ភ្នំពេញ៖ ក្រសួងមហាផ្ទៃ បានអនុញ្ញាត្តឲ្យ គណបក្សឯកភាពជាតិខ្មែរ បង្កើតជាផ្លូវការ ដោយមានឈ្មោះសរសេរជាអក្សរកាត់ “គ.ឯ.ជខ” និងមានអាសយដ្ឋាន នៃទីស្នាក់ការកណ្ដាលតាំងនៅផ្ទះលេខ A០៨៦ ភូមិសាលាឃុំ ឃុំពពេល ស្រុកបរិបូណ៍ ខេត្តកំពង់ឆ្នាំង ដែលមានលោក ញឹម សុធន ជាតំណាងស្ថាបនិគណបក្ស ។
ក្រសួងមហាផ្ទៃ បានចេញសេចក្ដីជូនដំណឹងនៅថ្ងៃទី២១ ខែមេសា ឆ្នាំ២០២០ នេះថា ក្រសួងមហាផ្ទៃ អនុញ្ញាតឲ្យ គណបក្សឯកភាពជាតិខ្មែរ ដំណើរការជាផ្លូវការ ឈ្មោះសរសេរជាអក្សរកាត់ “គ.ឯ.ជខ” មានឈ្មោះជាអក្សរឡាតាំងថា “EKPHEAP CHEAT KHMER PARTY” សរសេរ ជាអក្សរកាត់ “E.C.K.P” និងមានអាសយដ្ឋាននៃទីស្នាក់ការកណ្ដាលតាំងនៅផ្ទះលេខ A០៨៦ ភូមិសាលាឃុំ ឃុំពពេល ស្រុកបរិបូណ៍ ខេត្តកំពង់ឆ្នាំង ស្របតាមបទប្បញ្ញត្តិមាត្រា៩ ត្រង់វាក្យខណ្ឌទី១ នៃច្បាប់ស្ដីពី គណបក្សនយោបាយ។
សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានចុះហត្ថលេខាលើសេចក្តីជូនដំណឹងនេះ ដើម្បីទទួលបានសុពលភាព និងអាចធ្វើសកម្មភាពស្របតាមច្បាប់ ស្ដីពី គណបក្សនយោបាយ គណបក្សឯកភាពជាតិខ្មែរ ត្រូវស្នើសុំចុះបញ្ជីនៅក្រសួងមហាផ្ទៃ ស្របតាមមាត្រា៩ ត្រង់វាក្យខណ្ឌទី២ មាត្រា១៨ថ្មី មាត្រា១៩ថ្មី និងមាត្រា២០ នៃច្បាប់ ស្ដីពី គណបក្សនយោបាយ៕ដោយ៖បញ្ញាស័ក្តិ
