ភ្នំពេញ៖ អភិបាលរាជធានីភ្នំពេញ បានណែនាំឲ្យអាជ្ញាធរខណ្ឌទាំង១៤ ធ្វើយ៉ាងណាផ្ដល់សេវាជូនប្រជាពលរដ្ឋឲ្យបានល្អប្រសើរ លើការស្នើសុំសេវាចុះបញ្ជីផ្ទេរកម្មសិទ្ធិអចលនទ្រព្យ។
នារសៀលថ្ងៃចន្ទ ទី២០ ខែមេសា ឆ្នាំ២០២០នេះ រដ្ឋបាលរាជធានីភ្នំពេញ បានបើកកិច្ចប្រជុំស្ដីពីបែបបទ នៃការបញ្ជូនឯកសារស្នើសុំសេវាចុះបញ្ជីផ្ទេរកម្មសិទ្ធិអចលនទ្រព្យ ក្នុងភូមិសាស្ត្រខណ្ឌទាំង១៤ រាជធានីភ្នំពេញ។
ឯកឧត្តម ឃួង ស្រេង បានមានប្រសាសន៍ថា ក្នុងនាមអាជ្ញាធរខណ្ឌ និងភូមិបាលខណ្ឌ ត្រូវតែយកចិត្តទុកដាក់ នៃការផ្តល់សេវាជូនប្រជាពលរដ្ឋ លើការផ្ដល់សេវាសុរិយោដី ។ ថ្នាក់ជាតិ មានការកែសម្រួលជាច្រើន រហូតទៅដល់រដ្ឋមន្ត្រីក្រសួងដែនដីនគរូបនីយកម្ម និងសំណង់ បានធ្វើការកែសម្រួលមួយចំនួនផងដែរ។ ប៉ុន្តែកិច្ចការងារនេះ នៅតែមិនទាន់បានល្អប្រសើរនៅឡើយ ដូច្នេះទើបរាជរដ្ឋាភិបាល សម្រេចផ្ទេរមុខងារនេះ មកថ្នាក់ក្រោមជាតិ ដើម្បីធ្វើយ៉ាងណាផ្ដល់សេវាជូនប្រជាពលរដ្ឋឲ្យកាន់តែល្អប្រសើរ។
ឯកឧត្តម បានបន្តថា “ការផ្ដល់សេវាជូនប្រជាពលរដ្ឋ កន្លងមកនេះឃើញថា បានល្អប្រសើរហើយ ប៉ុន្តែយើងនៅតែខ្វះខាត ទៅនឹងអ្វីដែលជាការណែនាំរបស់ក្រសួងដែនដី។ ការផ្ទេរមុខងារមកថ្នាក់ក្រោមជាតិនេះ គឺធ្វើយ៉ាងណាឲ្យ ការសេវាផ្ដល់សេវាជូនប្រជាពលរដ្ឋមានប្រសិទ្ធភាព មានតម្លាភាព និងមានល្បឿនលឿន។ អភិបាលខណ្ឌទាំងអស់ ត្រូវយកចិត្តទុកដាក់ ហើយនៅពេលខាងមុខនេះ សេវាសុខាភិបាល និងបន្ថែមមួយទៀត មកថ្នាក់ក្រោមជាតិ
ដែលយើងត្រូវតែទទួល និងអនុវត្តឲ្យបានជោគជ័យ។ ការងារនេះ ទទួលបានជោគជ័យ លុះត្រាតែអភិបាលខណ្ឌទាំងអស់ យកចិត្តទុកដាក់ ពិនិត្យ ទៅថ្នាក់សង្កាត់នៅក្នុងដែនសមត្ថកិច្ចរបស់ខ្លួន ដើម្បីជំរុញ ការងារនេះឲ្យបានល្អប្រសើរ”។
ឯកឧត្តម បានបន្ថែមទៀតថា កន្លងមកយើងអនុវត្តបានល្អប្រសើរហើយ ពិសេសគឺការបង្កើតឲ្យមានក្រុមបដិសណ្ឋារកិច្ច នៅថ្នាក់សង្កាត់ ដើម្បីផ្ដល់សេវាជូនប្រជាពលរដ្ឋ កាត់បន្ថយការថ្នាំងថ្នាក់ពីប្រជាពលរដ្ឋដែលថា “ចង់ជួបចៅសង្កាត់ពិបាកជាងជួបរដ្ឋមន្ត្រី” ពាក្យទាំងនេះ បានសាបរលាបទៅបាត់ហើយ។ ក្នុងនាមអាជ្ញាធរនៅថ្នាក់ក្រោមជាតិ
យើងត្រូវត្រៀមលក្ខណៈឲ្យហើយទៅ នៅថ្ងៃខាងមុខ សង្កាត់នឹងមានច្រកចេញ ចូលតែមួយដែរ ហើយ ហើយវាក៏ជិតនឹងដល់ពេលបោះឆ្នោត ថ្នាក់សង្កាត់នៅឆ្នាំ២០២២ផងដែរ ។ ការកែទម្រង់បើមិនបានល្អទេ គេមិនធ្វើការកែទម្រង់នោះទេ។ ដូច្នេះទេយើងត្រូវតែហ្មត់ចត់ ហើយអ្វីដែលខុសត្រូវតែកែឲ្យហើយទៅ កុំឱ្យគេធ្វើអធិការកិច្ចទាន់។
គួរបញ្ជាក់ផងដែរថា ដើម្បីធានានិរន្តរភាព និងប្រក្រតីភាព នៃការងាររដ្ឋបាល និងការផ្ដល់សេវាសាធារណៈ ក្នុងដំណើរការរៀបចំរចនាសម្ព័ន្ធថ្មី នៃរដ្ឋបាលខណ្ឌដើម្បីធានានូវប្រសិទ្ធភាព ស័ក្តិសិទ្ធិភាព ក៏ដូចពន្លឿននីតិវិធី និងរយៈពេលនៃការផ្ដល់សេវា ចុះបញ្ជីផ្ទេរកម្មសិទ្ធិអចលនទ្រព្យ សំដៅជួយសម្រួលជីវភាព រស់នៅប្រចាំថ្ងៃរបស់ប្រជាពលរដ្ឋ ក៏ដូចជាបញ្ចៀសបាននូវការថ្នាំងថ្នាក់ ពីប្រជាពលរដ្ឋ អំពីបញ្ហាសេវានោះ រដ្ឋបាលរាជធានីភ្នំពេញ បានធ្វើការណែនាំឱ្យអភិបាលខណ្ឌទាំង ១៤ អនុវត្តខ្លឹមសារ នៃក្របខ័ណ្ឌកែទម្រង់វិមជ្ឈការ និងសហវិមជ្ឈការ រាជរដ្ឋាភិបាលតាមរយៈក្រសួងមហាផ្ទៃ ដែលក្នុងនោះ មានចំណុចមួយ បានបញ្ជាក់យ៉ាងច្បាស់ ពីការប្រគល់សិទ្ធិក្នុងការចុះហត្ថលេខាតាមបញ្ជា (ត.ប)អភិបាលនៃគណៈអភិបាលខណ្ឌសាមី ជូនប្រធានការិយាល័យរៀបចំដែនដីនគរូបនីយកម្ម និងសំណង់ និងភូមិបាលខណ្ឌ ដោយប្រើប្រាស់ត្រារបស់ការរិយាល័យផ្ទាល់ ក្រោយពីមានការបញ្ជាក់ស្នាមមេដៃពី ចៅសង្កាត់ក្នុងសំណុំឯកសារចុះបញ្ជីផ្ទេរកម្មសិទ្ធិ រួចត្រូវធ្វើដីកាបញ្ជូនផ្ទាល់ទៅមន្ទីរដែនដីនគរូបនីយកម្មសំណង់ និងសុរិយោដីរាជធានីភ្នំពេញ តាមនីតិវិធីនិងលិខិតបទដ្ឋានគតិយុត្តជាធរមាន៕ដោយ៖កូឡាប