រដ្ឋមួយរបស់អាមេរិចឈ្មោះ Missouri កាលពីថ្ងៃអង្គារបានធ្វើការប្តឹងថ្នាក់ដឹកនាំចិន ជុំវិញការផ្ទុះវីរុស COVID-19 ដោយស្វែងរកសំណងចំពោះអ្វីដែលខ្លួនបានចាត់ទុកថាជាបំភាន់ដោយចេតនា និងការគ្មានវិធានការគ្រប់គ្រាន់ដើម្បីបញ្ឈប់ការផ្ទុះវីរុស។
ការដាក់ពាក្យប្តឹងចិនដំបូងរបស់រដ្ឋខាងលើ កើតឡើងចំពេលដែលមានការស្នើក្នុងសភា ឲ្យធ្វើការដាក់ទណ្ឌកម្មចិន និងការធ្វើយុទ្ធធនាការរបស់លោក ដូណាល់ ត្រាំឲ្យពិនិត្យមើលពីតួនាទីរបស់ទីក្រុងប៉េកាំង បន្ទាប់ពីមានការរិះគន់លើវិធានការរបស់លោកក្នុងការដោះស្រាយវិបត្តិវីរុស។
រដ្ឋ Missour ដែលដឹកនាំដោយគណបក្សប្រជាធិបតេយ្យរបស់លោក ត្រាំ បានដាក់ពាក្យបណ្តឹងនៅតុលាការសហព័ន្ធដើម្បីទាមទារសំណងលើការខូចខាត និងសកម្មភាពបន្តរបស់ចិនដែលរងការចោទប្រកាន់ថា បានរក្សាឧបករណ៍ការពារវីរុស។
អគ្គមេធាវីរដ្ឋ Missour លោក Eric Schmitt បានថ្លែងថា “រដ្ឋាភិបាលចិនបានកុហកពិភពលោកអំពីគ្រោះថ្នាក់ និងការរីករាលដាលរបស់វីរុស COVID-19 ដោយចិននៅរក្សាភាពស្ងាត់ស្ងៀម និងបានធ្វើកិច្ចការតិចតួចប៉ុណ្ណោះដើម្បីបញ្ឍប់ការរីករាលដាលនៃវីរុស”។
លោកមេធាវីថ្លែងទៀតថា “ពួកគេ (ចិន) ត្រូវទទួលខុសត្រូវចំពោះទង្វើរបស់ពួកគេ”។
សូមបញ្ជាក់ថា វីរុសកូរ៉ូណាបានផ្ទុះដំបូងចេញពីទីក្រុងវូហាន ប្រទេសចិន កាលពីខែធ្នូ ឆ្នាំ ២០១៩។ វីរុសដ៏កាចសាហាវនេះបានឆ្លងរីករាលដាលយ៉ាងលឿនទៅជុំវិញពិភពលោក។
រហូតមកដល់ពេលនេះ វីរុសមរណៈនេះបានឆក់យកជីវិតមនុស្សជិត ១៨០.០០០នាក់ និងឆ្លងទៅកាន់មនុស្សជាង ២.៥០០.០០០នាក់។
អាមេរិចជាប្រទេសរងគ្រោះខ្លាំងជាងគេពីការផ្ទុះវីរុសនោះ ដោយមានអ្នកស្លាប់ជាង ៤៣.០០០នាក់ និងឆ្លងជាង ៨២០.០០០នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia