អូស្ត្រាលីបានស្នើដល់ប្រទេសជាសមាជិក G20 ទាំងអស់បញ្ឈប់កុំឲ្យមានទីផ្សារសត្វព្រៃសើមទៅទៀត ដោយមានការព្រួយបារម្ភថាទីផ្សារសើមទាំងនោះ ផ្តល់ការគំរាមកំហែងដល់សុខភាពមនុស្ស និងទីផ្សារកសិកម្ម។ អូស្ត្រាលីក៏ធ្លាប់ស្នើឲ្យមានការស៊ើបអង្កេត ជាអន្តរជាតិលើបញ្ហាផ្ទុះវីរុសកូរ៉ូណាផងដែរ។
វីរុសកូរ៉ូណាដែលផ្ទុះចេញពីប្រទេសចិន ត្រូវបានគេគិតថាចាប់ផ្តើមចេញពីទីផ្សារសើមនៅក្នុងទីក្រុងវូហាន។ ទីផ្សារសើមជាកន្លែងលក់ដូរសត្វរស់ និងសាច់ស្រស់ ដែលពេលខ្លះ សត្វរស់ត្រូវបានគេសម្លាប់ភ្លាមៗពេលមានការបញ្ជាទិញ
ទីផ្សារសើមគឺជាផ្នែកមួយដ៏សំខាន់ នៃជីវិតប្រចាំថ្ងៃនៅក្នុងប្រទេសចិន ទោះបីក្នុងទីផ្សារនោះ មិនមានការលក់ដូរសត្វព្រៃទាំងអស់ក្តី។
ចិនបានដាកបំរាមបណ្តោះអាសន្ន លើការលក់សត្វព្រៃកាលពីថ្ងៃទី ២៣ខែមករា ក្រោយពេលវីរុសមានការផ្ទុះ និងរីករាលដាលខ្លាំង។ បច្ចុប្បន្ន ចិនកំពុងពិនិត្យមើលវិញ នូវច្បាប់របស់ខ្លួន ដើម្បីរឹតបន្តឹងការជួយដូរសត្វព្រៃលក្ខណៈពាណិជ្ជកម្ម លើមូលដ្ឋានអចិន្ត្រៃយ៍។
រដ្ឋមន្ត្រីក្រសួងកសិកម្មអូស្ត្រាលី លោក David Littleproud បានថ្លែងនៅថ្ងៃព្រហស្បតិ៍នេះថា លោកបានស្នើឲ្យមន្ត្រីរដ្ឋាភិបាលទាំងអស់ មកពីប្រទេសសមាជិក G20 អោយគាំទ្រគម្រោងនោះដើម្បីបញ្ចប់ទីផ្សារសើម។
លោកថ្លែងថា “វាមានហានិភ័យខ្លាំងជាមួយនឹងទីផ្សារសើម ហើយវាអាចបង្កជាបញ្ហាធំ ដល់ឧស្សាហ៍កម្មកសិកម្មរបស់យើង ព្រោះវាអាចប៉ះពាល់ដល់សុខភាពសាធរណៈ”។
មន្ត្រីអាមេរិច ក៏បានស្នើឲ្យមានការបិទទីផ្សារសើម ទូទាំងអាស៊ីផងដែរ។
នាយករដ្ឋមន្ត្រីអូស្ត្រាលី លោក Scott Morrison បាននិយាយនៅថ្ងៃពុធម្សិលមិញថា លោកបានលើកឡើងពីបញ្ហាស៊ើបអង្កេត ក្នុងជំនួបតាមទូរស័ព្ទ ជាមួយនឹងលោកប្រធានាធិបតី ដូណាល់ ត្រាំ និងមេដឹកនាំមហាអំណាចដទៃ។
ចំណែកបារាំង និងអង់គ្លេស បាននិយាយថា ឥឡូវនេះជាពេលដែលប្រយុទ្ធប្រឆាំងនឹងវីរុស មិនមែនជាពេលដែលត្រូវស្តីបន្ទោសឡើយ។
សូមបញ្ជាក់ថា វីរុសកូរ៉ូណា ឬ COVID-19 បានផ្ទុះឡើងដំបូងកាលពីចុងឆ្នាំ ២០១៩ នៅក្នុងប្រទេសចិន និងបានផ្ទុះរាលដាលជុំវិញពិភពលោក។ រហូតមកដល់ពេលនេះ វីរុសមរណៈនេះ បានផ្តាច់ជីវិតមនុស្សជាង ១៨០.០០០នាក់ និងឆ្លងទៅកាន់មនុស្ស ជាង ២.៦០០.០០០នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia