ភ្នំពេញ៖ជនសង្ស័យមួយក្រុមមានគ្នាប្រមាណ៦នាក់ បានធ្វើសកម្មភាពបន្លំយកលុយអស់ជាង៥ពាន់ដុល្លារនៅផ្ទះវីងវេលុយ និងលក់ចាប់ហ៊ួយ យីហោម៉ាកស្រីមាស ហើយគេចខ្លួនបាត់អស់ បង្កឲ្យមានការភ្ញាក់ផ្អើលនៅវេលាម៉ោង ៧និង៤០នាទីព្រឹក ថ្ងៃទី ១៩ ខែមេសាឆ្នាំ ២០២០ ត្រង់ចំណុចផ្ទះវីងវេលុយ យីហោម៉ាក់ស្រីមាស ស្ថិតនៅក្រោយផ្សារឯករាជ្យ១ ភូមិត្រពាំងថ្លឹង១ សង្កាត់ចោមចៅទី១ ខណ្ឌពោធិ៍សែនជ័យ ។
បើតាមសម្តីរបស់ជនរងគ្រោះឈ្មោះ អែម ផល្លា អាយុ៣២ឆ្នាំ ដែលជាម្ចាស់ផ្ទះវីងវេលុយ និងលក់ចាប់ហ៊ួយយីហោម៉ាក់ ស្រីមាស បានឲ្យដឹងថា មុនពេលកើតហេតុ គាត់បានបើកតូបលក់ជាធម្មតា ដោយឲ្យលោកយាយ អាយុ៨០ឆ្នាំ នៅចាំមើល កន្លែងលក់ ចំណែកខ្លួននៅខាងលើផ្ទះ លុះបានបន្តិចក្រោយមកក៏មាន ជនសង្ស័យប្រុសម្នាក់ដើរមករកទិញកាតទូរស័ព្ទ ១ដុល្លារ ជនសង្ស័យឲ្យលុយក្រដាស់១០ដុល្លារ ដើម្បីឲ្យជនរងគ្រោះអាប់លុយ នេះល្បិចមួយដើម្បីដឹងចំណុចដែលជនរងគ្រោះទុកដាក់លុយ។
ជនរងគ្រោះបានបន្តថា ក្រោយមកទៀត ក៏មានជនសង្ស័យជាមនុស្សស្រី ដើរមកទិញ ទឹកកកអនាម័យ៥០០រៀលចំនួន៣ថង់ ដើម្បី ឲ្យជនរងគ្រោះយាយអាយុ៨០ឆ្នាំ វក់វីនឹងទឹកកក៣ ថង់នោះ ខណៈនោះក៏មានជនសង្ស័យប្រុសៗ២នាក់ទៀត ដើរមកពីចំហៀងតូប សំដៅទៅកន្លែងដាក់លុយ(កាបូប) ។
លុះនៅពេលយកបានកាបូបលុយនោះហើយ ជនសង្ស័យ២នាក់នោះ បានរត់ឡើងលើម៉ូតូដែលបក្ខពួកកំពុងបញ្ឆេះចាំនៅក្បែងផ្ទះជនរងគ្រោះ រីឯស្ត្រីដែលជាបក្ខពួក មកទិញទឹកកកចាប់យាយអាយុ៨០ឆ្នាំជាប់កុំឲ្យតាម ទើបជនសង្ស័យជាមនុស្សស្រីរត់ទៅតាមក្រោយគេខ្លួនជិះម៉ូតូចែកផ្លូវគ្នាអស់ ។
បើតាមការឲ្យដឹងពីប្រជាពលរដ្ឋ រស់នៅក្បែរខាងថា ជនសង្ស័យមានគ្នារហូតដល់៦នាក់ ជិះម៉ូតូ៣គ្រឿង ដោយឲ្យ៣នាក់ចូលធ្វើសកម្មភាពនឹង៣នាក់អង្គុយត្រៀមលើម៉ូតូ ដោយជនសង្ស័យទាំងអស់សុទ្ធតែពាក់មួកនិងម៉ាសគ្រប់គ្នា ។
ក្រោយពីជនសង្ស័យគេចខ្លួនបាត់អស់ មួយសន្ទុះធំគេឃើញមាន សមត្ថកិច្ចមូលដ្ឋានបានចុះទៅសួរនាំទើបរៀបចំធ្វើកំណត់ ជាមួយផ្នែកព្រហ្មទណ្ឌខណ្ឌ និងឆែកមើលកាមេរ៉ាសុវត្ថិភាព ដើម្បីកំណត់ភិនភាគជនសង្ស័យ ងាយស្រួលក្នុងការតាមចាប់ខ្លួន៕ដោយ៖មីដា