ភ្នំពេញ៖ ក្រុមហ៊ុន ZHENGHAINA INDUSTRY CO,. LTD. មកពីប្រទេសចិន ជាក្រុមហ៊ុនវិនិយោគផ្នែកអនាម័យ និងបរិស្ថាននៅកម្ពុជា បានកំពុងសិក្សាពីបរិស្ថាន និងសំរាម ហើយនឹងចាប់ផ្តើមវិនិយោគនៅខេត្តបាត់ដំបង លើការប្រមូលសំរាម និងកែច្នៃបំលែងសំរាម ទៅជាថាមពលអគ្គិសនី។
គម្រោងសិក្សាពីសំរាមនៅខេត្តបាត់ដំបងនេះ ត្រូវបានលោក ម៉ម ដារ៉េត តំណាងក្រុមហ៊ុន ZHENGHAINA INDUSTRY CO, LTD. ប្រកាសឱ្យដឹងក្នុងពិធីប្រគល់សម្ភារ និងបរិក្ខាប្រឆាំងនិងការពារជំងឺកូវីដ១៩ ដល់ឯកឧត្តម សន្តិបណ្ឌិត សុខ ផល រដ្ឋលេខាធិការក្រសួងមហាផ្ទៃ។
បើតាមលោក ម៉ម ដារ៉េត បានឲ្យដឹងថា ក្រុមហ៊ុន ZHENGHAINA INDUSTRY បានចុះធ្វើការសិក្សាតាមបណ្តាក្រុង ស្រុក ចំនួន ១២ នៅខេត្តបាត់ដំបង អំពីការយល់ដឹងរបស់ប្រជាជន អំពីការទុកដាក់សំរាមនៅតាមទីប្រជុំជន និងការកែច្នៃសំរាមនេះ។
ក្រុរុមហ៊ុន ZHENGHAINA INDUSTRY CO, LTD ដែលវិនិយោគផ្នែកអនាម័យ និងបរិស្ថានរបស់ប្រទេសចិនមួយនេះ កំពុងស្ថិតក្នុងដំណើរការនៃការវិនិយោគនៅប្រទេសកម្ពុជា ជាមួយនឹងគម្រោងវិនិយោគដំណាក់កាលដំបូង ក្នុងទឹកប្រាក់ ៤០លានដុល្លារ នៃគម្រោងវិនិយោគទាំងមូល ដែលមានទឹកប្រាក់៤០០លានដុល្លារ។
ការប្រមូលសំរាមនៅខេត្តបាត់ដំបង បច្ចុប្បន្ន មានក្រុមហ៊ុនមួយ ប៉ុន្តែក្រុមហ៊នេះ មិនមែនជាក្រុមហ៊ុនកែច្នៃសំរាមទេ គឺជាក្រុមហ៊ុនដែលប្រមូលសំរាមដឹកយកមកចាក់នៅទីលានចាក់សំរាម រួចក៏ធ្វើការដុតកម្ទេចចោល ដែលធ្វើឱ្យមានផ្សែងបក់ចូលមកក្រុងបាត់ដំបង និងធ្វើឱ្យមានការរិះគន់ពីប្រជាពលរដ្ឋផងដែរ។
សូមបញ្ជាក់ថា គម្រោងនេះ ត្រូវបានក្រុមហ៊ុន ZHENGHAINA INDUSTRY CO, LTD. ជួបពិភាក្សាជាមួយ អភិបាលខេត្តបាត់ដំបង រួចម្តងហើយ កាលពីឆ្នាំ២០១៩ ដោយមានការគាំទ្រចំពោះការចុះសិក្សានេះ៕ដោយ៖សម្ផស្ស
