ភ្នំពេញ៖ ក្រសួងព័ត៌មាន បានចេញបំភ្លឺករណីអ្នកកាសែត ប្រើគោរមងារឯកឧត្តមនិងលោកជំទាវ។ ក្រសួងព័ត៌មានមានកិត្តិយសសូមជម្រាបសាធារណជន មេត្តាជ្រាបថា ជាគោលការក្រសួងព័ត៌មានមិនដែលបានប្រើប្រាស់គោរមងារ ក្នុងលិខិតអនុញាត ឬបណ្ណសារព័ត៌មានឡើយ។ ការចេញប័ណ្ណដែលដាក់គោរមងារជាឯកឧត្តម ឬលោកជំទាវ ដោយសាមីអង្គភាពឯកជន គឺជាការទទួលខុសត្រូវរបស់បុគ្គលម្ចាស់អង្គភាពនោះ។
ឯកឧត្តមរដ្ឋមន្ត្រី ខៀវ កាញារីទ្ធ រដ្ឋមន្ត្រី ក្រសួងព័ត៌មាន បានបញ្ជាក់ថា “ក្រសួងព័ត៌មានមិនមានការពាក់ព័ន្ធ ករណីអ្នកកាសែត ប្រើគោរមងារឯកឧត្តម និងលោកជំទាវ នោះទេ”។
នៅក្នុកិច្ចប្រជុំសាមញ្ញប្រចាំសប្តាហ៍ ថ្នាក់ដឹកនាំ ក្រសួងព័ត៌មាន នៅថ្ងៃទី២០ ខែមេសា ឆ្នាំ២០២០ ឯកឧត្តម ខៀវ កាញារីទ្ធ រដ្ឋមន្ត្រី ក្រសួងព័ត៌មានបានលើកឡើងថា មានអង្គភាពគេហទំព័រកសិករ ដែលបានដាក់ងាររបស់បុគ្គលិកខ្លួនឯង ងារជា ឯកឧត្តម លោកជំទាវ ធ្វើឲ្យមានការ យល់ច្រឡំថាក្រសួងព័ត៌មានជាអ្នកចេញប័ណ្ណ និងឋានៈនេះ ឲ្យអង្គភាពនោះ។
គួររំលឹកថា កាលពីថ្ងៃទី១៩ ខែមេសា មានការចែករំលែកនិងរិះគន់យ៉ាងច្រើនតាមបណ្តាញសង្គមហ្វេសប៊ុក ទៅលើអង្គភាពគេហទំព័រកសិករមានឈ្មោះថា www.famersparty.org ដែលមានលោក មាស ពៅ ជាម្ចាស់អាជីវកម្ម ដោយបានចេញកាតឲ្យបុគ្គលិកប្រើងារសុទ្ធតែឯកឧត្តម និងលោកជំទាវ។
ពាក់ពន្ធ័បញ្ហានេះ ឯកឧត្តមផុស សុវណ្ណ ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋានព័ត៌មាន និងសោតទស្សន៍នៃក្រសួងព័ត៌មាន បានបញ្ជាក់ថា ក្រសួងព័ត៌មាន បានចេញប័ណ្ណសារព័ត៌មាន មិនដែលភ្ជាប់ជាមួយ គោរមងារនោះទេ តែចាងហ្វាង គេហទំព័រនោះ ជាគណបក្សកសិករ ហើយក៏មិនដឹងថា គេបានងារជា ឯកឧត្តម លោកជំទាវ ពីណាដែរនោះទេ ។
នៅក្នុងសេចក្តីបំភ្លឺ របស់អគ្គនាយកដ្ឋានព័ត៌មាន និងសោតទស្សន៍នៃក្រសួងព័ត៌មានចេញផ្សាយនៅថ្ងៃទី២០ ខែមេសានេះ បានបញ្ជាក់ថា ជាគោលការណ៍ ក្រសួងព័ត៌មាន មិនដែលប្រើគោរមងារក្នុងលិខិតអនុញ្ញត ឬបណ្ណសារព័ត៌មាន ដែលចេញដោយអគ្គនាយកដ្ឋានព័ត៌មាន និងសោតទស្សន៍នោះទេ។ ដូច្នេះ ការចេញប័ណ្ណសម្គាល់ខ្លួន ឬប័ណ្ណព័ត៌មានដោយសាមីអង្គភាព គឺជាការទទួលខុសត្រូវរបស់អង្គភាពផ្ទាល់ មិនមានការពាក់ព័ន្ធជាមួយក្រសួងព័ត៌មានទេ៕
ដោយ៖កូឡាប