ភ្នំពេញ៖ នៅព្រឹកថ្ងៃព្រហស្បតិ៍ ទី២៣ ខែមេសា ឆ្នាំ២០២០ ឯកឧត្តម ឧត្តមសេនីយ៍ឯក ស ថេត អគ្គស្នងការរង និងជា ស្នងការនគរបាលរាជធានីភ្នំពេញ បានអញ្ជើញដឹកនាំកិច្ចប្រជុំប្រចាំខែមេសា និងទិសដៅការងារ ខែឧសភា ឆ្នាំ២០២០ ស្តីពី ការត្រួតពិនិត្យការងារ សន្តិសុខ សណ្តាប់ធ្នាប់សាធារណៈ ដោយមានការចូលរួមពីលោក លោកស្រីស្នងការរង លោកអធិការខណ្ឌទាំង១៤ ព្រមទាំងមន្ត្រីពាក់ព័ន្ធមួយចំនួនទៀត ។
ក្នុងឱកាសនោះដែរ ក៏មានការចូលរួមមតិពីលោក លោកស្រីស្នងការរង លោកអធិការទាំង១៤ ដោយបានចូលរួមរាយការណ៍ដល់អង្គប្រជុំ ក៏ដូចជាលទ្ធផលការងារដែលបានធ្វើ បញ្ហាប្រឈម ដំណោះស្រាយ និងផែនការដើម្បីអនុវត្តបន្តឲ្យកាន់តែមានប្រសិទ្ធភាពខ្ពស់ថែមទៀត ។
ជាកិច្ចបញ្ចប់ ឯកឧត្តមស្នងការក៏បានសរសើរ ដល់កងកម្លាំងទាំងអស់ ដែលបានប្រឹងប្រែងក្នុងការផ្តល់សេវាសាធារណៈ និងធានាសុខសុវត្ថិភាពជូនប្រជាពលរដ្ឋ ជាពិសេសឯកឧត្តមស្នងការ បានផ្តល់មតិណែនាំល្អៗជាច្រើនដល់អង្គប្រជុំ ដូចជាការយកចិត្តទុកដាក់ខ្ពស់ ក្នុងការផ្តល់សេវាសាធារណៈជូនប្រជាពលរដ្ឋ ការចុះដោះស្រាយ និងអន្តរាគមន៍ជូនប្រជាពលរដ្ឋបានយ៉ាងឆាប់រហ័ស ម្យ៉ាងវិញទៀតត្រូវតែផ្តោតសំខាន់លើផែនការនៃការរៀបចំកម្លាំងល្បាត ២៤ម៉ោងលើ២៤ម៉ោង ក៏ដូចជាការចុះស្រាវជ្រាវ បង្ក្រាបជាប្រចាំលើករណីជួញដូរ និងប្រើប្រាស់គ្រឿងញៀន ដើម្បីកាត់បន្ថយបទល្មើសនានាក្នុងមូលដ្ឋានរាជធានីភ្នំពេញ ។
ឯកឧត្តមស្នងការ បានណែនាំដល់អង្គភាពទាំងអស់ ចំណុះស្នងការដ្ឋាន ត្រូវយកចិត្តទុកដាក់ក្នុងថែទាំសុខភាព ដើម្បីចូលរួមបង្ការ និងទប់ស្កាត់ការឆ្លងរាលដាលវីរុសកូវីដ១៩ ជាពិសេសត្រូវគោរពបទបញ្ជាកងកម្លាំង ស្លៀកពាក់ឲ្យបានសមរម្យ និងកាត់សក់ខ្លីជាប្រចាំ ៕ដោយ៖កូឡាប
