ភ្នំពេញ៖ លោកជំទាវហ៊ុន ស៊ីណាត បានសរសេរសំណេរបង្ហោះលើបណ្ដាញសង្គមហ្វេសប៊ុកផ្លូវការរបស់លោកជំទាវកាលពីថ្ងៃទី 12 ខែមេសាឆ្នាំ 2020 ដែលមានខ្លឹមសារថា ២;៣ថ្ងៃកន្លងមកនេះខ្ញុំឃើញសំណេរនៅលើគណនីfacebook មួយចំនួនតូចបានបង្ហោះរបៀបវ៉ៃប្រហារទៅលើកក្រុមគ្រួសារក្មួយសុវណ្ណ សុខាទាំងលាបពណ៌ថាមាននិន្នាការបក្សប្រឆាំងពោលក្រោយពីកូនប្រុសរបស់គាត់ឈ្មោះសុវណ្ណ រិទ្ធីត្រូវបានតុលាការដាក់ឃុំខ្លួននៅពន្ធនាគារ ។
ពាក់ព័ន្ធដឹងសំណេររបស់លោកជំទាវខាងលើនេះគឺលោកជំទាវបានសរសេររៀបរាប់ពីប្រវត្តិខ្លះរបស់ឈ្មោះសុវណ្ណសុខាដែលលោកជំទាវបានធ្លាប់ដឹងកាលពីមុននៅលើបណ្ដាញសង្គមហ្វេសប៊ុកក៏ស្រាប់តែអ្នកសារព័ត៌មាននិងបុគ្គលមួយចំនួនបានយកខ្លឹមសារនៃសំណេរនេះទៅបកស្រាយថាលោកជំទាវគាំទ្រទៅលើសកម្មភាពខុសច្បាប់របស់ឈ្មោះសុវណ្ណរិទ្ធីទៅវិញ។
លោកជំទាវបានលើកឡើងទៀតថា ន័យដែលនាងខ្ញុំបានសរសេររៀបរាប់ខាងលើគឺមិនមែនធ្វើឡើងក្នុងន័យដើម្បីដាក់សម្ពាធទៅលើប្រព័ន្ធតុលាការឬក៏លូកលាន់ក្នុងចំណាត់ការរបស់តុលាការពាក់ព័ន្ធនឹងការឃុំខ្លួនឈ្មោះសុវណ្ណរិទ្ធីដើម្បីទទួលបានការបន្ធូរបន្ថយឬការលើកលែងទោសលើឈ្មោះសុវណ្ណរិទ្ធីទេហើយការសរសេរនេះក៏មិនមែនធ្វើឡើងក្នុងន័យដើម្បីប្រឆាំងនឹងចំណាត់ការរបស់រាជរដ្ឋាភិបាលនោះឡើយ។
លោកជំទាវបានសូមឲ្យសាធារណជនទាំងអស់មេត្តាឈប់មានការភាន់ ច្រឡំមកលើរូបលោកជំទាវតទៅទៀតជាពិសេសសូមឱ្យអ្នកសារព័ត៌មាននិងបុគ្គលមួយចំនួនបញ្ឈប់ជាបន្ទាន់នូវការយកសំណេររបស់លោកជំទាវខាងលើទៅធ្វើការបកស្រាយក្នុងន័យអ្វីផ្សេងទៀតដែលអាចឲ្យសាធារណជនកាន់តែមានការភាន់ច្រឡំលើលោកជំទាវ ហើយលោកជំទាវក៏ប្រកាសបដិសេធចោលទាំងស្រុងនូវរាល់ការបកស្រាយទាំងឡាយណាដែលផ្ទុយនឹងខ្លឹមសារបំភ្លឺ ។ លោកជំទាវហ៊ុនស៊ីណាតក៏បានលើកឡើងទៀតថាប្រសិនបើអ្នកសារព័ត៌មានឬបុគ្គលណាមួយនៅតែបន្តយកសំណេររបស់លោកជំទាវខាងលើទៅធ្វើការបកស្រាយប្រាស់ចាកពីអត្ថន័យដែលលោកជំទាវបានបំភ្លឺនោះលោកជំទាវស្នើសុំឲ្យអាជ្ញាធរមានសមត្ថកិច្ចមានចំណាត់ការផ្លូវច្បាប់ជាបន្ទាន់ទៅលើអ្នកសារព័ត៌មាននិងបុគ្គលទាំងនោះ។
ចំណែកលោកឧកញ៉ាហេង ឡុង ក៏បានលើកឡើងផងដែរថាខ្ញុំជឿជាក់លើសម្ដេចតេជោលោកតែងតែមានចិត្តសណ្តោសប្រណីដល់កូនចៅគ្រប់កាលៈទេសៈនេះជាបទពិសោធន៍របស់ប្អូន សិទ្ធិក្នុងការបញ្ចេញមតិមិនអាចប៉ះពាល់ដល់សិទ្ធិអ្នកដទៃបានឡើយ!
បងនឹកប្អូន!។
សូមបញ្ជាក់ថា កាលពីថ្ងៃទី 12 ខែមេសាឆ្នាំ 2020 លោកជំទាវហ៊ុនស៊ីណាតបានសរសេរសារនៅលើហ្វេសប៊ុកផ្លូវការថា២;៣ថ្ងៃកន្លងមកនេះខ្ញុំឃើញសំណេរនៅលើគណនីfacebook មួយចំនួនតូចបានបង្ហោះរបៀបវ៉ៃប្រហារទៅលើកក្រុមគ្រួសារក្មួយសុវណ្ណ សុខាទាំងលាបពណ៌ថាមាននិន្នាការបក្សប្រឆាំងពោលក្រោយពីកូនប្រុសរបស់គាត់ឈ្មោះសុវណ្ណ រិទ្ធីត្រូវបានតុលាការដាក់ឃុំខ្លួននៅពន្ធនាគារ ។
ខ្ញុំយល់ឃើញថាសំណេរអស់លោកមួយចំនួននៅលើបណ្តាញសង្គម មានចេតនា ឈ្នានិស ជាន់ពន្លិច លាបពណ៌ ក្រុមគ្រួសារគាត់ធ្វើឲ្យ ថ្នាក់ដឹកនាំនិងមហាជនមានការភាន់ ច្រឡំពោលគឺសរសេរខុសការពិតទាំងស្រុងតែម្តង យូរហើយមិនលើកមកនិយាយដល់គ្នាមានទុក្ខជាន់ពន្លិចអៃអើថែមទៀត ។
ក្រុមគ្រួសារគាត់មិនឆ្លើយតបទេចំពោះការសរសេរខុសការពិតបែបនេះ ដូច្នេះខ្ញុំចង់ប្រាប់អស់លោកដែលសរសេរទាំងអស់ថាខ្ញុំស្គាល់សុវណ្ណ សុខា នៅអំឡុងឆ្នាំ១៩៩៤ទៅ ១៩៩៥ គាត់បម្រើការភ្នាក់ងារឲ្យកាសែតកោះសន្តិភាព។ បន្ទាប់មកក៏ឈប់ពីភ្នាក់ងារកាសែតកោះសន្តិភាពទៅធ្វើការក្រៅម៉ោងឲ្យកាសែតមនសិការខ្មែរ រួចក៏ធ្លាប់ទៅធ្វើការនៅវិទ្យុភ្លើងទៀន ស៊ីប្រាក់ខែក្រៅម៉ោងតែប៉ុណ្ណោះ។ខ្ញុំគិតថាគាត់មិនមែនជាសមាជិកឬសកម្មជនរបស់គណបក្សសមរង្ស៉ីស្អីនោះទេ ក្រោយមកឃើញគាត់ក៏បានលាឈប់ រហូតត្រូវបានតែងតាំងជាទីប្រឹក្សាក្រសួងព័ត៌មាន បានមួយអណត្តិផងដែរ។
បន្ទាប់ពីចប់អណត្តិឃើញគាត់ទៅធ្វើបម្រើការនៅកាសែតកោះសន្តិភាពម្តងទៀត និងទូរទស្សន៍អាស៊ីអាគ្នេយ៍ផង។ ចំពោះកូនប្រុសរបស់គាត់ សុវណ្ណ រិទ្ធីកាលនោះឪពុកនៅធ្វើការនៅវិទ្យុភ្លើងទៀន ស៊ីប្រាក់ខែក្រៅម៉ោងនោះ គាត់នៅក្មេងអាយុប្រហែល១០ឆ្នាំនៅឡេីយ ។ អ្វីសំខាន់នោះកូនប្រុសរបស់គាត់សុវណ្ណ រិទ្ធីមិនមែនជាសមាជិកឬសកម្មជនគណប្សសមរង្ស៊ីដូចអស់លោកចោទប្រកាន់នោះទេ ។ ខ្ញុំឃើញសុវណ្ណ រិទ្ធីនិងប្អូនៗបានធ្វើការនៅទូរទស្សន៍ CNC ជាច្រើនឆ្នាំផងដែរ ចំណែកប្រពន្ធគាត់ឈ្មោះគឹម សុធា ហៅលីណា មានអាយុជាង៤០ឆ្នាំ ពេលដែល សុវណ្ណ សុខា នៅធ្វើការនៅវិទ្យុភ្លើងទៀនក្មេងនេះនៅជាមេផ្ទះនៅឡើយទេ។ នាងលីណាចូលធ្វើការងារដំបូងនៅវិទ្យុ១០៧ និងទូរទស្សន៍លេខ៩ ក្រោយមកទៅធ្វើនៅវិទ្យុសូលីដា ហើយក៏ធ្លាប់ជាCEOនៅវិទ្យុ៨៩.៧ផងដែរ។ ក្រោយមកទៀត ឃេីញលីណា ទៅបម្រើការងារឲ្យកាសែតកោះសន្តិភាព និងទូរទស្សន៍ប៉ុស្តិ៍លេខ៣ដែរ។ ចំពោះសំណេរតែស្កររបស់អស់លោកមួយចំនួនថាលីណាធ្លាប់បម្រើការងារនៅវិទ្យុភ្លើងទៀននោះវាអត់ពិតទេ ។ ខ្ញុំស្គាល់សុវណ្ណ សុខា ច្បាស់ពេលគាត់ធ្វើនៅកាសែតកោះសន្ដិភាព ខ្ញុំគិតថាអស់លោកឈប់បានឈប់ទៅឃើញគាត់មានទុក្ខហើយនាំគ្នាមកជាន់ពន្លិចទៀតថ្ងៃនេះក្រុមគ្រួសារសុវណ្ណ សុខា ចុះថ្ងៃក្រោយប៉ះគ្រួសារអស់លោកវិញហើយមានអ្នកសរសេរតែៗស្ករៗវិញគិតយ៉ាងម៉េចដែរ ? យើងខ្មែរដូចគ្នាទេគួរតែអហោសិកម្មទៅ។ម្យ៉ាងទៀតនាំគ្នាប្រយុទ្ធប្រឆាំងនិងជំងឺCOVID-19 វិញល្អជាងសូមជូនពរដល់មិត្តរួមហ្វេសប៊ុកទាំងអស់ជួបតែសេចក្ដីសុខជានិច្ចនិរន្តរ៍ 12.4.2020។
សូមបញ្ជាក់ថា អគ្គនាយករបស់ TVFB លោក សុវណ្ណ រិទ្ធី ត្រូវបានចៅក្រមស៊ើបសួរ នៃសាលាដំបូងរាជធានីភ្នំពេញ សម្រេចចេញដីកាឃុំខ្លួន។
លោក សុវណ្ណ រិទ្ធី ត្រូវ ដាក់ឲ្យស្ថិតក្រោមការពិនិត្យពីបទ ញុះញង់ឲ្យប្រព្រឹត្តបទឧក្រិដ្ឋជាអាទិ៍ ដែលមានបញ្ញត្តិឲ្យផ្តន្ទាទោសតាមមាត្រា ៤៩៤ និងមាត្រា ៤៩ឲ៥ នៃក្រមព្រហ្មទណ្ឌ។
គួរបញ្ជាក់ថា បទ “ញុះញង់ឲ្យប្រព្រឹត្តបទឧក្រិដ្ឋជាអាទិ៍” គឺ អំពើញុះញង់ដោយផ្ទាល់ឲ្យប្រព្រឹត្តបទឧក្រិដ្ឋ ឬប្រព្រឹត្តអំពើបង្កឲ្យមានភាពវឹកវរធ្ងន់ធ្ងរ ដល់សន្តិសុខសង្គម តាមមធ្យោបាយណាមួយ ក្នុងចំណោមមធ្យោបាយដែលមានចែងនៅក្នុងមាត្រា ៤៩៤ (លក្ខខណ្ឌអត្ថិភាពនៃការញុះញង់) នៃក្រមនេះ ត្រូវផ្តន្ទាទោសដាក់ពន្ធនាគារ ពី៦ខែទៅ២ឆ្នាំ និងពិន័យជាប្រាក់ពី១លានរៀល ដល់៤លានរៀល ប្រសិនបើការញុះញង់នោះ គ្មានប្រសិទ្ធភាពទេ។
គួរបញ្ជាក់ថា លោក សុវណ្ណ រិទ្ធី ត្រូវបានសមត្ថកិច្ចធ្វើការឃាត់ខ្លួននៅថ្ងៃទី៨ ខែមេសា ឆ្នាំ២០២០ ក្រោយពីលោកបានបញ្ចេញមតិ និងផ្សព្វផ្សាយពីប្រសាសន៍របស់សម្តេចតេជោ ហ៊ុន សែន នាយករដ្ឋមន្ត្រី ពីវិធានការរបស់រាជរដ្ឋាភិបាល ពាក់ព័ន្ធនឹងជំងឺកូវីដ១៩៕
ដោយ៖កូឡាប