ព្រះសីហនុ ៖ បុរសម្នាក់ ត្រូវបានគេប្រទះឃើញដេកស្លាប់ នៅក្នុងបន្ទប់ផ្ទះជួលមួយកន្លែង ដោយមានឈាមពេញខ្លួន ដែលគេដាក់ការសង្ស័យជាករណីអត្តឃាត ស្ថិតក្នុងភូមិលេខ៥ សង្កាត់លេខ៤ ក្រុង/ខេត្តព្រះសីហនុ កាលពីរសៀលថ្ងៃទី២១ ខែមេសា ឆ្នាំ២០២០ ។
បើតាមការបញ្ជាក់បឋម ពីសមត្ថកិច្ចជំនាញបានឲ្យដឹងថា ករណីខាងលើជាករណីអត្តឃាត ។
ដោយឡែក លោកស្រី អ៊ុក មុំ ត្រូវជាបងថ្លៃជនរងគ្រោះ បានឲ្យដឹងដែរថា ជនរងគ្រោះដែលស្លាប់ មានឈ្មោះ សួន ជា ភេទប្រុស អាយុ៣៥ឆ្នាំ មានស្រុកកំណើតនៅខេត្តសៀមរាប មុខរបរជាងបាញ់ថ្នាំម៉ូតូ បច្ចុប្បន្នស្នាក់នៅកន្លែងកើតហេតុខាងលើ។
លោកស្រីបានរៀបរាប់ថា មុនពេលកើតហេតុ លោកស្រីបានយកខោអាវបោកអ៊ុត មកឲ្យប្អូនរបស់គាត់ នៅក្នុងបន្ទប់ជួល ដោយគាត់បានគោះទ្វារនិងស្រែកហៅ តែមិនមានអ្នកឆ្លើយតបនោះទេ ហើយគាត់បានដើរទៅអើតមើលតាមបង្អួច ក៏ឃើញប្អូនថ្លៃរបស់គាត់ប្រឡាក់សុទ្ធតែឈាម ភ្លាមនោះគាត់ក៏បានទាក់ទងទៅម្ចាស់ផ្ទះជួល និងសមត្ថកិច្ចដើម្បីឲ្យជួយត្រួតពិនិត្យ។ បន្ទាប់ពីសមត្ថកិច្ចធ្វើកោសលវិច័យរួច ហើយបញ្ជាក់ថា អាចជាករណីអត្តឃាត៕ដោយ៖បញ្ញាស័ក្តិ
