ប៉ៃលិនៈ គ្រូពេទ្យជំនាញ បានអំពាវនាវដល់បងប្អូនប្រជាពលរដ្ឋ ជាពិសេសចំពោះបងប្អូនប្រជាពលរដ្ឋ និងប្រជាពលករខ្មែរ ដែលបានវិលត្រឡប់មកពីក្រៅប្រទេស ដែលមានការសង្ស័យថាមានផ្ទុកមេរោគកូវីដ១៩ សូមអញ្ជើញមកធ្វើតេស្តនៅ មន្ទីរពេទ្យបង្អែកខេត្តប៉ៃលិន ។
ឯកឧត្តម ផាន់ ចាន់ធុល អភិបាលខេត្តប៉ៃលិន បានអញ្ជើញសំណេះសំណាល និងប្រគល់សម្ភារសម្រាប់គ្រូពេទ្យជួរមុខ នៅតាមមន្ទីរពេទ្យបង្អែក និងតាមមណ្ឌលសុខភាពដើម្បីចូលរួម អនុវត្តន៍ យ៉ាងម៉ឺងម៉ាត់នូវ វិធានការបង្ការ និងទប់ស្កាត់ការរីករាលដាលជំងឺកូវីដ ១៩ កាលពីថ្ងៃទី១៨ ខែមេសា ឆ្នាំ២០២០ ។
ឯកឧត្តម ផាន់ ចាន់ធុល បានមានប្រសាសន៍ កោតសរសើរចំពោះក្រុមគ្រូពេទ្យ ជំនាញដែលបានខិតខំ បំពេញភារកិច្ច ប្រកបដោយការយកចិត្តទុកដាក់ និងការទទួលខុសត្រូវខ្ពស់ ក្នុងការពិនិត្យតាមដាន សុខភាពជូនប្រជាពលរដ្ឋ។ សូមសម្ដែងការលើកទឹកចិត្តខ្ពស់ ដល់អាជ្ញាធរមូលដ្ឋាន ដែលបានរួម សហការ គ្នាចុះធ្វើការអប់រំផ្សព្វផ្សាយ និងណែនាំបងប្អូនប្រជាពលរដ្ឋ ដែលមានការសង្ស័យ ឬទើបវិលមកពីក្រៅប្រទេស ឱ្យមកពិនិត្យសុខភាព និងចូលរួមអនុវត្តន៍ តាមការណែនាំរបស់ក្រសួងសុខាភិបាល។
គួរកត់សម្គាល់ផងដែរថា បងប្អូន ប្រជាពលរដ្ឋ ពិសេសប្រជាពលករខ្មែរ ដែលទើបវិលមកពីក្រៅប្រទេស មានស្មារតី ចូលរួមសហការជាមួយអាជ្ញាធរ និងក្រុមគ្រូពេទ្យ ដើម្បីពិនិត្យតាមដានសុខភាព និងចូលរួមបញ្ចៀសការឆ្លងជំងឺកូវីដ១៩ ដល់អ្នកដទៃ។ នេះជាផ្នែកមួយដ៏សំខាន់នៃការទប់ ស្កាត់ការរាតត្បាតជំងឺកូវីដ១៩ នៅកម្ពុជា និងនៅលើពិភពលោកផងដែរ។
លោកអនុបណ្ឌិត ស្លេះ យូ ប្រធានស្តីទីមន្ទីរសុខាភិបាលខេត្តប៉ៃលិន បានអំពាវនាវដល់បងប្អូនប្រជាពលរដ្ឋ ដែលមានការសង្ស័យ មានផ្ទុកមេរោគកូវីដ១៩ សូមអញ្ជើញមកធ្វើតេស្តនៅ មន្ទីរ ពេទ្យ បង្អែកខេត្តប៉ៃលិន ពិសេសចំពោះបងប្អូនប្រជាពលរដ្ឋ និងប្រជាពលករខ្មែរ ដែលបានវិលត្រឡប់មកពីក្រៅប្រទេសវិញ សូមស្តាប់តាមការណែនាំ និងសារអប់រំសំខាន់ៗ របស់ក្រសួងសុខាភិបាល ដើម្បីចូលរួមបង្ការនិងទប់ស្កាត់ការ រីករាលដាលជំងឺកូវីដ ១៩៕ដោយៈអ៊ុងសារុំ
