ដំបង មានអ្នកឆ្លងជំងឺកូវិដ ១៩ ចំនួន ៨ នាក់ ស្រី ២ នាក់ និងជាសះស្បើយចំនួន ៧ នាក់ នៅសល់ចំនួន ១ នាក់ទៀត កំពុងសម្រាកព្យាបាលនៅមន្ទីរពេទ្យបង្អែកខេត្តបាត់ដំបង៕
ដោយ ៖ អ៊ុងសារុំ