ភ្នំពេញ៖ សេចក្ដីជូនដំណឹង ស្ដីពីកិច្ចសហការរវាងក្រសួងអប់រំ យុវជន និងកីឡា ជាមួយក្រសួងព័ត៌មាន ក្នុងការរៀបចំផលិត និងផ្សព្វផ្សាយកម្មវិធី “ការសិក្សាពីចម្ងាយ” និង”ការសិក្សាតាមប្រព័ន្ធអេឡិចត្រូនិក” ។
បើតាមសេចក្ដីជូនដំណឹងក្រសួងអប់រំនៅថ្ងៃទី២០ខែមេសានេះ សូមសិស្សានុសិស្ស មាតាបិតា អ្នកអាណាព្យាបាល និងសាធារណជនទាំងអស់មេត្តាយកចិត្តទុកដាក់លើវិធីទទួលបានកម្មវិធី “ការសិក្សាពីចម្ងាយ ” និង “ការសិក្សាតាមប្រព័ន្ធអេឡិចត្រូនិច” លើប្រព័ន្ធទូរទស្សន៍ជាតិកម្ពុជា បណ្តាញទូរទស្សន៍ខ្សែកាប វេទិកាអប់រំឌីជីថលរបស់ក្រសួងអប់រំ និងAPP របស់ក្រសួងព័ត៌មាន។
ក្រសួងអប់រំ បានលើកឡើងថា តាមការណែនាំរបស់ប្រមុខរាជរដ្ឋាភិបាលកម្ពុជា ដើម្បីជាជំនួយដល់ការសិក្សារបស់សិស្សានុសិស្សទាំងអស់នៅថ្នាក់មត្តេយ្យ បឋមសិក្សា និងមធ្យមសិក្សាចំណេះទូទៅ ក្នុងអំឡុងពេលនៃការពន្យារការចូលរៀនឡើងវិញ ក្រោយវិស្សមកាលតូច សម្រាប់គ្រឹះស្ថានសិក្សាគ្រប់កម្រិត គ្រប់ប្រភេទ ទាំងសាធារណៈនិងឯកជន ក្រសួងអប់រំ និងក្រសួងព័ត៌មាន បានសហការរៀបចំផលិត និងផ្សព្វផ្សាយកម្មវិធី “ការសិក្សាពីចម្ងាយ” និង ” ការសិក្សាតាមប្រព័ន្ធអេឡិចត្រូនិច” តាមរយៈការចាក់ផ្សាយវីដេអូនៃការបង្រៀនគ្រប់កម្រិតថ្នាក់ លើប្រព័ន្ធទូរទស្សន៍ជាតិកម្ពុជាកាណាល់ ទទក/២ ព្រមទាំងការផ្សាយបន្តតាមបណ្តាញទូរទស្សន៍ខ្សែកាបរាជធានីខេត្ត វេទិកាអប់រំឌីជីថលក្រសួងអប់រំ កំពុងមានស្រាប់ និងលើ APP របស់ក្រសួងព័ត៌មាន។ កិច្ចសហការនេះ ជាការធ្វើឲ្យកាន់តែសម្បូរបែប និងកាន់តែប្រសើរឡើង នូវការផ្តល់សេវាអប់រំប្រកបដោយគុណភាព សមធម៌ និងបរិយាប័ន្ន លើកកម្ពស់ប្រសិទ្ធភាពស្វ័យសិក្សា និងការសិក្សាពីចម្ងាយសម្រាប់សិស្សានុសិស្សគ្រប់រូបនាពេលបច្ចុប្បន្ន។
ចាប់ពីថ្ងៃទី២០ ខែមេសា ឆ្នាំ២០២០នេះតទៅ សិស្សានុសិស្សគ្រប់កម្រិតសិក្សា និងគ្រប់ភូមិសិក្សានៅទូទាំងព្រះរាជាណាចក្រកម្ពុជា នឹងអាចទស្សនាវីដេអូបង្រៀនតាមរយៈ៖
១.ទូរទស្សន៍ជាតិកម្ពុជាទី២ ទទក២ ឬ TVK 2 ដែលជាប៉ុស្តិ៍ទូរទស្សន៍ទើបបង្កើតថ្មី សម្រាប់បម្រើដល់ការផ្សព្វផ្សាយស្ដីពីការអប់រំ
២.ទូរទស្សន៍ផ្កាយរណបតេជោឌីធីវី Decho DTV ប៉ុស្តិ៍លេខ២២
៣.ទូរទស្សន៍ខ្សែកាបនៅទូទាំង២៥រាជធានី-ខេត្ត ដែលមានចំនួន៥៥ប៉ុស្តិ៍ថ្មីដែលផ្សាយបន្តពីទូរទស្សន៍ជាតិកម្ពុជា ទទក២ ឬTVK 2 (សូមមើលតារាងឧបសម្ព័ន្ធទី១នៃសេចក្ដីជូនដំណឹងនេះនូវឈ្មោះក្រុមហ៊ុនទូរទស្សន៍
ខ្សែកាប និងលេខប៉ុស្តិ៍ នៅតាមរាជធានី-ខេត្តនីមួយៗ)៕ដោយ៖កូឡាប