ភ្នំពេញ៖ ក្នុងចំណោម កម្មករ កម្មការិនី ធ្វើការនៅភ្នំពេញ ប្រមាណ៣០០នាក់ មកពិនិត្យសុខភាពនិងសាកសួរព័ត៌មានបន្ថែម (ចត្តាឡីស័ក) គឺមាន២នាក់ មានការសង្ស័យថា បានឆ្លងមេរោគកូវីដ១៩។ នេះជាការជាបញ្ជាក់ឲ្យដឹង ពីឯកឧត្តម ហេង សួរ អ្នកនាំពាក្យក្រសួងការងារ បណ្តុះបណ្តាលវិជ្ជាជីវៈ ថ្លែងទៅកាន់ក្រុមអ្នកសារព័ត៌មាន នៅថ្ងៃទី២០ ខែមេសានេះ នៅតំបន់សេដ្ឋកិច្ចពិសេសភ្នំពេញ។
ឯកឧត្តម អ្នកនាំពាក្យ ឲ្យដឹងទៀតថា “ចំពោះអ្នកសង្ស័យ២នាក់នោះ គឺដឹកតាមរថយន្តសង្គ្រោះ ដើម្បីយកវត្ថុសំណាកទៅពិនិត្យនៅមន្ទីរពេទ្យ។ ចំពោះអ្នកដទៃទៀត ប្រមាណ៣០០នាក់ផ្សេងទៀត ពួកគាត់សម្រេចស្នាក់នៅដាច់ដោយឡែក នៅបន្ទប់ជួលរបស់ពួកគេ។
ឯកឧត្តម ហេង សួរ បានឲ្យដឹងថា នៅរាជធានីភ្នំពេញ ក្រសួងការងារ បានរៀបចំមណ្ឌលពិនិត្យសុខភាពបណ្តោះអាសន្ន ចំនួន១០កន្លែង គឺមាននៅតំបន់ផ្លូវវេងស្រេង ចំនួន៣កន្លែង, តំបន់ឧស្សាហ៍កម្មវឌ្ឍនៈ២កន្លែង, តំបន់សេដ្ឋកិច្ចពិសេសភ្នំពេញ១កន្លែង, វិទ្យាល័យជម្ពូវ័ន១កន្លែង, អនុវិទ្យាល័យដង្កោ១កន្លែង, វិទ្យាល័យឫស្សីកែវ១កន្លែង និងវិទ្យាល័យគោកបញ្ជាន់១ន្លែង”។
ឯកឧត្តមបញ្ជាក់ថា មានវិទ្យាល័យជម្ពូវ័ន វិទ្យាល័យឫស្សីកែវ និងវិទ្យាល័យគោកបញ្ជាន់ ជាទីតាំងសម្រាប់ដាក់ដាច់ដោយឡែក ប្រសិនបើកម្មករ កម្មការិនី ពួកសម្រេចចិត្តមកស្នាក់នៅដាច់ដោយឡែក នៅតាមសាលារៀន។
ចំពោះការដាក់ឲ្យស្នាក់នៅដាច់ដោយឡែក នៅតាមសាលារៀន គឺកម្មករ កម្មការិនី ទាំងអស់គ្នា សម្រេចចិត្តស្នាក់នៅដាច់ដោយឡែក នៅបន្ទប់ជួល ឬនៅផ្ទះរបស់ពួកគេផ្ទាល់តែម្តង ហើយពួកគេសន្យានឹងអនុវត្ត តាមការណែនាំរបស់ក្រុមគ្រូពេទ្យ៕ដោយ៖បញ្ញាស័ក្តិ