បាត់ដំបង ៖ កម្លាំងនគរបាលខេត្តបាត់ដំបង បានចាប់ឃាត់ខ្លួនបុរស២នាក់ ឆក់កាបូបលុយពីស្ត្រីម្នាក់ នៅតាមដងផ្លូវកសាងសំណុំរឿងបញ្ជូនទៅតុលាការ ដើម្បីចាត់ការទៅតាមផ្លូវច្បាប់ នៅថ្ងៃទី២២ ខែមេសា ឆ្នាំ២០២០។ ហេតុការណ៍ចាប់ឃាត់ខ្លួនជនសង្ស័យ២នាក់នេះ បានធ្វើឡើងកាលពីថ្ងៃទី២១ ខែមេសា ឆ្នាំ២០២០ វេលាម៉ោង៨និង២០នាទី នៅចំណុចឃុំអន្លង់វិល ស្រុកសង្កែ ខេត្តបាត់ដំបង។
លោកវរសេនីយ៍ទោ ឈឿង គឹមសុងនាយការិយាល័យព្រហ្មទណ្ឌកម្រិតស្រាលនគរបាលខេត្តបាត់ដំបង បានឲ្យដឹងថា ករ
ណីលួចដោយមានស្ថានទម្ងន់ទោស (ឆក់កាបូប) ជនរងគ្រោះមានឈ្មោះ ឯក សារានី ភេទស្រី អាយុ ៤៥ឆ្នាំ មានទីលំនៅភូមិអូសទូក ឃុំកំពង់ព្រៀង ស្រុកសង្កែ ខេត្តបាត់ដំបង ដែលក្នុងកាបូបលុយមានប្រាក់និងសម្ភារមួយចំនួន ខណៈពេលជនរងគ្រោះ កំពុងជិះម៉ូតូនៅតាមដងផ្លូវ។ នៅពេលកើតហេតុភ្លាមៗ ឯកឧត្តម ឧត្តមសេនីយ៍ទោ អ៊ុច សុខុន ស្នងការនៃស្នងការដ្ឋាននគរបាលខេត្តបាត់ដំបង បានដាក់បទបញ្ជាទៅលោកឧត្តនសេនីយ៍ត្រី ជេត វណ្ណនី ស្នងការរងផែនការងារព្រហ្មទណ្ឌ ដើម្បីធ្វើការងារនេះ។
លោកឧត្តមសេនីយ៍ត្រី ជេត វណ្ណនីស្នងការរងផែនការងារព្រហ្មទណ្ឌ បានប្រាប់ឲ្យដឹងថា លោកដឹកនាំកម្លាំងនគរបាលក្នុងផែន ដែលមានការិយាល័យនគរបាលព្រហ្មទណ្ឌកម្រិតស្រាល ចូលរួមជាមួយនគរបាលស្រុកសង្កែ ធ្វើការស្រាវជ្រាវ រហូតចាប់ឃាត់ខ្លួនជនសង្ស័យបានចំនួន ២នាក់ នៅវេលាម៉ោង ១៥និង២០នាទីថ្ងៃទី២១ ខែមេសា ឆ្នាំ២០២០ បន្ទាប់ពីពួកគេធ្វើសកម្មភាពបានតែប៉ុន្មានម៉ោងតែប៉ុណ្ណោះ។ ជនសង្ស័យ២នាក់ដែលចាប់ឃាត់ខ្លួនឈ្មោះ ឡឹប ការស៊ឹម ភេទប្រុស អាយុ២១ឆ្នាំ មានទីលំនៅភូមិស្លាកែត សង្កាត់ស្លាកែត ក្រុងបាត់ដំបង ខេត្តបាត់ដំបង និងឈ្មោះស៊ុប ម៉ាលិក ភេទប្រុស អាយុ២០ឆ្នាំ មានទីលំនៅភូមិសំរោងតាកុក ឃុំសំរោងក្នុង ស្រុកឯកភ្នំ ខេត្តបាត់ដំបង។ វត្ថុតាងដែលដកហូតរួមមាន ប្រាក់ដុល្លារអាមេរិកចំនួន២០ដុល្លារ ប្រាក់ខ្មែរចំនួន១៦០.០០០រៀល កាបូបស្ពាយពណ៌ខ្មៅ ១ អត្តសញ្ញាណប័ណ្ណសញ្ជាតិខ្មែរចំនួន២សន្លឹក កាតATM ១សន្លឹក អាវយឺតដៃខ្លីពណ៌ខ្មៅ ដែលជនសង្ស័យធ្វើសកម្មភាព ១ ម៉ូតូម៉ាក ស៊ូស៊ូគី ណិច ពណ៌ទឹកប្រាក់ ពាក់ផ្លាកលេខ បាត់ដំបង 1AK 3192 ដែលជនសង្ស័យជិះធ្វើសកម្មភាព ។
បច្ចុប្បន្នជនសង្ស័យទាំង២នាក់ បានសារភាពអំពីសកម្មភាពរបស់ខ្លួន ដែលបានប្រព្រឹត្តិ ហើយពេលនេះ នគរបាលបានកសាងសំ ណុំរឿងបញ្ជូនជនសង្ស័យ ទៅសាលាដំបូងខេត្តបាត់ដំបង ដើម្បីចាត់ការតាមនីតិវិធីហើយ៕ ដោយ៖ អ៊ុងសារុំ