អាជ្ញាធរសុខាភិបាលម៉ាឡេស៊ី កាលពីថ្ងៃអង្គារបានរកឃើញអ្នកផ្ទុកវីរុសកូរ៉ូណាថ្មីចំនួន ៥៧នាក់ បណ្តាលឲ្យតួលេខនៃអ្នកឆ្លងសរុបក្នុងប្រទេសកើនដល់ ៥.៤៨២។
ក្រសួងសុខាភិបាលក៏ប្រកាសថា មានអ្នកស្លាប់ ៣នាក់បន្ថែម ធ្វើឲ្យចំនួនអ្នកស្លាប់ក្នុងប្រទេសកើនដល់ ៩២នាក់។
នៅពេលជាមួយគ្នាដែរ មានអ្នកជាសះស្បើយ ៥៤នាក់ និងត្រូវបានអនុញ្ញាតឲ្យចាកចេញពីមន្ទីរពេទ្យ។
អគ្គនាយកសុខាភិបាលម៉ាឡេស៊ីឈ្មោះ Noor Hisham Abdullah បានថ្លែងថា “ក្នុងរយៈពេលប៉ុន្មានថ្ងៃចុងក្រោយនេះ ចំនួនអ្នកឆ្លងប្រចាំថ្ងៃកំពុងស្ថិតក្នុងទំនោរធ្លាក់ចុះ”។
រហូតមកដល់ពេលនេះ ចំនួនអ្នកជាសះស្បើយ និងចេញពីមន្ទីរពេទ្យមាន ៣.៣៤៩នាក់ ឬក៏ស្មើ ៦១,១ភាគរយនៃចំនួនអ្នកឆ្លងសរុបក្នុងប្រទេស។
លោកវេជ្ជបណ្ឌិតដដែលបញ្ជាក់ទៀតថា “ចំនួនអ្នកជំងឺកំពុងសំរាកព្យាបាលមាន ២.០៤១នាក់។ ក្នុងចំណោមអ្នកឆ្លងថ្មី ៥៧ករណី មាន ១៨ករណីឆ្លងពីប្រភពខាងក្រៅលើប្រជាជនម៉ាឡេស៊ី ដែលបានត្រឡប់ចូលប្រទេសវិញ”៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
