បន្ទាយមានជ័យ ៖ អគ្គស្នងការដ្ឋាននគរបាលជាតិ នៅថ្ងៃទី១៨ខែមេសានេះ ចេញផ្សាយព័ត៌មានថា បុរសម្នាក់បានហូរឈាមជោកពេញខ្លួន ព្រោះតែស្ត្រីជាប្រពន្ធ បានចាប់ទាញស្លឹកត្រចៀកមកអារក បង្កឲ្យមានការភ្ញាក់ផ្អើល ហើយបន្ទាប់ពីបង្កហេតុភ្លាមៗ សមត្ថកិច្ចបានចាប់ខ្លួនស្ត្រីជាប្រពន្ធ។ ហេតុការណ៍ហឹង្សាដោយចេតនានេះ បានកើតឡើងនៅវេលាម៉ោង៨និង៤៥នាទីយប់ថ្ងៃទី១៦ ខែមេសា ឆ្នាំ២០២០ នៅភូមិបន្ទាយថ្មី ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ។
លោកវរសេនីយ៍ទោ សែស វិបុល អធិការនគរបាលស្រុក អូរជ្រៅ បានឲ្យដឹងថា បុរសរងគ្រោះជាប្តីឈ្មោះ គុជ អាយុ ៤១ឆ្នាំ និងជនដៃដល់ជាប្រពន្ធឈ្មោះទឹម ម៉ៅ អាយុ៣២ឆ្នាំ ។ គ្រួសារនេះ នៅភូមិបន្ទាយថ្មី ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ។
លោកអធិការបានបញ្ជាក់ថា នៅយប់កើតហេតុ បុរសជាប្តីកំពុងផឹកស្រា រាំលេងសប្បាយជាមួយអ្នកភូមិ នៅពេលកំពុងអង្គុយផឹកសប្បាយនោះ ស្ត្រីជាប្រពន្ធបាន ដើរទៅជិតប្តីហើយចាប់ទាញស្លឹកត្រចៀក ពេលនោះប្តីស្មានតែចាប់ទាញស្លឹកត្រចៀក ក្នុងន័យខ្នាញ់ចង់ថើប ក៏ឱនក្បាលទៅ ស្រាប់តែស្ត្រីជាប្រពន្ធអារកនឹងផ្លែឡាម បណ្តាលឲ្យចេញឈាមជោកពេញខ្លួនដួលសន្លប់នៅនឹងកន្លែង ត្រូវបាននាំបញ្ជូនទៅមណ្ឌលសុខភាពអូរបីជាន់ ជួយព្យាបាល និងសង្គ្រោះ តែដោយឈាមហូរខ្លាំងពេក បុគ្គលិកមណ្ឌលសុខភាព បានបញ្ជូនជនរងគ្រោះ ទៅមន្ទីរពេទ្យបង្អែកក្រុងប៉ោយប៉ែត ។
ចំណែកស្ត្រីជាប្រពន្ធ ត្រូវកម្លាំងនគរបាលប៉ុស្តិ៍រដ្ឋបាលឃុំអូរបីជាន់ និងវរសេនាតូចការពារព្រំដែនលេខ៩១១ ចាប់ឃាត់ខ្លួន ។
លោកអធិការបានបន្តថា តាមការសាកសួរចម្លើយ ស្ត្រីជាប្រពន្ធ បានសារភាពថា ចំពោះបញ្ហាខ្លួនយកផ្លែឡាមអារកប្តីនោះ ក៏ព្រោះតែខ្លួនស្រវឹងស្រា ហើយប្រច័ណ្ឌប្តី រួមទាំងចូលឆ្នាំគ្មានលុយផងនោះ ក៏មានចិត្តខឹងនឹងប្តី ។
នៅថ្ងៃទី១៨ខែមេសានេះ ជនសង្ស័យជាប្រពន្ធ កម្លាំងនគរបាលជំនាញ កំពុងកសាងសំណុំរឿង បញ្ជូនទៅស្នងការដ្ឋាននគរបាលខេត្តបន្ទាយមានជ័យ ដើម្បីចាត់ការបន្តតាមនីតិវិធីច្បាប់៕ដោយ៖បញ្ញាស័ក្តិ