បាត់ដំបង ៖ ពលរដ្ឋដែលឆ្លងជំងឺកូវីដ១៩ចំនួន៨នាក់ (ស្រី២នាក់) នៅក្នុងខេត្តបាត់ដំបង បានជាសះស្បើយ ពីជំងឺអស់ហើយ និងត្រូវបានខាងមន្ទីរពេទ្យបង្អែកខេត្ត អនុញ្ញាតឲ្យវិលត្រឡប់ទៅផ្ទះរៀងៗខ្លួនហើយ។
លោកឱសថបណ្ឌិត វឿង ប៊ុនរ៉េត ប្រធានមន្ទីរសុខាភិបាលខេត្តបាត់ដំបង បានប្រាប់ឲ្យដឹងថា ការអនុញ្ញាតឲ្យអ្នកមានជំងឺកូវីដ១៩ចំនួន៨នាក់ បន្ទាប់ពីបានពិនិត្យ សំណាកចំនួន២ដង មិនឃើញមានរោគសញ្ញាទៀត និងសម្រាប់អ្នកជំងឺដែលជាសះស្បើយចុងក្រោយគេ គឺកាលពីថ្ងៃទី២០ ខែមេសា ឆ្នាំ២០២០ បានវិលត្រឡប់ទៅផ្ទះវិញ ប៉ុន្តែត្រូវដាក់ខ្លួននៅដាច់ដោយឡែកចំនួន ១៤ថ្ងៃសិន ទើបអាចដើរចេញក្រៅបាន។ បន្ទាប់ពីអនុញ្ញាតឲ្យត្រឡប់ទៅផ្ទះវិញ ទាំងអ្នកជាចាស់និងជាថ្មី មិនមានរោគសញ្ញា ឬអាការអ្វីដែលសង្ស័យថា បានឆ្លងជំងឺនេះឡើងវិញទេ បន្ទាប់ពីបានអនុវត្តការដាក់ខ្លួននៅ ដោយឡែកពីគ្រួសារ និងសហគមន៍រយៈពេល១៤ថ្ងៃ អ្នកជាពីជំងឺកូវីដ ១៩ អាចដើរជួបជុំនៅក្នុងសហគមន៍ និងមិនមានការរើសអើងនោះទេ។ ចំពោះបញ្ហាការពិនិត្យសំណាករបស់ពលរដ្ឋខ្មែរ មកពីក្រៅប្រទេសវិញ សម្រាប់ខេត្តបាត់ដំបងមានជាង ៧០សំណាក ជាលទ្ធផលគឺអវិជ្ជមានទាំងអស់ ប៉ុន្តែមន្ទីរសុខាភិបាល កំពុងរៀបផែនការ ចុះអប់រំទៅដល់សហគមន៍ ចំពោះអ្នកដាក់ខ្លួននៅដាច់ដោយឡែកចំនួន១៤ថ្ងៃ ដើម្បីធ្វើយ៉ាងណាឲ្យពួកគាត់អនុវត្តឲ្យបាន ហើយពលករដែលមកដល់ខេត្តបាត់ដំបងវិញ បានចូលរួមសហការជាមួយមន្ត្រីមន្ទីរសុខាភិបាល និងសមត្ថកិច្ចផងដែរ ក្នុងការពិនិត្យសុខភាព និងការទប់ស្កាត់ការរីករាលដាលនៃជំងឺកូវីដ១៩នេះ ។
លោកឱសថបណ្ឌិត វឿង ប៊ុនរ៉េត បានអំពាវនាវដល់ពលរដ្ឋ ត្រូវបន្តចូលរួមសហការជាមួយអាជ្ញាធរខេត្ត ក្នុងការអនុវត្តតាមការណែនាំ របស់រាជរដ្ឋាភិបាល និងក្រសួងសុខាភិបាល ក្នុងការទប់ស្កាត់ការរាតត្បាតបន្ថែមនូវជំងឺកូវីដ១៩ ដែលមានទាំងការពាក់ម៉ាស ឲ្យបានត្រឹមត្រូវ លាងដៃនឹងសាប៊ូ ជែលនិងអាល់កុលឲ្យបានញឹកញាប់ រួមទាំងកាត់បន្ថយនូវការធ្វើដំណើរទៅទីកន្លែងផ្សេងៗ បើមិនមានការចាំបាច់។
គួរបញ្ជាក់ផងដែរថា អ្នកឆ្លងជំងឺកូវីដ១៩ នៅក្នុងខេត្តបាត់ដំបងមានចំនួន ៨នាក់ គឺមាន៤នាក់ ភេទប្រុស បានឆ្លងមកពីប្រ
ទេសម៉ាឡេស៊ី និងស្ត្រី២នាក់ បានឆ្លងពីប្តី ក្នុងចំណោមបុរសទាំង៤នាក់នេះ និង២នាក់ផ្សេងទៀត ដែលជាសាច់ញាតិ និងមិត្តភក្តិ ក៏បានឆ្លងពីបុរសក្នុងចំណោមទាំង ៤នាក់នេះផងដែរ៕ ដោយ ៖ អ៊ុងសារុំ
