ភ្នំពេញ៖ ពាក់ព័ន្ធនឹង គណនីហ្វេសប៊ុក និងសារព័ត៌មានមួយចំនួន បានយកវីដេអូ នៃការចែកចាយសារធាតុញៀន មកផ្សព្វផ្សាយនោះ ដោយយោងតាមសេចក្តីបកស្រាយបំភ្លឺរបស់ស្នងការដ្ឋាននគរបាលរាជធានីភ្នំពេញ នៅថ្ងៃទី២២ខែមេសា បានបញ្ជាក់ថា គឺជារូបចាស់តាំងពីឆ្នាំ២០១៧ យកមកផុសដែលធ្វើឲ្យសាធារណជនមានការយល់ច្រឡំ។ នគរបាលចុះបង្ក្រាបជាប្រចាំនៅតំបន់បឹងកក់ផ្លូវរថភ្លើង ដោយចាប់បានទាំងជនសង្ស័យ និងសារធាតុញៀនជាច្រើនករណី។
ស្នងការដ្ឋាននគរបាលរាជធានីភ្នំពេញ សូមធ្វើការបញ្ជាក់ជូនសាធារណជនឲ្យបានជ្រាបថា ក្នុងរយៈពេលប៉ុន្មានថ្ងៃនេះមានគណនីហ្វេសបុក និងសារព័ត៌មានមួយចំនួន បានយកវីដេអូនៃការចែកចាយសារធាតុញៀន ដែលជារូបចាស់តាំងពីឆ្នាំ២០១៧ យកមកផុសដែលធ្វើឲ្យសាធារណជនមានការយល់ច្រឡំ ។
ក្រោយពីបានបើកការស្រាវជ្រាវតាមរកម្ចាស់វីដេអូឃ្លីបរួចមក នៅល្ងាចថ្ងៃទី២១ ខែមេសា ឆ្នាំ២០២០នេះ សមត្ថកិច្ចបានជួបសួរនាំផ្ទាល់ ជាមួយស្ត្រីម្នាក់ដែលមានឈ្មោះ ស្រីម៉ៅ អាយុ៣៨ឆ្នាំ ជនជាតិខ្មែរ ស្នាក់នៅក្នុងតំបន់បឹងកក់ផ្លូវរថភ្លើង ភូមិ៣ សង្កាត់ស្រះចក ។
ស្ត្រីខាងលើបានឲ្យដឹងថា វីដេអូនេះ គឺខ្លួនបានថតតាំងពី៣ឆ្នាំមុនម្ល៉េះ ហើយមិនដឹងជាបុគ្គលណាយកវីដេអូនេះ ទៅបង្ហោះតាមហ្វេសប៊ុកជាសាធារណៈឡើយ ។
នៅតំបន់នេះ សមត្ថកិច្ចការិយាល័យប្រឆាំងគ្រឿងញៀន ក៏ដូចជាសមត្ថកិច្ចអធិការដ្ឋាននគរបាលខណ្ឌដូនពេញ និងប៉ុស្តិ៍ស្រះចក តែងតែបានចុះបង្ក្រាបជាប្រចាំបានជាច្រើនករណី ដោយចាប់បានទាំងជនសង្ស័យ និងសារធាតុញៀនជាច្រើនផងដែរ ។ ចំពោះចំណុចតំបន់ខាងលើ នឹងក្នុងតំបន់បឹងកក់ថ្មីនេះ កម្លាំងនៃអធិការដ្ឋាននគរបាលខណ្ឌដូនពេញ នឹងប៉ុស្តិ៍នគរបាលរដ្ឋបាលស្រះចក បាននឹងកំពុងឈរជើងជាប្រចាំដើម្បីតាមដាន ស្រាវជ្រាវ នឹងឈានទៅរកការបង្ក្រាប ដើម្បីលុបបំបាត់ឲ្យបានទាំងស្រុង លើករណីជួញដូរសារធាតុញៀននៅតំបន់មិនរៀបរយនេះ ក៏ដូចជាតំបន់មួយចំនួនទៀត ។
សមត្ថកិច្ចនៃស្នងការដ្ឋាននគរបាលរាជធានីភ្នំពេញ តែងតែខិតខំជាប្រចាំទាំងយប់ ថ្ងៃ ក្នុងប្រតិបត្តិការ ស្រាវជ្រាវ និងបង្ក្រាប ទីតាំងជួញដូរ អ្នកជួញដូរ ចែកចាយ និងអ្នកប្រើប្រាស់ សារធាតុញៀន គ្រប់ទីកន្លែងក្នុងរាជធានីភ្នំពេញ ។
ស្នងការដ្ឋាននគរបាលរាជធានីភ្នំពេញ រីករាយនឹងការចូលរួមសហការ រាយការណ៍ផ្តល់ព័ត៌មាន របស់ប្រជាពលរដ្ឋ ៕ ដោយ៖កូឡាប
