បាត់ដំបង ៖ ប្រធានមន្ទីរពាណិជ្ជកម្មខេត្តបាត់ដំបង បានឲ្យដឹងថា មានក្រុមហ៊ុនឯកជនមួយ គ្រោងបោះទុនបង្កើតសិប្បកម្មកែច្នៃផ្លែម្នាស់ ជាលើកដំបូងនៅក្នុងខេត្តបាត់ដំបង ដើម្បីកែច្នៃទៅជាភេសជ្ជៈ ក្នុងការផ្គត់ផ្គងលើទីផ្សារក្នុងស្រុក និងនាំចេញទៅក្រៅប្រទេស។ គម្រោងនេះ ជាដំណឹងវិជ្ជមានមួយសម្រាប់កសិករ ដែលនឹងធ្វើឲ្យផ្លែម្នាស់មានតម្លៃសមរម្យ ខណៈតម្លៃនាពេលបច្ចុប្បន្ន មានការចុះឡើងៗមិនទៀងទាត់។
លោក គឹម ហួត ប្រធានមន្ទីរពាណិជ្ជកម្មខេត្តបាត់ដំបង បានមានប្រសាសន៍ថា សិប្បកម្មកែច្នៃផ្លែម្នាស់ទៅជាភេសជ្ជៈនេះ គ្រោងនឹងបង្កើតនៅលើទីដីស្រុកសង្កែ។ គម្រោងនេះ ស្ថិតក្នុងការសិក្សានិងវាយតម្លៃនៅឡើយ ទៅលើការចំណាយរបស់កសិករក្នុងការដាំដុះ រួមទាំងការធ្វើកិច្ចព្រមព្រៀមជាមួយកសិករ ឲ្យបានច្បាស់លាស់សិន ទើបខាងក្រុមហ៊ុនហ៊ានបោះទុនវិនិយោគ។
ចំពោះផ្លែម្នាស់ដែលតម្រូវ ទិញពីកសិករនោះ គឺស្របតាមស្ដង់ដារ មានទំហំមួយច្បាស់លាស់ ហើយខាងក្រុមហ៊ុននឹងបញ្ជូនអ្នកជំ
នាញ មកជួយបណ្ដុះបណ្ដាលពីរបៀបការដាំឲ្យមានទិន្នផលល្អ រួមទាំងការធានាការទិញយកពីកសិករ ប៉ុន្តែក៏ទុកលទ្ធភាពឲ្យពួកគាត់ ទុកលក់សម្រាប់តម្រូវការទីផ្សារនានាផងដែរ។
កសិករដាំម្នាស់ ស្ថិតក្នុងឃុំព្រែកជីក ស្រុករុក្ខគិរី បានប្រាប់ឲ្យដឹងថា ក្នុងតំបន់ពួកគាត់ រស់នៅមានពលរដ្ឋប្រមាណ ៧៥ភាគរយ ក្រៅពីធ្វើស្រែ បានប្រកបរបរដាំម្នាស់ជាលក្ខណៈវិលជុំ ប៉ុន្តែសម្រាប់តម្លៃវិញ គឺមានការចុះឡើងៗមិនថិតថេរ ឆ្នាំខ្លះក្នុងមួយផ្លែអាចលក់បានត្រឹមតម្លៃ ២០០រៀល និងឆ្នាំខ្លះទៀត អាចលក់បានរហូតដល់ជាង ១០០០រៀល ។ សម្រាប់ផ្លែម្នាស់ បើលក់ត្រឹមតម្លៃ ២០០រៀលនេះ គឺមិនអាចទូទាត់នឹងការចំណាយលើការដាំដុះបាននោះទេ គឺទាល់តែតម្លៃបាន ៧០០ទៅ៨០០រៀល ក្រោយកាត់លើការចំណាយអស់ អាចសល់ប្រាក់បានគួរសម ។ ក្រោយពេលឮដឹងដំណឹងថា នៅក្នុងខេត្តបាត់ដំបង គ្រោងបង្កើតសិប្បកម្មកែច្នៃផ្លែម្នាស់ទៅជាភេសជ្ជៈ ពួកគាត់សប្បាយចិត្ត ហើយក៏រំពឹងថា តម្លៃផ្លែម្នាស់នឹងមានទីផ្សារបានតម្លៃគួរសម។
គួរបញ្ជាក់ផងដែរថា នៅក្នុងខេត្តបាត់ដំបង មានស្រុកចំនួន២ បានដាំផ្លែម្នាស់ច្រើនជាងគេ មានស្រុកមោងឫស្សី និងស្រុករុក្ខគិរី ក្នុងផ្ទៃដីប្រមាណជាង ២.០០០ហិកតា ហើយការដាំនេះ ក្នុងមួយហិកតា ដាំបានចាប់ពី ៥ម៉ឺនទៅ៦ម៉ឺនដើម ដោយដាំបានជាង ៨ ទៅ១០ខែ ទើបប្រមូលផលបាន ។ ការដាំក្នុងមួយហិកតា ប្រើអស់ទឹកប្រាក់ប្រមាណ ៨លាន ទៅ១០លានរៀល ៕ ដោយ ៖ អ៊ុងសារុំ