ស្ទឹងត្រែង: គណៈកម្មាធិការសហភាពសហព័ន្ធយុវជនកម្ពុជាខេត្តស្ទឹងត្រែង បានរៀបចំប្រជុំដាក់ផែនការរបស់ខ្លួន ក្នុងការចូលរួមប្រយុទ្ធប្រឆាំងនឹងជំងឺឆ្លងប្រភេទថ្មីCOVID-19 ។ កិច្ចប្រជុំនេះធ្វើឡើងកាលពីថ្ងៃទី២១ ខែមេសា ឆ្នាំ២០២០ នេះក្រោមវត្តមាន លោកម៉ុម សារឿន សមាជិកអចិន្ត្រៃយ៍គណៈកម្មការកណ្តាលសហភាពសហព័ន្ធយុវជនកម្ពុជា និងជាប្រធានគណៈកម្មាធិការសហភាពសហព័ន្ធកម្ពុជាខេត្តស្ទឹងត្រែង និងវត្តមានប្រធាន អនុប្រធាន សសយក ក្រុង ស្រុក សមាជិកគណៈកម្មាធិការ សសយក ព្រមទាំងក្រុមសកម្មជនយុវជន មន្ទីរ អង្គភាព ជុំវិញខេត្ត ។
លោក ម៉ែន គង់ អនុប្រធានគណៈកម្មាធិការសហភាពសហព័ន្ធយុវជនកម្ពុជាខេត្ត បានឲ្យដឹងថា ដើម្បីបញ្ជ្រាបការយល់ដឹង ដល់ប្រជាជនឲ្យបានយល់ច្បាស់ អំពីគ្រោះថ្នាក់នៃជំងឺកូវីដ១៩ ដ៏សាហាវនេះ សហភាព សហព័ន្ធយុវជនកម្ពុជា នឹងយកវិធានការណ៍សំខាន់ៗចំនួន៥មកអនុវត្ត។
លោកម៉ែន គង់ បានបញ្ជាក់ថា វិធានការណ៍ទាំង៥ រួមមាន ១.បង្កើតក្រុមការងារ ផ្សព្វផ្សាយ ដែលស្រុក និងខេត្តរៀបចំសេចក្តីសម្រេចរួម ២.ធ្វើយ៉ាងណាឲ្យសសយក ក្រុង ស្រុក ខេត្ត មានការយល់ដឹងកាន់តែច្បាស់រួមគ្នា ពាក់ព័ន្ធនិងវិធានការការពារជំងឺកូវីដ១៩ ដើម្បីបន្តផ្សព្វផ្សាយដល់ប្រជាពលរដ្ឋ ៣.ក្រុមការងារស ស យ ក តាមវិស័យត្រូវត្រៀមខ្លួន ចូលរួមជាមួយសុខាភិបាល ក្នុងករណីណាមានការផ្ទុះជំងឺកូវីដ១៩ក្នុងខេត្ត ឬក្នុងករណីចាំបាច់ ៤.បន្តធ្វើការផ្សព្វផ្សាយតាមឧគ្ឃោសនសព្ទចល័ត ឬតាមបណ្តាញសង្គមជាបន្តទៀត ដើម្បីកុំឲ្យប្រជាពលរដ្ឋខ្វះការប្រុងយ័ត្ន និងឲ្យពួកគាត់បន្តចូលរួមប្រយុទ្ធនិងជំងឺកូវីដ១៩ និងទី៥ ស ស យ ក ថ្នាក់ក្រុងស្រុកត្រូវត្រៀមសមាជិកសកម្ម សំខាន់ៗចាប់ពី៣០ទៅ៥០នាក់ បញ្ជូនមកថ្នាក់ខេត្ត ដើម្បីបញ្ជ្រៀបការយល់ដឹងពីការទប់ស្កាត់ជំងឺCovid-19នេះ។
លោក ម៉ុម សារឿន បាននិយាយថា ដើម្បីឲ្យមានប្រសិទ្ធភាព ក្នុងការប្រយុទ្ធប្រឆាំងនឹងជំងឺកូវីដ១៩ ចាំបាច់ណាស់ត្រូវមានការសហការ និងការចូលរួមជាចាំបាច់គ្រប់អ្នកពាក់ព័ន្ធ។
លោក បន្តថា ដើម្បីឲ្យប្រជាពលរដ្ឋយល់ដឹងកាន់តែច្បាស់ ពីវិធានការការពារខ្លួនពីជំងឺកូវី១៩ កាន់តែច្បាស់ ប្រធានសសយកថ្នាក់ក្រុងស្រុក ត្រូវសហការជាមួយមន្ទីរសុខាភិបាល ត្រូវធ្វើយុទ្ធនាការឲ្យកាន់តែសកម្ម និងបំផុសបន្ថែមទៀត អំពីគ្រោះថ្នាក់នៃជំងឺកូវីដ១៩ ជាពិសេសត្រូវជំរុញឲ្យបានកាន់តែខ្លាំងដល់ អាជីវករនិងអ្នកទិញត្រូវប្រើម៉ាស ប្រើអាល់កុល ឬសាប៊ូលាងដៃ និងមិនឲ្យប៉ះពាល់ចំណុចសំខាន់ៗ មានភ្នែក ច្រមុះ និងមាត់ជាដើម។
ចំណុចដែលគួរអនុវត្តឲ្យបានសកម្មបំផុត ត្រូវធ្វើការផ្សព្វផ្សាយ និងណែនាំដល់ប្រជាពលរដ្ឋក្នុងទីរួមខេត្ត តាមក្រុង ស្រុក ទីប្រជុំជន ឬតាមមន្ទីរអង្គភាព កសិដ្ឋាននានា ធ្វើយ៉ាងឲ្យអត្រាការឆ្លងមានកម្រិតទាបបំផុត ៕ដោយ៖សុខុម