បុគ្គលិកជាច្រើននាក់ដែលបម្រើការ នៅវិមានប្រធានាធិបតីអាហ្គានីស្ថាន ត្រូវបានគេធ្វើតេស្តរកឃើញថា មានផ្ទុះវីរុសកូរ៉ូណា។
ដំបូងឡើង មានការរាយការណ៍ថា បុគ្គលិកចំនួន ២០នាក់មានផ្ទុកវីរុស ប៉ុន្តែនៅថ្ងៃអាទិត្យម្សិលមិញនេះ កាសែត New York Times បានចុះផ្សាយថា ចំនួនអ្នកឆ្លងវីរុស នៅវិមានប្រធានាធិបតី បានកើនឡើងដល់ ៤០នាក់។
រដ្ឋាភិបាលអាហ្គានីស្ថាន មិនទាន់បានធ្វើការអត្ថាធិប្បាយ លើបញ្ហានោះនៅឡើយទេ ហើយក៏គ្មានការលើកឡើងថា ប្រធានាធិបតីអាហ្គានីស្ថាន លោក Ashraf Ghaniមានឆ្លងវីរុសដែរ។
លោកប្រធានាធិបតី Ashraf Ghani ដែលបច្ចុប្បន្នមានវ័យ ៧០ឆ្នាំ បានខូចផ្នែកខ្លះនៃក្រពះរបស់គាត់ ដោយសារតែជំងឺមហារីកក្នុងឆ្នាំទសវត្សន៍ឆ្នាំ ៩០។
មន្ត្រីរដ្ឋាភិបាលម្នាក់បានថ្លែងប្រាប់ AFP នៅថ្ងៃសៅរ៍ថា “មនុស្សចំនួន ២០នាក់បានឆ្លងវីរុសកូរ៉ូណា នៅវិមានប្រធានាធិបតី។ ទោះយ៉ាងណា ព័ត៌មាននោះ ត្រូវបានគេរក្សាទុក ដើម្បីកុំឲ្យមានការភ័យខ្លាច”។
សូមបញ្ជាក់ថា ប្រទេសអាហ្គានីស្ថាន មានអ្នកឆ្លងវីរុសកូរ៉ូណា ឬ COVID-19 សរុបចំនួន ៩៣៣នាក់ និងអ្នកស្លាប់ ៣៣នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC