ភ្នំពេញ៖ គម្រោងការពារទឹកជំនន់ ដែលជាហិរញ្ញប្បទានឥតសំណង របស់ជប៉ុននៅតំបន់វត្តភ្នំ និងទួលគោគ ឥឡូវនេះកំពុងដំណើរការហើយ។ គម្រោងនេះ កំពុងបង្កផលវិបាក ដល់ប្រជាពលរដ្ឋដោយសារតែការបិទផ្លូវ។ នេះបើតាមការផ្សព្វផ្សាយព័ត៌មាន របស់ស្ថានទូតជប៉ុនប្រចាំកម្ពុជា នៅព្រឹកថ្ងៃទី២៣ ខែមេសា ឆ្នាំ២០២០។
ស្ថានទូតជប៉ុនប្រចាំកម្ពុជា បានឲ្យដឹងថា ដូច្នេះហើយក្រុមការងាររបស់យើង បានពន្យល់អំពីការងារ និងកាលវិភាគទៅប្រជាពលរដ្ឋ ក្នុងកិច្ចប្រជុំដែលបានធ្វើឡើងជាបន្តបន្ទាប់។ យើងក៏បានសម្របសម្រួល ជាមួយប៉ូលិសចរាចរណ៍ ដើម្បីកាត់បន្ថយការកកស្ទះចរាចរណ៍ផងដែរ។
ស្ថានទូតជប៉ុន សូមថ្លែងអំណរគុណ ដល់ប្រជាជននៅរាជធានីភ្នំពេញ ចំពោះការយោគយល់ និងក្រុមការងារកម្ពុជា-ជប៉ុនទាំងអស់ ដែលបានខិតខំធ្វើការក្រោមកម្តៅថ្ងៃ។ តួលេខភ្ជាប់បង្ហាញពីលទ្ធផល និងផែនការការងារក្នុងខែនេះ។
ឯកឧត្តមឯកអគ្គរាជទូត មិកាមិ បានមានប្រសាសន៍ អំពីគម្រោងការពារទឹកជំនន់ នៅរាជធានីភ្នំពេញដែលកំពុងដំណើរការ និងស្នើសូមលោក លោកស្រី បន្តយោគយល់ និងគាំទ្រចំពោះគម្រោងនេះ។
ឯកឧត្តមឯកអគ្គរាជទូត បានប្រសាសន៍ថា រដូវភ្លៀងបានមកដល់ហើយ ក្នុងការការពារទឹកជំនន់ ក្នុងរាជធានីភ្នំពេញ ដំណើរការ នៅតំបន់វត្តភ្នំ និងទួលគោក ហើយបញ្ចប់ក្នុងឆ្នាំ២០២១ ។ នៅវត្តភ្នំកំពុងជីកដាក់បំពង់លូជម្រៅ៧ម៉ែត្រក្រោមដី ។ ចំណែកនៅខាងមាត់ទន្លេវិញ កំពុងសាងសង់ អាងស្តុកទឹកភ្លៀង ៦.៥០០ម៉ែត្រគូប ។ នៅខែវស្សា ទឹកភ្លៀង នឹងហូរតាមបំពង់លូ ហើយចូលទៅក្នុងអាង និងបន្ទាប់មក នឹងហូរទៅទន្លេ។ ក្នុងពេលដែលដំណើរការសាងសង់ មានការបិទច្រកចូលផ្លូវ ។ សូមលោកលោកស្រីបន្ត យោគយល់និងគាំទ្រ ចំពោះគម្រោងនេះ ៕ ដោយ៖កូឡាប
