កាលពីថ្ងៃទី១៩ ខែមេសាឆ្នាំ២០២០ ស្ត្រីជនជាតិខ្មែរម្នាក់ មានឈ្មោះថា អ៊ុំ សុភី រស់នៅប្រទេសអាល្លឺម៉ង់ បានទទួលមរណភាព ដោយសារឆ្លងជំងឺកូវីដ១៩ ។
នេះបើយោងតាមគណនីហ្វេសប៊ុក Sreyneang Pheun ដែលជាអ្នករស់នៅអាល្លឺម៉ង់ដូចគ្នា បានបង្ហោះឲ្យដឹងថា៖ “ថ្ងៃនេះ ប្អូនស្រី Sophy Um រស់នៅប្រទេសអាល្លឺម៉ង់ បានទទួលមរណភាព ដោយសារការឆ្លងនៃមេរោគ COVID-19 ឬ Corona Virus ។ ក្នុងនាមខ្ញុំជាប្រជាពលរដ្ឋខ្មែរម្នាក់ រស់នៅប្រទេសអាល្លឺម៉ង់ដូចគ្នា ខ្ញុំសូមចូលរួមរំលែកទុក្ខយ៉ាងក្រៀមក្រំបំផុត ដល់ក្រុមគ្រួសារសពប្អូនស្រី និងសូមឲ្យដូងវិញ្ញាណក្ខន្ធប្អូនស្រី បានទៅដល់ឋានសុគតិភព កើតជាតិណាៗ សូមឲ្យប្អូនស្រីមានសំណាងល្អ និងអាយុវែងៗ”។
ទន្ទឹមនេះផងដែរ ឃើញថាមានបងប្អូនខ្មែរយ៉ាងច្រើន ជាអ្នកប្រើប្រាស់បណ្តាញសង្គម បានចូលរួមសោកស្តាយ និងសម្តែងនូវការកាន់ទុក្ខគ្រប់ៗគ្នា ចំពោះគ្រួសារនៃសពផងដែរ ៕ ដោយ៖ លឹម ហុង