ថៃ៖ ស្ត្រីម្នាក់បានបញ្ចេញការឈឺចាប់ជាខ្លាំង នៅលើអនឡាញ បន្ទាប់ពីមន្ត្រីបានរឹបអូសស្បៀងអាហារចំនួនជាង ៣០០ ឈុត ដែលនាងគ្រោងនឹងផ្តល់ជូនប្រជាជននៅមុខ Phra Pathom Chedi ខេត្ត Nakhon Pathom ។
ស្ត្រីរូបនេះដែលមានឈ្មោះថា Fern Pannamjai បានបង្ហោះនៅលើបណ្តាញសង្គមហ្វេសប៊ុកកាលពីថ្ងៃទី ២០ ខែមេសា ឆ្នាំ ២០២០ ថា “ ស៊ុបសាច់ជ្រូកត្រៀមនឹងចែកជូន ២៥០ ឈុត នៅថ្ងៃនេះ និងបាយ ៥០ ប្រអប់ ដែលមានសរុបចំនួន ៣០០ ឈុត។ នេះជាថ្ងៃទី៧ នៃការផ្តល់អាហារឥតគិតថ្លៃ” ។ នាងមានគោលបំណងផ្តល់អាហារ ដល់អ្នកដែលកំពុងតស៊ូ នៅក្នុងស្ថានភាពបច្ចុប្បន្ន ទៅនឹងជំងឺកូវីដ១៩ ដូចជាអ្នកដែលបានបាត់បង់ប្រាក់ចំណូលជាដើម ។ Fern ក៏បានភ្ជាប់រូបភាពនៃអាហារ នៅក្នុងប្រកាសរបស់នាងដោយប្រាប់ថា ការចែកជូនអាហារហ្វ្រ៊នេះ នឹងប្រព្រឹត្តទៅចាប់ពីវេលាម៉ោង ១៦ និង ៤០ រហូតដល់ម៉ោង ១៧ និង០០ នាទី ។
នៅពេលវេលាមកដល់ ខណៈដែលមនុស្សក៏កំពុងឈរតម្រង់ជួរគ្នារង់ចាំម្ហូបអាហារ ស្រាប់តែមន្ត្រីសាលាក្រុង Nakhon Pathom បានមកដល់ ហើយរឹបអូសយកម្ហូបទាំងអស់នោះតែម្តង។ ក្រុមមន្ត្រីបានបញ្ជាក់ថា ប្រសិនបើការចែកជូននេះនៅតែបន្ត គឺស្មើនឹងរំលោភក្រឹត្យគ្រាអាសន្នដែលកំពុងអនុវត្តហើយ។ ពួកគេក៏បានជូនដំណឹងដល់នាងថា អាហារទាំងនេះប្រាកដណាស់ នឹងត្រូវបានផ្តល់ទៅឱ្យប្រជាជន ដែលកំពុងរស់នៅក្នុងតំបន់អនាធិបតេយ្យ។ ក្រោយមក Fern បានបង្ហោះការសុំទោសតាមអ៊ិនធឺណិត នូវអ្វីដែលនាងមិនអាចផ្តល់ស៊ុបសាច់ជ្រូក ដូចដែលបានសន្យាជាមួយប្រជាជនដែលកំពុងរង់ចាំ។
Fern បាននិយាយនៅក្នុងវីដេអូថា “អ្វីដែលធ្វើឱ្យខ្ញុំឈឺចាប់បំផុតនោះ គឺថាមនុស្សដែលមករង់ចាំមិនបានបរិភោគទេ ប៉ុន្តែអ្នកដែលដេកនៅក្នុងផ្ទះមានរបស់ញ៉ាំ។ ខ្ញុំមិនបាននិយាយថា អ្នកដែលកំពុងរង់ចាំនៅផ្ទះមិនត្រឹមត្រូវនោះទេ ប៉ុន្តែខ្ញុំមានអារម្មណ៍សោកស្តាយចំពោះមនុស្ស ដែលអង្គុយនៅក្រោមកម្តៅថ្ងៃដ៏ក្តៅហែង ពីព្រោះពួកគេជឿជាក់ថា នឹងទទួលបានអាហារ។ ខ្ញុំសុំទោសដែលមិនអាច បំពេញការសន្យារបស់ខ្ញុំ វាពិតជាមិនអាចទៅរួចទេក្នុងការបន្តផ្តល់ឱ្យ។ ខ្ញុំដឹងថាអ្នកកំពុងរង់ចាំស៊ុបរបស់ខ្ញុំ ប៉ុន្តែខ្ញុំមិនអាចផ្តល់ឱ្យអ្នកទាំងអស់គ្នាបាន!!” ៕
ប្រែសម្រួល៖ លឹម ហុង (ប្រភព៖ Sanook, Facebook User: Fern Pannamjai )