ខេត្តស្វាយរៀង៖ ដើម្បីទប់ស្កាត់ការរីករាលដាលនៃជំងឺកូវីដ១៩ លោក តូច ប៉ូលីវ៉ា អភិបាលរងខេត្តស្វាយរៀង និង ជាអនុប្រធានគណៈកម្មាធិការខេត្តប្រយុទ្ធប្រឆាំងជំងឺកូវីដ១៩ បានចុះធ្វើ ការណែនាំប្រជាពលរដ្ឋ ក៏ដូចជាអាជីវករលក់ដូរ តាមផ្សារចូលរួមធ្វើអនាម័យជាប្រចាំ និងរៀបចំសណ្តាប់ធ្នាប់ឲ្យបានរបៀបរៀបរយ ដើម្បីក្លាយជាទីក្រុងស្អាត ។
ការថ្លែងបែបនេះ បានធ្វើឡើងកាលពីចុងសប្តាហ៍កន្លងទៅនេះ ក្នុងការចុះរៀបចំសណ្ដាប់ធ្នាប់ និងធ្វើអនាម័យ ក្នុងការចុះបាញ់ថ្នាំសម្លាប់មេរោគកូវីដ១៩ នៅជុំវិញផ្សារកំពង់ចកស្រុករំដួលខេត្តស្វាយរៀង ។
លោក អភិបាលរងខេត្ត បានមានប្រសាសន៍ថា បច្ចុប្បន្ន បើទោះបីជាខេត្តស្វាយរៀង មិនទាន់មានអ្នកឆ្លងជំងឺកូវីដ-១៩ ក៏ដោយក៏យើងទាំងអស់គ្នា បន្តយកចិត្តទុកដាក់បំផុត ពង្រឹងការអនុវត្តទាំងវិធានការការពារ និងវិធានការផ្សព្វផ្សាយអប់រំណែនាំ ដើម្បីបង្ការ ទប់ស្កាត់នូវការឆ្លងរាលដាល នៃជំងឺនេះ ហើយក្នុងកាលៈទេសៈ ដែលរាជរដ្ឋាភិបាលកម្ពុជា ក៏ដូចជាក្នុងខេត្តស្វាយរៀង កំពុងអនុវត្តវិធានការបង្ការ ទប់ស្កាត់ការឆ្លងរីករាលនៃជំងឺកូវីដ-១៩នេះ ។
លោកអភិបាលរង ក៏បានអំពាវនាវដល់បងប្អូនក្រុមអាជីវករលក់ដូរ ជុំវិញផ្សារទាំងអស់ ត្រូវចេះថែរក្សាសុខភាពជាធំ និងធ្វើអនាម័យជាប្រចាំឲ្យបានល្អ សម្រាប់ខ្លួនឯង និងសម្រាប់ក្រុមគ្រួសារ ហើយត្រូវចូលរួមទប់ស្កាត់ជំងឺឆ្លងនេះ ទាំងអស់គ្នាហើយបើមានការសង្ស័យណាមួយ សូមទំនាក់ទំនងជាបន្ទាន់មកកាន់មន្ទីរពេទ្យជំនាញ ដើម្បីទទួលបានការពិនិត្យពីក្រុមគ្រូពេទ្យជំនាញ ។ ជាចុងក្រោយសំណូមពរសូមឲ្យបងប្អូនប្រជាពលរដ្ឋ បន្តចូលរួមអនុវត្ត តាមការណែនាំរបស់ក្រសួងសុខាភិបាល និងសូមកុំធ្វេសប្រហែសឲ្យសោះ ព្រោះជំងឺកូវីដ១៩នេះ នៅតែជាបញ្ហាប្រឈមនៅឡើយទេ ៕ដោយ៖វ៉ៃកូ