ខេត្តកណ្តាល៖ សមត្ថកិច្ចនគរបាលស្រុកស្អាង សហការជាមួយនគរបាលប៉ុស្តិ៍រដ្ឋបាលត្រើយស្លា បានចាប់ខ្លួនជនសង្ស័យ២នាក់ដែលលួចដាំកញ្ឆា ។ បន្ទាប់ពីចាប់ខ្លួន សមត្ថកិច្ច បានដកនិងរឹបអូសដើមកញ្ឆាស្រស់ចំនួន១១៥ដើម។ ជនសង្ស័យ បានលួចលាក់ដាំដំណាំកញ្ឆានៅក្នុងចម្ការត្រាវមួយ ត្រង់ចំណុចចុងព្រែកយូហ៊ឹង ស្ថិតក្នុងភូមិពោធិ៍ក្រោម ឃុំត្រើយស្លា ស្រុកស្អាង ហើយប្រតិបត្តិការបង្ក្រាបធ្វើឡើង កាលពីព្រឹក ថ្ងៃអង្គារ ទី២១ខែមេសាឆ្នាំ២០២០ ។
លោកវរសេនីយ៍ត្រី ពុយ ទ្រី នាយប៉ុស្តិ៍នគរបាលរដ្ឋបាលត្រើយស្លា បានឲ្យដឹងថា៖ ជនសង្ស័យ២នាក់ ដែលចាប់ខ្លួនឈ្មោះ ហេង ហុកសេង ភេទប្រុស អាយុ៦០ឆ្នាំ មុខរបរ កសិករ លួចលាក់ដាំដើមកញ្ឆានិងកញ្ឆុងចំនួន១៧ដើម និងឈ្មោះ ឌឿ ឡេង ភេទប្រុស អាយុ៥៤ឆ្នាំ មុខរបរ កសិករ លួចលាក់ដាំដើមកញ្ឆានិងកញ្ឆុងចំនួន៩៨ដើម ពួកគេមានទីលំនៅភូមិពោធិ៍ក្រោម ឃុំត្រើយស្លា ស្រុកស្អាង ។
លោកនាយប៉ុស្តិ៍បានបន្តថា បន្ទាប់ពីទទួលបានព័ត៌មានពីប្រជាពលរដ្ឋរស់នៅភូមិពោធិ៍ក្រោម ឃុំត្រើយស្លា ថានៅត្រង់ចំណុចចុងព្រែកយូហ៊ឹងមានគេលួចលាក់ដាំដំណាំកញ្ឆា នៅក្នុងចម្ការត្រាវរួចមក លោកបានរាយការណ៍ ជូនលោកអធិការនគរបាលស្រុកស្នើសុំកម្លាំងសហការ ដើម្បីចុះធ្វើការបង្ក្រាជាក់ស្តែង រហូតឈានដល់ឃាត់ខ្លួនជនសង្ស័យជាម្ចាស់កញ្ឆា និងធ្វើការដកហូតវត្ថុតាងដើមកញ្ឆាស្រស់ចំនួនសរុប១១៥ដើមធំៗ បញ្ជូនទៅកាន់អធិការដ្ឋាននគរបាលស្រុកស្អាង ដើម្បីចាត់ការតាមច្បាប់ ៕ដោយ៖កូឡាប
