ភ្នំពេញ ៖ ជំងឺដំបៅក្រពះ ជាជំងឺនៃការបាត់នូវស្រទាប់កោសិកានៃក្រពះ ហើយភាគច្រើនកើតទៅលើប្រជាជនក្រីក្រ និងការបរិភោគអាហារមិនទៀងទាត់។ជំងឺនេះ វាបណ្ដាលមកពីការបាត់លំនឹង នៃស្រទាប់ការពារនៃក្រពះ និងការបញ្ចេញនូវអាស៊ីតក្រពះ។ ជំងឺនេះអាចធ្វើអោយអ្នកជំងឺសម្រាកពេទ្យ មិនអាចធ្វើការងារបាន និងអាចធ្វើឲ្យបាត់បង់អាយុជីវិត។
បើយោងតាមមន្ទីរពេទ្យកាល់ម៉ែត មានមូលហេតុចម្បង២ ដែលអាចឲ្យមានដំបៅក្រពះ៖
ទី១) មេរោគក្រពះ ដែលមានច្រើនទៅលើប្រទេសក្រីក្រ និងប្រទេសកំពុងអភិវឌ្ឍ ដោយប្រទេសទាំងនេះ ភាពមានអនាម័យ នៅមានកម្រិតនៅឡើយ ដែលអាចឆ្លងមេរោគ ពីមនុស្សម្នាក់ទៅមនុស្សម្នាក់បាន។ ពេលដែលអ្នកជំងឺបរិភោគអាហារ ដែលមានមេរោគនេះ ចូលទៅក្នុងក្រពះ មេរោគនោះ នឹងទំនៅលើកោសិកាក្រពះ បន្ទាប់មកវាធ្វើឲ្យមានការបញ្ចេញ នូវអាស៊ីតក្រពះជាច្រើន និងធ្វើឲ្យមានការរលាកក្រពះ ដែលយូរៗទៅ ធ្វើឲ្យមានជាដំបៅក្រពះ ហើយបើមិនមានការព្យាបាលឲ្យបានត្រឹមត្រូវទេនោះ វាអាចបង្កអោយមានជំងឺមហារីកក្រពះ។
ទី២) ការប្រើថ្នាំឈឺសន្លាក់ ដោយមិនមានវេជ្ជបញ្ជាត្រឹមត្រូវ អាចធ្វើឲ្យមានបញ្ហាដំបៅក្រពះ ព្រោះថ្នាំនេះធ្វើឲ្យស្រទាប់ការពារ កោសិកាក្រពះថយចុះ ដែលអាចឲ្យអាស៊ីតក្រពះ បំផ្លាញនូវស្រទាប់កោសិការបស់ក្រពះ។ បើអ្នកជំងឺដំបៅក្រពះ នៅតែបន្តប្រើថ្នាំនេះទៀត នឹងអាចធ្វើឲ្យមានការហូរឈាមក្រពះ ឬធ្លាយក្រពះ ដែលអាចធ្វើឲ្យអ្នកជំងឺបាត់បង់ជីវិត បើមិនបានព្យាបាលឲ្យបានត្រឹមត្រូវ។
ចំពោះរោគសញ្ញាវិញ, ជាទូទៅជំងឺនេះស្តែងចេញនូវអាការដូចជា ៖ ឈឺចាប់ពោះផ្នែកចុងដង្ហើម ឬផ្នែកខាងស្តាំខាងលើ, ឈឺចាប់នៅផ្នែកខាងខ្នង ឬបោះដៃផុត, ឈឺនៅពេលឃ្លាន ហើយថយការឈឺចាប់ ពេលទទួលទានអាហាររួចហើយ, អាចមានការក្អួតចង្អោរ
និងមានអារម្មណ៍ថា ពិបាកក្នុងការរំលាយអាហារ។
ផលវិបាកនៃជំងឺដំបៅក្រពះ មាន២ធំៗ៖
ទី១.ការហូរឈាមក្រពះ ៖ ស្តែងឡើងដោយមានការក្អួតឈាម, បន្ទោបង់លាមកមានឈាមខ្មៅ ស្លេកស្លាំង វិលមុខ ។ល។ ក្នុងករណីនេះ អ្នកជំងឺត្រូវបញ្ជូនមកមន្ទីរពេទ្យជាបន្ទាន់ ដើម្បីឃាត់ឈាមដែលហូរ តាមរយៈការឆ្លុះក្រពះ ហើយប្រើថ្នាំ និងបញ្ចូលឈាមឲ្យបានត្រឹមត្រូវ។
ទី២. ការធ្លាយក្រពះ៖ អ្នកជំងឺមានអាការដូចជា ឈឺចាប់ខ្លាំង អត់បន្ទោបង់ ពេលស្ទាបពោះមានសភាពរឹងដូចឈើ។ អ្នកជំងឺត្រូវមកមន្ទីរពេទ្យជាបន្ទាន់ ដើម្បីធ្វើរោគវិនិច្ឆ័យឲ្យបានត្រឹមត្រូវជាមុន នឹងធ្វើការវះកាត់ជាបន្ទាន់ ព្រោះអ្នកជំងឺអាចស្លាប់ភ្លាមៗ បើមិនបានព្យាបាលឲ្យបានត្រឹមត្រូវ និងទាន់ពេលវេលានោះទេ៕ដោយ៖CEN
