ភ្នំពេញ៖ ស្ថានទូតកម្ពុជាប្រចាំប្រទេសថៃ បានចេញអំពាវនាវដល់ប្រជាពលរដ្ឋខ្មែរទាំងអស់ នៅក្នុងប្រទេសថៃ មេត្តាបន្តចូលរួមសហការអនុវត្តវិធានការនានា និងបម្រាមគោចរដែលដាក់ចេញដោយរាជរដ្ឋាភិបាលថៃ។
ស្ថានទូតកម្ពុជាប្រចាំប្រទេសថៃ នៅថ្ងៃទី២៣ ខែមេសា ឆ្នាំ២០២០នេះ បានជូនដំណឹងការអនុគ្រោះបន្តការស្នាក់នៅ និងធ្វើការជាបណ្តោះអាសន្ន សម្រាប់ប្រជាពលរដ្ឋខ្មែរ និងពលរដ្ឋខ្មែរ ដែលកំពុងស្នាក់នៅ សិក្សា និងធ្វើការនៅក្នុងប្រទេសថៃ ក្នុងស្ថានភាពនៃជំងឺកូវីដ១៩ ដែលអស់សុពលភាពស្នាក់នៅ ចាប់ពីថ្ងៃទី២៦ ខែមីនា ឆ្នាំ២០២០ ត្រូវបានអនុញ្ញាតឱ្យបន្តស្នាក់នៅដោយស្វ័យប្រវត្តិ រហូតដល់ថ្ងៃទី៣១ ខែកក្កដា ឆ្នាំ២០២០ ដោយពុំមានការផាកពិន័យលើការស្នាក់នៅលើសកំណត់ (Over Stay)។
បើតាមសេចក្តីជូនដំណឹងរបស់ស្ថានទូតកម្ពុជាប្រចាំប្រទេសថៃ បានជម្រាប់ជូនដល់បងប្អូនប្រជាពលរដ្ឋខ្មែរទាំងអស់ ដែលកំពុងស្នាក់នៅ សិក្សា និងធ្វើការនៅក្នុងប្រទេសថៃ មេត្តាជ្រាបថា ដើម្បីសម្រួលដល់បងប្អូនប្រជាពលរដ្ឋខ្មែរ ដែលជាប់នៅក្នុងប្រទេសថៃ ដោយសារការរឹតត្បិតនៃការធ្វើឱ្យដំណើរផ្លូវគោក ផ្លូវទឹក និងផ្លូវអាកាស ក្នុងការទប់ស្កាត់ការរីករាលដាល នៃជំងឺកូវីដ១៩ រាជរដ្ឋាភិបាលថៃ បានសម្រេចផ្តល់អនុគ្រោះ ដល់បងប្អូន ដូចខាងក្រោម៖
១) ប្រជាពលរដ្ឋខ្មែរ រួមទាំងពលករ ដែលអស់សុពលភាពស្នាក់នៅចាប់ពីថ្ងៃទី២៦ ខែមីនា ឆ្នាំ២០២០ ត្រូវបានអនុញ្ញាតឱ្យបន្តស្នាក់នៅ ដោយស្វ័យប្រវត្តិ រហូតដល់ថ្ងៃទី៣១ ខែកក្កដា ឆ្នាំ២០២០ ដោយពុំមានការផាកពិន័យ លើការស្នាក់នៅលើសកំណត់ (Over Stay) ប៉ុន្តែមិនអនុញ្ញាតឱ្យធ្វើការនោះទេ។
២) ពលករខ្មែរ ដែលនិយោជកបានបញ្ជូនបញ្ជីឈ្មោះ ទៅក្រសួង ឬមន្ទីរការងារក្រុង/ខេត្តរបស់ថៃ តាមរយៈប្រព័ន្ធអនឡាញរួចរាល់ត្រឹមថ្ងៃទី៣១ ខែមីនា ឆ្នាំ២០២០ អាចបន្តធ្វើការជាបណ្ដោះអាសន្ន រហូតដល់ថ្ងៃទី៣០ ខែវិច្ឆិកា ២០២០។
៣) បងប្អូនប្រជាពលរដ្ឋខ្មែរ រួមទាំងពលករ ដែលត្រូវទៅបង្ហាញខ្លួនក្នុងរយៈពេល ៩០ថ្ងៃ ក្នុងចន្លោះថ្ងៃទី២៦ ខែមីនា ឆ្នាំ២០២០ ដល់៣១ ខែកក្កដា ឆ្នាំ២០២០ មិនត្រូវទៅបង្ហាញខ្លួននោះទេ រហូតដល់មានការជូនដំណឹងជាថ្មីឡើងវិញ។
ស្ថានទូតសូមអំពាវនាវដល់ប្រជាពលរដ្ឋខ្មែរទាំងអស់ នៅក្នុងប្រទេសថៃ មេត្តាបន្តចូលរួមសហការអនុវត្តវិធានការនានា និងបម្រាមគោចរដែលដាក់ចេញដោយរាជរដ្ឋាភិបាលថៃ ឱ្យមានប្រសិទ្ធភាព និងសូមរក្សាសុខភាពអនាម័យ ដើម្បីបង្ការ និងទប់ស្កាត់ការវឹករាលដាលនៃជំងឺកូវ័យ១៩៕ដោយ៖កូឡាប
