ភ្នំពេញ៖ អគ្គបណ្ឌិតសភាចារ្យ អូន ព័ន្ធមុនីរ័ត្ន បានថ្លែងប្រាប់ឯកអគ្គរដ្ឋទូត នៃសហភាពអឺរ៉ុបប្រចាំកម្ពុជាថា រាជរដ្ឋាភិបាលកម្ពុជា បានបង្កើតក្រុមការងារចំនួន ៤ ក្នុងការអនុវត្តវិធានការស្ដារ សេដ្ឋកិច្ច-សង្គម ពីផលប៉ះពាល់ នៃជំងឺកូវីដ-១៩ ដូចជា ក្រុមការងាចំពោះកិច្ចគ្រប់គ្រង់ ការផ្ដត់ផ្គង់ និងថ្លៃទំនិញយុទ្ធសាស្ដ្រ ក្នុងអំឡុងពេលនឹងជំងឺកូវីដ-១៩ និងក្រុម ការងារបច្ចេកទេសចម្រុះចំពោះកិច្ចសិក្សារៀបចំដាក់ចេញ នូវកញ្ចប់វិធានការខាងរូបិយវត្ថុ និងធនាគារ ដើម្បីគ្រប់គ្រង និង ដោះស្រាយ ផលប៉ះពាល់ពីការរីករាលដាល នៃជំងឺកូវីដ-១៩ និងការព្យួរប្រព័ន្ធអនុគ្រោះពន្ធ លើមុខទំនិញមួយចំនួន ក្នុងក្របខ័ណ្ឌ «ទំនិញគ្រប់យ៉ាងលើក លែងតែសព្វាវុធ (EBA)។
ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានទទួលជួបជាមួយលោកជំទាវ Carmen Moreno ឯកអគ្គរដ្ឋទូត នៃសហភាពអឺរ៉ុបប្រចាំកម្ពុជា តាមរយៈ Video Conference ដើម្បីពិភាក្សាអំពីតម្រូវការរបស់កម្ពុជា និងលទ្ធភាពនៃការចូលរួមរបស់សហភាពអឺរ៉ុបក្នុងការគាំទ្ររាជរដ្ឋាភិបាលកម្ពុជា ដើម្បីទប់ស្កាត់ និងប្រយុទ្ធប្រឆាំងនឹងការរាតត្បាតនៃជំងឺកូវីដ ១៩ និងស្ដារសម្បទាសេដ្ឋកិច្ចពីផលប៉ះពាល់នៃជំងឺនេះ,នាព្រឹកថ្ងៃទី ២០ ខែ មេសា ឆ្នាំ ២០២០ វេលាម៉ោង ១០:៣០ នាទី, នៅទីស្តីការក្រសួងសេដ្ឋកិច្ច និងហិរញ្ញវត្ថុ ។
ឯកឧត្តម អូន ព័ន្ធមុន្នីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានឲ្យដឹងថា សហភាពអឺរ៉ុប បានសហការក៏ល្អប្រសើរកន្លងមក ជាមួយនឹងរាជរដ្ឋាភិបាលកម្ពុជា ជាពិសេស ក្នុងកាលៈទេសៈបច្ចុប្បន្នដែលពិភពលោកក៏ដូចជាកម្ពុជា កំពុងប្រឈម និងប្រយុទ្ធដោះស្រាយចំពោះវិបត្តិសាកលដោយសារជំងឺកូវីដ១៩ ។ កម្ពុជា បាននិងកំពុងគ្រប់គ្រងលើបញ្ហានៃជំងឺកូវីដ១៩ បានល្អប្រសើរ ប៉ុន្តែកម្ពុជា នៅតែមិនបន្ធូរដៃនោះទេ និងរឹតតែបុរេសកម្ម និងសកម្មកាន់តែខ្លាំងថែមទៀត ដោយបានបង្កើននូវយន្តការ និងដាក់ចេញនូវវិធានការជាយុទ្ធសាស្ត្រមុតស្រួច ទាំងលើសមរភូមិក្នុងការប្រយុទ្ធប្រឆាំងការរាតត្បាតកូវីដ១៩ និងលើការដ្ឋានស្តារសម្បទាសេដ្ឋកិច្ច សង្គមឡើងវិញ បន្ទាប់ពីរងផលប៉ះពាល់ពីជំងឺនេះ។ ជំងឺកូវីដ១៩ មិនត្រឹមតែជាវិបត្តិសុខភាពសាធារណៈទេ តែជំងឺនេះ ក៏បានបង្កផលប៉ះពាល់ដល់វិស័យសេដ្ឋកិច្ចផ្សេងៗ រួមមាន វិស័យកាត់ដេរ ទេសចរណ៍ ធុរកិច្ចខ្នាតតូច និងមធ្យមទៀតផង។
លោកជំទាវ មានថ្លែងកោតសរសើរ និងវាយតម្លៃខ្ពស់ ចំពោះជោគជ័យ របស់រាជរដ្ឋាភិបាល ក្នុងការគ្រប់គ្រងបញ្ហាវិបត្តិ នៃជំងឺកូវីដ-១៩ នេះ និងបានថ្លែងបញ្ជាក់ អំពីជំហរគាំទ្រ យ៉ាងពេញទំហឹងរបស់ សហភាពអឺរ៉ុប ក្នុងការចូលរួមចំណែកគាំទ្រ រាជរដ្ឋាភិបាលកម្ពុជា ក្នុងការស្ការសម្បទាសេដ្ឋកិច្ច-សង្គម ដែលរងផលប៉ះពាល់ នៃជំងឺវិបត្តិ នៃជំងឺកូវីដ-១៩នេះ។
លោកជំទាវ បានថ្លែងថា សហភាពអឺរ៉ុបដែលមានទីស្នាក់ការកណ្ដាល នៅ Brussel ទើបតែបានអនុម័ត អនុញ្ញាត ឲ្យបង្វែរហិរញ្ញប្បទានឥតសំណង សរុបចំនួន៥៦លានអីរ៉ូ ពី កម្មវិធីកំពុងដំណើរការ មួយចំនួនដែលជាហិរញ្ញ ប្បទានដោយសហភាពអឺរ៉ុប សម្រាប់យកមកគាំពារសង្គម ដែលការងារអាទិភាព និងបន្ទាន់ របស់រាជរដ្ឋាភិបាល ក្នុងការស្ការ សម្បទារសេដ្ឋកិច្ច-សង្គម ឡើងវិញពីវិបត្តិ នៃជំងឺ កូវីដ-១៩។
ឯកឧត្តម អូន ព័ន្ធមុនីរ័ត្ន បានថ្លែងអំណរគុណចំពោះ កិច្ចសហប្រតិបត្តិការ រឹងមាំកន្លងមក របស់សហភាពអឺរ៉ុបជាមួយកម្ពុជា ជាពិសេស ស្វាគមន៍ ចំពោះការចូលរួមចំណែក នៅក្នុងគ្រាដ៏លំបាកនេះ ។
ឯកឧត្តម បានគូសបញ្ជាក់ឡើងវិញថា ក្នុងការអនុវត្តវិធានការស្ដារ សេដ្ឋកិច្ច-សង្គម ពីផលប៉ះពាល់ នៃជំងឺកូវីដ-១៩ រាជរដ្ឋាភិបាលកម្ពុជា បានបង្កើតក្រុមការងារចំនួន ៤ រួមមាន ៖ ទី១-ក្រុមការងាចំពោះកិច្ចគ្រប់គ្រង់ ការផ្ដត់ផ្គង់ និងថ្លៃទំនិញយុទ្ធសាស្ដ្រក្នុងអំឡុង ពេលនឹងជំងឺកូវីដ-១៩ ,ទី២-ក្រុមការងារចំពោះកិច្ចរៀបចំ និងគ្រប់គ្រងយន្ដការជំនួយសង្គម ក្នុងអំឡុងពេលប្រយុទ្ធនឹងជំងឺកូវីដ-១៩ ,ទី៣-ក្រុមការងារ ចំពោះកិច្ចរៀបចំគោលនយោបាយ ថវិកា ហិរញ្ញប្បទាន និងជំនួយសង្គម ដើម្បីគ្រប់គ្រងការប្រយុទ្ធនឹងជំងឺកូវីដ-១៩ និងទី៤-ក្រុម ការងារបច្ចេកទេសចម្រុះចំពោះកិច្ចសិក្សារៀបចំដាក់ចេញ នូវកញ្ចប់វិធានការខាងរូបិយវត្ថុ និងធនាគារ ដើម្បីគ្រប់គ្រង និង ដោះស្រាយ ផលប៉ះពាល់ពីការរីករាលដាល នៃជំងឺកូវីដ-១៩ និងការព្យួរប្រព័ន្ធអនុគ្រោះពន្ធ លើមុខទំនិញមួយចំនួន ក្នុងក្របខ័ណ្ឌ ទំនិញគ្រប់យ៉ាងលើក លែងតែសព្វាវុធ (EBA)៕ ដោយ ៖ កូឡាប
