កណ្តាល៖ នគរបាលក្រុងតាខ្មៅ បានចាប់ខ្លួនជនល្មើស២នាក់ ករណីប៉ុនប៉ងលួចកាច់កម៉ូតូ ដែលកើតហេតុថ្ងៃ១៩ ខែមេសា ឆ្នាំ២០២០ម៉ោង២៣និង៣០នាទី ចំណុច ភូមិក្រពើហាកើត សង្កាត់ព្រែកឫស្សី ក្រុងតាខ្មៅ ខេត្តកណ្តាល។ ក្នុងចំណោមមុខសញ្ញាចោរលួចទាំង២នាក់នោះ មានម្នាក់ធ្លាប់ជាប់ពន្ធនាគាររយៈពេល១៨ខែ ពីបទលួចកាច់កម៉ូតូ។
ជនរងគ្រោះ មិនស្គាល់អត្តសញ្ញាណ ។ ចំណែកជនសង្ស័យ២នាក់ ១-ឈ្មោះកែវ ប៊ុនធឿន ភេទប្រុស អាយុ៣០ឆ្នាំ ទីលំនៅភូមិថ្មី សង្កាត់តាខ្មៅ ក្រុងតាខ្មៅខេត្តកណ្តាល មុខរបរ មិនពិតប្រាកដ(ឃាត់ខ្លួន)។ ២-ឈ្មោះ រី ពិសិដ្ឋ ភេទប្រុស អាយុ១៩ឆ្នាំទីលំនៅ ភូមិព្រែករាំង សង្កាត់កំពង់សំណាញ់ ក្រុងតាខ្មៅ ខេត្តកណ្តាល មុខរបរ មិនពិតប្រាកដ(ឃាត់ខ្លួន)។ វត្ថុតាងចាប់យក ម៉ូតូ១គ្រឿងម៉ាកTodayពណ៌សផ្លាកលេខកណ្តាល 1V-7915 សោខ្សៀលេខ៨រាងអក្សរL ១ ដែក៦មានចុងស្រួចសំប៉ែត ២ សោម៉ាកVan Chnee ១ កូនសោម៉ាកTiger ឧបករណ៍សម្រាប់ផ្តាច់បារី ១ ។
នគរបាលក្រុងតាខ្មៅ បានរៀបរាប់ពីសភាពនៃរឿងហេតុនេះថា នៅវេលាកើតហេតុខាងលើ កម្លាំងប៉ុស្តិ៍ព្រែកឫស្សី បានចេញល្បាតដល់ចំណុចខាងលើ បានឃើញជនសង្ស័យទាំង២នាក់ កំពុងតែជិះម៉ូតូងាកចុះឡើង ដោយមានការសង្ស័យ ក៏បានដេញតាម ឃាត់សួរនាំ ពេលនោះ ស្រាប់តែ ជនសង្ស័យឈ្មោះកែវ ប៊ុន ធឿន បានទម្លាក់វត្ថុតាងចោល ភ្លាមនោះសមត្ថកិច្ចបានធ្វើការឃាត់ជនសង្ស័យទាំង២នាក់រួមទាំងវត្ថុតាង រួចបញ្ជូនបន្តមកកាន់អធិការដ្ឋាននគរបាលក្រុងតាខ្មៅ ដើម្បីធ្វើការសាកសួរនិងចាត់ការបន្តតាមនីតិវិធី។
សូមបញ្ជាក់ថា ជនសង្ស័យ ឈ្មោះកែវ ប៊ុនធឿន ធ្លាប់ជាប់ពន្ធនាគាររយ:ពេល១៨ខែ ពីបទលួចកាច់កម៉ូតូក្នុងឆ្នាំ២០១៣៕ដោយ៖កូឡាប