ខេត្តស្វាយរៀងៈ បុរសជាជនពិការម្នាក់ បានរងរបួសធ្ងន់ នៅក្នុងករណីគ្រោះថ្នាក់ចរាចរណ៍មួយ រវាងម៉ូតូនិងជនពិការជិះកង់រុញ បើកបរស្របទិសគ្នា ដែលហេតុការណ៍ខាងលើនេះ បានកើតឡើងនៅវេលាម៉ោង ១៨និង៥០នាទីព្រលប់ថ្ងៃទី១៩ ខែមេសា ឆ្នាំ២០២០ នៅត្រង់ចំណុចភូមិពោធិ៍ ឃុំមេសរថ្ងក ស្រុកចន្ទ្រា ខេត្តស្វាយរៀង។
សមត្ថកិច្ចបានឱ្យដឹងថា ជនបង្កមាន ឈ្មោះ ស៊ុំ សុផា ភេទប្រុស អាយុ៣៧ឆ្នាំ មានមុខរបរ ជាងសំណង់ មានទីលំនៅ ភូមិត្រពាំងផ្លុង សង្កាត់បាទី ក្រុងបាវិត បើកបរម៉ូតូ ម៉ាក LETS សេរី២០១៩ ពណ៌សផ្លាកលេខស្វាយរៀង ១Q ៦០៨០ មកដល់ត្រង់ចំណុចខាងលើក៏បានបុកតែម្តង។ ចំណែកជនរងគ្រោះមាន ឈ្មោះ ឆាំ វីរៈ ភេទប្រុស អាយុ ៣០ឆ្នាំ ជាជនពិការ មានទីលំនៅភូមិ ពោធិ៍ ឃុំមេសរថ្ងកស្រុកចន្ទ្រា ខេត្តស្វាយរៀង។
ប្រភពដដែលបានបន្តថាៈ មូលហេតុដោយសារ ឈ្មោះ ស៊ុំ សុផា បើកបរ មានជាតិស្រវឹងខ្វះការប្រុងប្រយ័ត្ន ហើយករណីគ្រោះថ្នាក់ចរាចរណ៍ នេះបណ្តាលឲ្យមនុស្ស រងរបួសធ្ងន់ម្នាក់ បាក់កំភូនជើងខាងស្តាំ និងផុងលលាដ៍ក្បាល ចំណែក ជនពិការ បច្ចុប្បន្នជនរងគ្រោះត្រូវបានសាច់ញ្ញាត បានបញ្ជូនទៅ ព្យាបាលនៅមន្ទីពេទ្យបង្អែកជីភូ រីឯមធ្យោបាយ បានយកមករក្សាទុកនៅ អធិការដ្ឋាននគរបាលស្រុកចន្ទ្រា ដើម្បីចាត់់ការបន្តទៅតាមផ្លូវច្បាប់ ៕ដោយ៖ វ៉ៃកូ
