ខេត្តស្វាយរៀង៖ មានករណីគ្រោះថ្នាក់ចរាចរណ៍មួយ គួរឲ្យរន្ធត់ទាំងព្រឹកព្រលឹម ពេលដែលស្ត្រីកម្មការិនីរោងចក្រម្នាក់ រត់ឆ្លងថ្នល់ ត្រូវរថយន្តដឹកកម្មករកម្មការិនីរោងចក្រ បុកបណ្តាលឲ្យស្លាប់ភ្លាមៗនៅនឹងកន្លែងកើតហេតុ កាលពីម៉ោង៥និង៤៥នាទីព្រឹក ថ្ងៃទី២១ ខែមេសា ឆ្នាំ២០២០នេះ នៅលើផ្លូវជាតិលេខ៣១៤.D. ស្ថិតនៅចំណុចភូមិស្វាយអាណាត ឃុំ ញរ ស្រុកកំពង់រោទិ៍ ខេត្តស្វាយរៀង។
យោងតាមសមត្ថកិច្ចបានឲ្យដឹងថា៖ នៅមុនពេលកើតហេតុ មានរថយន្តមួយគ្រឿង ម៉ាក ហ៊ីយ៉ាន់ដាយ ពណ៌ ទឹកប្រាក់ ពាក់ផ្លាកលេខ សៀមរាម 3A 0439 ធ្វើដំណើរពីត្បូងទៅជើង បើកបរដោយបុរសម្នាក់មានឈ្មោះ ឆូយ ភីរុន ភេទប្រុស អាយុ ៤២ឆ្នាំ រស់នៅភូមិ ជុបព្រីង ឃុំថ្មី ស្រុកកំពង់រោទិ៍ ខេត្តស្វាយរៀង មុខរបរបើករថយន្តដឹកកម្មករកម្មការិនីរោងចក្រ។
ប្រភពបានបន្តទៀតថា លុះមកដល់ចំណុចកើតហេតុខាងលើ មានស្ត្រីម្នាក់ឈ្មោះស្ងួន ស្រី អាយុ ៣៧ឆ្នាំ រស់នៅភូមិភ្នុំស្រូវ ឃុំរាជមន្ទី ស្រុកកំពង់រោទិ៍ ខេត្តស្វាយរៀង មុខរបរកម្មកររោងចក្រ ដែលធ្វើការវេនយប់ បានចុះពីរថយន្ដដែលខ្លួនជិះ ដើរចូលក្នុងផ្សារកំពង់រោទិ៍ ដើម្បីទិញអីវ៉ាន់ លុះត្រឡប់ចេញមកវិញ បាំងរថយន្តមួយគ្រឿងផ្សេងទៀត ក៏រត់ឆ្លងថ្នល់ពីទិសខាងកើតទៅលិច នៅខាងផ្សារកំពង់រោទិ៍ សំដៅទៅរថយន្តរបស់ខ្លួនជិះ ក៏ត្រូវរថយន្តខាងលើ បុកបណ្តាលឲ្យស្លាប់ភ្លាមៗនៅនឹងកន្លែងកើតហេតុតែម្តង។
ក្រោយបង្កឲ្យមានគ្រោះថ្នាក់រួចមក អ្នកបើកបររថយន្ត បានចុះពីរថយន្តរត់គេចខ្លួនបាត់ស្រមោល។
បច្ចុប្បន្នរថយន្តបង្ក ត្រូវបានសមត្ថកិច្ច យកមករក្សាទុកនៅ ប៉ុស្តិ៍នគរបាលឃុំញរ ដើម្បីរង់ចាំធ្វើការដោះស្រាយគ្នា តាមផ្លូវច្បាប់។ នគរបាលមូលដ្ឋាន បានបញ្ជាក់ថា មូលហេតុ មនុស្សរត់ឆ្លងថ្នល់ ខ្វះការប្រុងប្រយ័ត្ន ត្រូវរថយន្តបុក៕ដោយ៖ វ៉ៃកូ