ថៃ៖ នារីម្នាក់ដែលមានគណនីហ្វេសប៊ុកឈ្មោះ Pi’ploy Wanrada បាននិយាយរៀបរាប់ឲ្យដឹងថា ខណៈខ្ញុំកំពុងធ្វើដំណើរទៅកាន់ផ្ទះ ខ្ញុំបានឃើញមនុស្សម្នា ចោមរោមក្មេងសិស្សសាលាម្នាក់នៅលើស្ពាន ហើយខ្ញុំក៏មិនប្រាកដថាតើក្មេងប្រុសនោះដេកលក់ ឬ អត់នោះទេ។
ប៉ុន្តែ សារមួយនៅលើក្រដាសស១សន្លឹកបានសរសេរថា៖ ពុកម៉ែបងប្អូនទាំងអស់គ្នា មេត្តាដាក់ទានដល់ខ្ញុំផង ដើម្បីខ្ញុំអាចទៅសាលាបានរៀនសូត្រនឹងគេ និងអាចទិញសម្ភារសិក្សា និងព្រមទាំងបង់ថ្លៃសិក្សាផងដែរ ។ ឃើញបែបនេះ ខ្ញុំមិនអាចនិយាយអ្វីបានទេ អាណិតពេក ក៏ជួយឧបត្ថម្ភបន្តិច។ សូមអ្នកទាំងអស់គ្នាដែលបានឆ្លងកាត់ទីនេះ មេត្តាដាក់ទានតិចក្តី ច្រើនក្តី ល្មមនឹងជួយក្មេងប្រុសម្នាក់នេះបានបន្តការសិក្សាដូចបំណង ។
ក្រោយការបង្ហោះនេះ គេសង្កេតឃើញថា មានមនុស្សជាច្រើនបង្ហាញក្ដីអាណិត និងចង់ជួយដល់ក្មេងប្រុសម្នាក់នេះ។ អ្នកខ្លះបានលើកឡើងថា ក្រោមមេឃដីតែមួយ តែជីវិតមនុស្ស មានវាសនាខុសគ្នា។ ក្មេងមួយចំនួនមានលទ្ធភាពរៀនសូត្រប៉ុន្តែ មិនគិតខំប្រឹងប្រែងរៀនទេ ដោយនាំគ្នាដើរផ្លូវខុស បោះបង់ចោលការសិក្សា ដោយពុំគិតពីកម្លាំងញើសឈាម ទឹកចិត្តឪពុកម្តាយសោះឡើយ។
ទោះយ៉ាងណា ក៏មានមតិមួយចំនួនទៀត បានដាស់តឿនថា វាអាចជាករណីឆបោកក៏ថាបាន ព្រោះថា កន្លងៗមក គេបានកត់សម្គាល់ឃើញមានខ្លះឪពុកម្ដាយ ឬជនខិលខូចបានកេងចំណេញពលកម្មក្មេង ដោយបង្ខំឲ្យពួកគេធ្វើបែបនេះ ដើម្បីទាក់ទាញទឹកចិត្តសប្បុរសជនដាក់ទាន ហើយចុងក្រោយ បានប្រមូលលុយពីរូបភាពផ្តេកផ្តួលនេះ យកទៅធ្វើរឿងផ្សេងៗ៕
ប្រែសម្រួល៖ លឹម ហុង (ប្រភព៖ today.line.me/ Facebook user: Pi’ploy Wanrada)