កំពង់ស្ពឺ ៖ នៅយប់នេះមានអ្នកទោសប្រមាណ ៣០ នាក់ បានព្យាយាមលួចរត់ចេញពីពន្ធនាគារខេត្តកំពង់ស្ពឺ តែត្រូវបានមន្ត្រីអនុរក្សពន្ធនាគារ ចាប់ឃាត់ខ្លួនវិញបានទាំងអស់ ដោយមិនមានអ្នកទោសណាម្នាក់រត់រួចនោះទេ ។ កម្លាំងកងរាជអាវុធហត្ថខេត្តកំពង់ស្ពឺ បានចុះទៅជួយអន្តរាគមន៍ទាំងយប់ផងដែរ ។ មន្ត្រីពន្ធនាគារ កំពុងស៊ើបអង្កេតរកមូលហេតុដែលនាំអោយមានការលួចរត់ចេញទាំងយប់នេះ ។
ក្រុមទណ្ឌិតប្រមាណ៣០នាក់ នៅព្រលប់ថ្ងៃទី១៩ ខែមេសា ឆ្នាំ២០២០ បាននាំគ្នាវាយមន្ត្រីពន្ធនាគារឲ្យរងរបួសប្រុងរត់ចេញពីគុក ខេត្តកំពង់ស្ពឺ តែត្រូវបានកម្លាំងនគរបាល និងកងរាជអាវុធហត្ថ សហការចាប់ជនសង្ស័យបានមកវិញទាំអស់ភ្លាមៗ ក្រោមការបញ្ជាផ្ទាល់ពីលោក វ៉ី សំណាង គណបញ្ជាការឯកភាពខេត្តកំពង់ស្ពឺ។
លោក វ៉ី សំណាង អភិបាលខេត្តកំពង់ស្ពឺ និងជាអ្នកដឹកនាំប្រតិបត្តិការបង្ក្រាប ក្រុមអ្នកទោសហែកគុករត់នេះ នៅព្រឹកថ្ងៃទី២០ ខែមេសា ឆ្នាំ២០២០នេះ បានថ្លែងថា ក្រោយពីទទួលបានដំណឹងភ្លាមៗថា មានក្រុមអ្នកទោសហែកគុក និងវាយមន្ត្រីពន្ធនាគាររត់ចេញ លោកបានបញ្ជាឲ្យកម្លាំងនគរបាលនៃស្នងការដ្ឋានខេត្ត និងកម្លាំងកងរាជអាវុធហត្ថសហការគ្នាបង្ក្រាប និងចាប់ជនដៃដល់ជាអ្នកទោសយកបានមកវិញភ្លាមៗ។
លោកអភិបាលខេត្តបានបន្តថា អ្នកទោសដែលរត់បានដល់ក្រៅមន្ទីរឃុំឃាំង ក៏ត្រូវចាប់បានមកវិញទាំងអស់ដែរ និយាយរួមមិនដូចពាក្យចចាមអារ៉ាមថា មានអ្នកទោសរត់រួចរាប់រយអ្នកនោះទេ។
លោកអភិបាលខេត្តសង្កត់ធ្ងន់ថា បើប្រើកម្លាំងនគរបាល និងកម្លាំងកងរាជអាវុធហត្ថមិនធានាបាន លោកនឹងបញ្ជាកម្លាំងយោធាបន្ថែមទៀត ដើម្បីគ្រប់គ្រងសភាពការណ៍។
ចំពោះមូលហេតុដែលនាំឲ្យមានអ្នកទោសប្រុងរត់ និងវាយមន្ត្រីពន្ធនាគារឲ្យរបួសនេះ ដោយអ្នកទោសម្នាក់បានឈឺ ហើយត្រូវយករថយន្តសង្គ្រោះដឹកទៅព្យាបាល ពេលនោះរថយន្តសង្គ្រោះចូលទៅក៏ត្រូវ បានក្រុមអ្នកទោសបះបោរឈាន ទៅវាយមន្ត្រីពន្ធនាគារតែម្តង ហើយមានឱកាសក៏នាំគ្នារត់ចេញពីគុក ប៉ុន្តែត្រូវបានកម្លាំងសមត្ថកិច្ចចាប់បានមកវិញ។
ការសម្រុករត់គេចក្រុមអ្នកទោសនេះគឺសមត្ថកិច្ចចូលទៅយកអ្នកទោស ដែលមានជំងឺទើបឱកាសល្អក្រុមអ្នកទោសព្យាយាមរត់គេច ទីតាំងពន្ធនាគារនេះ មានការយាមតឹងរឹងណាស់មិនគួរណាក្រុមអ្នកទោសរត់រួចសោះ ឬមួយមានអ្វីនៅពីក្រោយខ្នង។
សូមបញ្ជាក់ថា ចាប់តាំងពីលោក ទីន សុវណ្ណី គ្រប់គ្រងដឹកនាំជាប្រធានពន្ធនាគារខេត្តកំពង់ស្ពឺ នេះ មានអ្នកទោសជាច្រើននាក់បានស្លាប់ និងច្រើននាក់ទៀតបានរត់គេចខ្លួន ខ្លះចាប់ខ្លួនបានមកវិញ ខ្លះទៀតរត់គេចបាត់តែម្តង ប៉ុន្តែអ្វីៗ អស់លោកព្យាយាមលាក់បាំងព័ត៌មានណាស់ ទើបតែពេលនេះបែកធ្លាយដោយសារតែក្រុមអ្នកទោស២៦នាក់ព្យាយាមរត់គេចខ្លួន។
ករណីអ្នកទោសអាចរត់ចេញពីពន្ធនាគារ ទាំងក្បាលព្រលប់ បានធ្វើអោយមហាជនមានការចាប់អារម្មណ៏យ៉ាងខ្លាំង និងមានចម្ងល់សួរហេតុអ្វីដែលពន្ធនាគារខេត្តកំពង់ស្ពឺ គេឃើញមានការយាមតឹងតែង ប៉ុន្តែបែរជាអ្នកទោសអាចរត់ចេញពីពន្ធនាគាររួច តើនេះមកពីការធ្វេសប្រហែស ឬ មានអ្វីនៅពីក្រោយខ្នង ?
នៅវេលាព្រឹកថ្ងៃទី២០ មេសា នេះ ពុំអាចសុំការបំភ្លឺពីលោកឧត្តមអគ្គានុរក្សថ្នាក់លេខ២ ទីន សុវណ្ណនី ប្រធានពន្ធនាគារខេត្តកំពង់ស្ពឺ បានទេ។
ពន្ធនាគារ មិនមែនជាផ្ទះសម្បែង ឬជាហាងទំនិញ ដែលអាចចេញចូល ស្រេចតែចិត្តបានទេ ព្រោះជាកន្លែង ដែលឃុំខ្លួនអ្នកទោស ដែលមានរបងច្រើនជាន់ មានសោចាក់គ្រប់ទ្វារ មានការយាមកាមតឹងរ៉ឹង និងមានការឆែកឆេរត្រួតពិនិត្យ យ៉ាងហ្មត់ចត់ ពីសំណាក់ឆ្មាំគុក ដូច្នេះមិនអាចលួចរត់បានងាយៗនោះទេ ។
សូមរំលឹកថា នៅឆ្នាំ២០១៦ លោក ទីន សុវណ្ណនី កាន់តំណែងជាប្រធានពន្ធនាគារខេត្តរតនគិរី ។ នៅវេលាម៉ោងប្រមាណ ២រំលងអធ្រាត្រ ថ្ងៃទី២៦ ខែឧសភា ឆ្នាំ២០១៧នេះ មានអ្នកទោសចំនួន៥នាក់ បានលួចហែករបងគុករត់ចេញពីគុក ដោយរត់រួចពេលនោះអស់៤នាក់ និងចាប់បានមកវិញម្នាក់ ព្រោះលោតបាក់ចង្កេះ៕
ដោយ៖បញ្ញាស័ក្តិ