ភ្នំពេញ៖ ស្នងការដ្ឋាននគរបាលរាជធានីភ្នំពេញ នៅថ្ងៃទី២១ខែមេសាឆ្នាំ២០២០នេះ បានឲ្យដឹងថា សេចក្តីបកស្រាយបំភ្លឺ និងបដិសេធទាំងស្រុងរបស់ក្រុមព័ត៌មាន និងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ ក្នុងការបង្ក្រាបករណីជួញដូរ និងប្រើប្រាស់គ្រឿងញៀនបានជាច្រើនករណីក្នុងឆ្នាំ២០១៩ ក៏ដូចជាការបង្ក្រាបជាច្រើនករណីនៅដើមឆ្នាំ២០២០នេ។
ស្នងការដ្ឋាននគរបាលរាជធានីភ្នំពេញ សូមធ្វើការបកស្រាយបំភ្លឺ និងបដិសេធទាំងស្រុង ចំពោះគណនីហ្វេសប៊ុកមួយដែលមានឈ្មោះថា អធិរាជ មហាសាច់ ដែលបានធ្វើការឡាយវីដេអូបំភ្លើស ខុសពីការពិតទាំងស្រុង ក្នុងគោលបំណងបង្ខូចកិត្តិយសរបស់សមត្ថកិច្ច និងស្ថាប័នពាក់ព័ន្ធមួយចំនួន ស្របពេលដែលកម្លាំងជំនាញប្រឆាំងគ្រឿងញៀន នៃស្នងការដ្ឋាននគរបាលរាជធានីភ្នំពេញ ក៏ដូចជាកម្លាំងជំនាញ តាមអធិការដ្ឋាននគរបាលខណ្ឌទាំង១៤ ដែលតែងតែខិតខំជាប្រចាំមិនថាយប់ ឬថ្ងៃ ក្នុងការបង្ក្រាបករណីជួញដូរ និងប្រើប្រាស់គ្រឿងញៀនបានជាច្រើនករណីក្នុងឆ្នាំ២០១៩ ក៏ដូចជាការបង្ក្រាបជាច្រើនករណីនៅដើមឆ្នាំ២០២០នេះ ដោយបានចុះធ្វើរដ្ឋបាល និងចុះបង្ក្រាបបានមនុស្សជាច្រើនពាក់ព័ន្ធនឹងការប្រើប្រាស់ ក៏ដូចជាការជួញដូរដោយខុសច្បាប់នូវសារធាតុញៀន នៅតាមក្លឹបកំសាន្តធំៗជាច្រើនកន្លែង និងក្នុងតំបន់ជាច្រើនតាមបណ្តាខណ្ឌនានា ។
មិនដូចជាហ្វេសបុកឈ្មោះ អធិរាជមហាសាច់ ដែលបានចុះផ្សាយថាសមត្ថកិច្ចចាប់តែអ្នកប្រើប្រាស់ ចាប់តែអ្នកទិញ មិនចាប់អ្នកលក់ …។
ជាពិសេសការផុសនេះគឺផ្តើមចេញពីសមត្ថកិច្ចធ្វើការចាប់ឃាត់ខ្លួនអ្នកកាសែតម្នាក់ រហស្សនាម ខ្លា ស ជាមួយនិងភស្តុតាងគ្រឿងញៀនមួយកញ្ចប់ នៅក្នុងកាបូប ហើយអ្នកកាសែតនោះក៏បានសារភាពថាខ្លួនបានប្រើក្មេងម្នាក់ទៅទិញមែន ទើបសមត្ថកិច្ចធ្វើការឃាត់ខ្លួន ដើម្បីយកមកអនុវត្តបន្តតាមនីតិវិធីច្បាប់ ។
បើបុគ្គលរូបនេះ នៅតែនិយាយបំភ្លើស ដោយមើលងាយមកលើក្រសួងមហាផ្ទៃ សមត្ថកិច្ចពាក់ព័ន្ធដោយគ្មានការពិតទៀតនោះ សមត្ថកិច្ចនៃស្នងការដ្ឋាននគរបាលរាជធានីភ្នំពេញ នឹងចាត់វិធានការណ៍តាមផ្លូវច្បាប់ ។
រូបភាពជាច្រើន បានបង្ហាញឲ្យឃើញថា សមត្ថកិច្ចនៃស្នងការដ្ឋាននគរបាលរាជធានីភ្នំពេញ បានខិតខំយ៉ាងខ្លាំងក្នុងការបង្ក្រាបទាំងទីតាំងចែកចាយធំៗ ចាប់បានអ្នកជួញដូរជាច្រើនាក់បញ្ជូនទៅតុលាការ ក៏ដូចជាការចាប់បានអ្នកប្រើប្រាស់សារធាតុញៀនជាច្រើនទៀតផង ៕ដោយ៖កូឡាប