ចំនួនអ្នកស្លាប់ដោយសារវីរុសកូរ៉ូណានៅអាមេរិចកើនឡើងជិត ២.០០០នាក់ទៀត ត្រឹមរយៈពេល ២៤ម៉ោងចុងក្រោយ បណ្តាលឲ្យតួលេខនៃអ្នកស្លាប់សរុបហក់ឡើងដល់ ៤០.៦៦១នាក់កាលពីថ្ងៃអាទិត្យ។ នេះបើតាមតួលេខរបស់សកលវិទ្យាល័យ Johns Hopkins។
នៅថ្ងៃអាទិត្យមានអ្នកស្លាប់ចំនួន ១.៩៩៧នាក់ ខណៈថ្ងៃសៅរ៍មានមនុស្សចំនួន ១.៨៩១ស្លាប់។
ចំនួនអ្នកស្លាប់សរុបដោយសារវីរុសកូរ៉ូណានៅអាមេរិច ស្មើនឹងជិត ២ដងនៃចំនួនអ្នកស្លាប់នៅអ៊ីតាលី ខណៈដែលអ្នកឆ្លងកើនជិតដល់ ៧៦០.០០០នាក់។
ប្រទេសមហាអំណាចសេដ្ឋកិច្ច និងយោធានេះ បានធ្វើតេស្តរកវីរុសកូរ៉ូណា លើប្រជាពលរដ្ឋចំនួនជិត ៤.០០០.០០០នាក់។
ពលរដ្ឋអាមេរិចកាំងច្រើនជាង ២២លាននាក់បានដាក់ពាក្យស្នើសុំអត្ថប្រយោជន៍ ពីរដ្ឋដោយសារបញ្ហាគ្មានការងារធ្វើ នៅក្នុងរយៈពេល ១ខែចុងក្រោយ ខណៈដែលការបិទអាជីវកម្ម សាលារៀន និងការរឹតត្បិតលើការធ្វើដំណើរ បានបំផ្លាញដល់សេដ្ឋកិច្ចយ៉ាងខ្លាំង។
រដ្ឋជាច្រើននៅអាមេរិច ដូចជា រដ្ឋ Ohio Texas និងរដ្ឋ Florida ជាដើមបានប្រកាសថា ពួកគេគ្រោងនឹងធ្វើការបើកផ្នែកខ្លះ នៃសេដ្ឋកិច្ចឡើងវិញ ហើយការបើកនោះប្រហែលធ្វើនៅថ្ងៃទី ១ ខែឧសភា ឬក៏ឆាប់ជាង ប៉ុន្តែត្រូវតែមានការប្រុងប្រយ័ត្ន៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
