ភ្នំពេញ៖ បើតាមព័ត៌មាន ដែលបង្ហោះលើទំព័រហ្វេសប៊ុករបស់ស្ថានទូតកម្ពុជាប្រចាំនៅកូរ៉េខាងត្បូង នៅថ្ងៃទី១៧ ខែមេសា ឆ្នាំ២០២០ថា ពលរដ្ឋខ្មែរ ៣ នាក់ ឆ្លងកូវីដ ១៩ នៅកូរ៉េខាងត្បូង ជាវិញហើយ។ ស្ថានទូតខ្មែរប្រចាំនៅប្រទេសកូរ៉េ បានបញ្ជាក់ថា ពួកគាត់ បានរៀបចំបែបបទ ដើម្បីចេញពីមន្ទីរពេទ្យតាំងពីព្រឹកមិញ ហើយឥឡូវអ្នកទាំង៣ បានមកដល់ផ្ទះដោយសុវត្ថិភាព។
ឯកឧត្តមឡុង ឌីម៉ង់ ឯកអគ្គរាជទូតកម្ពុជាប្រចាំនៅកូរ៉េខាងត្បូង បានថ្លែងថា ដំណឹងល្អមួយពីកូរ៉េថ្ងៃនេះ។ អ្នកជំងឺ COVID19 នៅកូរ៉េជនជាតិខ្មែរទាំងបីនាក់ បានជាសះស្បើយពីជំងឺហើយ គ្រូពេទ្យក៏បានអនុញ្ញាតឲ្យចេញទៅផ្ទះបន្ទាប់ពីពិនិត្យ ២ដងជាប់គ្នាថាអស់មេរោគ។ ពួកគាត់បានរៀបចំបែបបទដើម្បីចេញពីពេទ្យតាំងពីព្រឹកនេះ ហើយឥឡូវអ្នកទាំងបី បានមកដល់ផ្ទះដោយសុវត្ថិភាព។ គ្រូពេទ្យបានផ្តាំថា ក្នុងករណីពេលត្រឡប់មកផ្ទះវិញ ក្នុងមួយសប្ដាហ៍នេះ ប្រសិនបើមានអាការចេញជារោគសញ្ញាជំងឺនេះឡើងវិញ ត្រូវផ្ដល់ដំណឹងទៅពេទ្យដើម្បីពិនិត្យបន្តទៀត។
ក្នុងចំណោមអ្នកទាំង៣នោះ គឺម្នាក់ជាស្ត្រី អាយុ២៣ឆ្នាំ បានឆ្លងកូវីដ-១៩ ពីស្វាមីរបស់នាង ជាជនជាតិកូរ៉េ ហើយម្នាក់ទៀត ជាស្ត្រីអាយុ៤៦ឆ្នាំ ដែលជាម្តាយរបស់នាង និង កូនប្រុស (កូនកាត់) អាយុជាង៣ខែរបស់នាង ក៏ឆ្លងពីស្វាមីដែរ៕
ដោយ៖កូឡាប
