កំពង់ចាម៖ យោងតាមបញ្ជាពីព្រះរាជអាជ្ញារង នៃអយ្យការអមសាលាដំបូងខេត្តកំពង់ចាម កម្លាំងជំនាញរបស់ផែនការងារនគរបាលព្រហ្មទណ្ឌ បានចុះបង្ក្រាបទីតាំងបើកលេងល្បែងស៊ីសង ជល់មាន់ លេងអាប៉ោង ឃាត់ខ្លួនមនុស្ស២នាក់និងមាន់ជល់ជាច្រើនក្បាល ។
នៅថ្ងៃទី២២ ខែមេសា ឆ្នាំ២០២០ វេលាម៉ោង១៥និង២០នាទី បន្ទាប់ពីទទួលបានព័ត៌មានពីប្រជាពលរដ្ឋភ្លាម លោកឧត្តមសេនីយ៍ទោ ឯម កុសល ស្នងការនគរបាលខេត្តកំពង់ចាម បានបញ្ជាដល់កម្លាំងជំនាញរបស់ផែនការងារនគរបាលព្រហ្មទណ្ឌ ដឹកនាំដោយលោកវរសេនីយ៍ឯក ថាញ់ សុខវុន នាយការិយាល័យនគរបាលព្រហ្មទណ្ឌកម្រិតស្រាល និងដោយក្នុងកិច្ចប្រតិបត្តិការ ក្រោមការដឹកនាំសម្របសម្រួលបញ្ជាផ្ទាល់ពីលោក សុធា ពិសិដ្ឋ ព្រះរាជអាជ្ញារង នៃអយ្យការអមសាលាដំបូងខេត្តកំពង់ចាម បង្ក្រាបករណីលួចលេងល្បែងស៊ីសងខុសច្បាប់ (បាញ់អាប៉ោង និងជល់មាន់) នៅចំណុចភូមិប្រយុគ ឃុំទំនប់ ស្រុកបាធាយ ខេត្តកំពង់ចាម។
លោកស្នងការបានបន្តថា ក្នុងប្រតិបត្តិការខាងលើកម្លាំងជំនាញបានឃាត់មនុស្ស២នាក់ រួមមាន៖ទី១-ឈ្មោះ សែម សុភី ភេទប្រុស អាយុ៥០ឆ្នាំ ជនជាតិខ្មែរ ទី២-ឈ្មោះ ម៉ៅ នី ភេទស្រី អាយុ៤២ឆ្នាំ ជនជាតិខ្មែរ។ អ្នកទាំង០២ រស់នៅភូមិប្រយុគ ឃុំទំនប់ ស្រុកបាធាយ ខេត្តកំពង់ចាម។ ដកហូតវត្ថុតាងមួយចំនួនរួមមាន៖ ហាន់តោអាប៉ោងចំនួន១ ចានអាប៉ោងចំនួន១ ផ្តិលជ័រគ្របអាប៉ោងចំនួន១ ប្រាក់ចំនួន៥៣ម៉ឺនរៀល កាបូបស្ពាយពណ៌សូកូឡាចំនួន១ ទូរស័ព្ទចំនួន២គ្រឿង ជញ្ជីងអេឡិចត្រូនិចចំនួន១ ស៊ុំក្រុងមាន់ចំនួន១៨ មាន់ជល់ចំនួន១៧ក្បាល កញ្ចក់សម្រាប់បាំងមាន់ជល់ចំនួន១ ម៉ូតូចំនួន១៣គ្រឿង កៅអីជ័រចំនួន៥ តុសម្រាប់លេងអាប៉ោងចំនួន១ ស្កុតរំខ្នាយមាន់ចំនួន២ដុំ។
បច្ចុប្បន្នជនសង្ស័យ រួមនឹងវត្ថុតាង ត្រូវបានបញ្ជូនមកកាន់ស្នងការដ្ឋាននគរបាលខេត្តកំពង់ចាម ដើម្បីសាកសួរ និងកសាងសំណុំរឿងតាមនីតិវិធី តាមបញ្ជារបស់លោក សុធា ពិសិដ្ឋ ព្រះរាជអាជ្ញារង នៃអយ្យការអមសាលាដំបូងខេត្តកំពង់ចាម៕ដោយ៖កូឡាប