ស្ទឹងត្រែង៖រថយន្តពីរគ្រឿងបុកគ្នាចំពីមុខពេញទំហឹង ទៅមុខលែងរួច។ អ្នករងរបួស ត្រូវបានក្រុមគ្រួសារ ដឹកទៅកាន់មន្ទីរពេទ្យភ្លាមៗ។
ហេតុការណ៍គ្រោះថ្នាក់ចរាចរណ៍នេះ កើតឡើង ត្រង់ចំណុចមុខរដ្ឋបាលព្រៃឈើភ្នំក្រហម ស្ថិតក្នុងភូមិរាជានុកូល សង្កាត់ក្រុងស្ទឹងត្រែង វេលាម៉ោង១០ព្រឹកថ្ងៃទី១៩ ខែមេសា ឆ្នាំ២០២០។
សាក្សីឃើញហេតុការណ៍ បានឲ្យដឹងថា នៅមុនកើតហេតុ រថយន្តមួយគ្រឿងម៉ាកម៉ុងតេរ៉ូ មានគ្នាជិះពី៤ ទៅ៥នាក់ មានទាំងក្មេងតូចៗទៀតផង បើកបរមកពីទិសខាងត្បូងទៅជើង។ លុះមកដល់ចំណុចកើតហេតុ ក៏
មានរថយន្តមួយគ្រឿងទៀត ម៉ាកស៊ាំងយ៉ុង បើកទិសបញ្ច្រាសគ្នា។ ភ្លាមនោះបានបុកពេញទំហឹង ដោយរថយន្តស៊ាំងយ៉ុង បើកបរមិនប្រកាន់ស្តាំ ជិះតែម្នាក់ឯង (មិនរងរបួសទេ)។ រថយន្តមួយទៀតអ្នកបើក
បររថយន្តម៉ុងតេរ៉ូ បោកផ្ទប់នឹងចង្កូតចំទ្រូង និងប្រពន្ធរងរបួសជើង ។
យោងតាមរបាយការណ៍របស់សមត្ថកិច្ចចរាចរណ៍ នៃស្នងការដ្ឋាននគរបាលខេត្តស្ទឹងត្រែង បានបង្ហាញថា រថយន្តបង្កម៉ាកសស៊ាំងយ៉ុង ពណ៌ប្រផេះ ពាក់ផ្លាកលេខ ភ្នំពេញ 2A 5116 ឈ្មោះ ទូច វ៉ា ភេទប្រុស អាយុ៣៥ឆ្នាំ ជនជាតិខ្មែរ រស់នៅភូមិ ដូនធី ឃុំបូសខ្នុរ ស្រុកចំការលើ ខេត្តកំពង់ចាម ។
មុនកើតហេតុរថយន្តបង្កខាងលើមកពីលក់ស្វាយចន្ទី បំណងទៅផ្ទះវិញនៅឯខេត្តកំពង់ចាម ។ ចំណែករថយន្តម៉ាកម៉ុងតេរ៉ូ ពណ៌ប្រផេះ ពាកផ្លាកលេខភ្នំពេញ 2C 3623 បើកបរដោយឈ្មោះស៊ឹម គ្រីយ៉ា ភេទប្រុស អាយុ៥៨ឆ្នាំ ជនជាតិខ្មែរឥស្លាម រស់នៅភូមិវិហារសម្បូរ ឃុំរការ៥ ខេត្តត្បូងឃ្មុំ ទិសដៅទៅខេត្តរតនគិរី (ទៅមើលចំការ)។
ក្រោយកើតហេតុ សមត្ថកិច្ចជំនាញ បានយករថយន្តទាំងពីរ ទៅរក្សាទុកនៅកន្លែងរង់ចាំ ការដោះស្រាយពីម្ចាស់រថយន្តបង្កតាមផ្លូវច្បាប់។ រីឯអ្នករងរបួសជិះរថយន្តម៉ុងតេរ៉ូ ពីរនាក់ប្តីប្រពន្ធ ត្រូវក្រុមគ្រួសារ ដឹកបញ្ជូនទៅកាន់មន្ទីរពេទ្យបង្អែកខេត្តស្ទឹងត្រែង ដើម្បីព្យាបាល ៕ ដោយ ៖ សុខុម
