បាត់ដំបង៖ កម្លាំងប៉ូលិសការិយាល័យប្រឆាំងគ្រឿងញៀនខេត្តបាត់ដំបង បានចាប់បុរស៣នាក់ជួញដូររក្សាទុកនិងថ្នាំម៉ាទឹកកក៧ថង់ ម៉ូតូមួយគ្រឿង សម្ភារពាក់ព័ន្ធមួយចំនួនជាបន្តបន្ទាប់ នៅកន្លែងផ្សេងគ្នា កសាងសំណុំរឿងបញ្ជូនទៅតុលាការ ដើម្បីចាត់ការទៅតាមផ្លូវច្បាប់នៅ ថ្ងៃទី២២ ខែមេសា ឆ្នាំ២០២០។ ហេតុការណ៍ចាប់ឃាត់ខ្លួនជនសង្ស័យ៣នាក់នេះ បានធ្វើឡើងកាលពីថ្ងៃទី២០ ដល់២១ ខែមេសា ឆ្នាំ២០២០ នៅចំណុចស្រុកកំរៀង និងស្រុកសង្កែ ខេត្តបាត់ដំបង។
លោកសុខ និមល នាយការិយាល័យស្ដីទីប្រឆាំងបទល្មើសគ្រឿងញៀនខេត្តបាត់ដំបង បានឲ្យដឹងថា ជនសង្ស័យ៣នាក់ ដែលចាប់ឃាត់ខ្លួន ករណីទី១ ឈ្មោះអាត់ សីហា ហៅឈឹម ភេទប្រុស អាយុ២៣ឆ្នាំ រស់នៅភូមិទួលតាឯក សង្កាត់ទួលតាឯក ក្រុងបាត់ដំបង ខេត្តបាត់ដំបង និងឈ្មោះអ៊ក រ័ត្ន ហៅតែម ភេទប្រុស អាយុ១៦ឆ្នាំ រស់នៅភូមិបោះពោធិ ឃុំអូរដំបង១ ស្រុកសង្កែ ខេត្តបាត់ដំបង។ ក្នុងប្រតិបត្តិការនេះ កម្លាំងដកហូតបានថ្នាំម៉ាទឹកកកមួយថង់ ម៉ូតូមួយគ្រឿង សម្ភារមួយចំនួនទៀត ហើយចាប់ឃាត់ខ្លួនកាលពីម៉ោង២២និង៤៥នាទី ថ្ងៃទី២០ ខែមេសា ឆ្នាំ២០២០ នៅចំណុចក្រុមទី៦ ភូមិវត្តតាមឹម ឃុំអូរដំបង១ ស្រុកសង្កែ ខេត្តបាត់ដំបង។ ករណីទី២ ឈ្មោះសៅ ប៊ុននឿន ភេទប្រុស អាយុ៣៧ឆ្នាំ រស់នៅភូមិអូរថ្មី ឃុំពេជ្រចិន្ដា ស្រុកភ្នំព្រឹក ខេត្តបាត់ដំបង។ ក្នុងប្រតិបត្តិការនេះ កម្លាំងដកហូតបានថ្នាំម៉ាទឹកកក៦ថង់ សម្ភារមួយចំនួនទៀត ហើយចាប់ឃាត់ខ្លួន កាលពីម៉ោង១១និង៤០នាទីថ្ងៃទី២១ ខែមេសា ឆ្នាំ២០២០ នៅចំណុចភូមិអូរអន្លក់ ឃុំតាសែន ស្រុកកំរៀង ខេត្តបាត់ដំបង។
លោកសុខ និមល បានបញ្ជាក់ថា កម្លាំងបានសហការជាមួយកម្លាំងប៉ូលិសស្រុក ក្រុង ចុះបង្ក្រាបបានករណីទាំង២នេះ ហើយចាប់ឃាត់ខ្លួនជនសង្ស័យ៣នាក់ និងវត្ថុតាងបានភ្លាមៗជាក់ស្ដែងតែម្ដង។ បច្ចុប្បន្ននេះ កម្លាំងបានកសាងសំណុំរឿងបញ្ជូនជនសង្ស័យ និងវត្ថុតាង ទៅតុលាការ ដើម្បីចាត់ការទៅតាមផ្លូវច្បាប់ នៅថ្ងៃទី២២ ខែមេសា ឆ្នាំ២០២០៕ ដោយ ៖ អ៊ុងសារុំ
