ខេត្តប៉ៃលិន ៖ ប្រជាពលរដ្ឋចាស់ជរាគ្មានទីពឹងចំនួន២គ្រួសារបានទទួលអំណោយមនុស្សធម៌ពីសហភាពសហព័ន្ធយុវជនកម្ពុជាខេត្តប៉ៃលិន។
គួរបញ្ជាក់ផងដែរថា ចាស់ជរា ដែលទទួលអំណោយមានលោកយាយ ហុង ឆាម ចាស់ជរាទុរគតជន អាយុ៨៧ឆ្នាំនិងលោកយាយ ទី ភាវ អាយុ ៦៥ឆ្នាំនៅភូមិស្រែអន្ទាក់ (ចំណុចខ្ជាយ) ស្ថិតក្នុងភូមិស្រែអន្ទាក់ ឃុំសាលាក្រៅ ស្រុកសាលាក្រៅ ខេត្តប៉ៃលិន។
ពិធីចែកអំណោយដល់ចាស់ជរាគ្មានទីពឹង២គ្រួសារនេះ បានធ្វើឡើងកាលពីព្រឹកថ្ងៃទី២៣ ខែមេសា ឆ្នាំ២០២០ ស្ថិតក្នុងភូមិស្រែអន្ទាក់ ឃុំស្ទឹងត្រង់ ស្រុកសាលាក្រៅ ខេត្តប៉ៃលិន ក្រោមអធិបតីភាពលោក សៀ សុខុម អនុប្រធានសហភាពសហព័ន្ធយុវជនកម្ពុជាខេត្តប៉ៃលិន ព្រមទាំងមានការចូលរួមពីក្រុមការងារយុវជន ស.ស.យ.ក ខេត្ត ជាច្រើននាក់ ។
លោក សៀ សុខុម អនុប្រធានសហភាពសហព័ន្ធយុវជនកម្ពុជាខេត្ត បានមានប្រសាសន៍ថា សហភាពសហព័ន្ធយុវជនកម្ពុជា ក្រោមការដឹកនាំរបស់ឯកឧត្តម ហ៊ុន មានី ជាប្រធានសហភាពសហព័ន្ធយុវជនកម្ពុជា តែងតែជម្រុញដល់ក្រុមការងារគ្រប់ខេត្តក្រុងទូទាំងប្រទេស ឲ្យយកចិត្តទុកដាក់ ចំពោះប្រជាពលរដ្ឋណា ដែលមានជីវភាពខ្វះខាត ចាស់ជរាគ្មានទីពឹង។ចំពោះខេត្តប៉ៃលិនលោកជំទាវ បាន ស្រីមុំបានរិះរកគ្រប់មធ្យោបាយ ដើម្បីចាត់ក្រុមការងារឲ្យចុះដល់មូលដ្ឋាន សួសុខទុក្ខពួកគាត់ពាក់ព័ន្ធបញ្ហាសុខភាព ស្របពេលដែលកម្ពុជានិងទូទាំងពិភពលោក កំពុងទទួលរងនូវជំងឺដ៏កាចសាហាវគឺកូវីដ១៩។គ្រឿងឧបភោគបរិភោគ ក៏ដូចជាថវិកា ដែលសហភាពសហព័ន្ធយុវជនកម្ពុជាខេត្តប៉ៃលិន បាននាំយកមកឧបត្ថម្ភជូន ចាស់ជរា២គ្រួសារពេលនេះ អាចជួយដោះស្រាយ ក្នុងជីវភាពរស់នៅប្រចាំថ្ងៃ បានមួយគ្រា ដែលជាទឹកចិត្តសប្បុរសធម៌ របស់សហភាពសហព័ន្ធយុវជនកម្ពុជាខេត្តនិងក្រុមការងារយុវជន ក្រោមការចង្អុលបង្ហាញពីឯកឧត្តម ហ៊ុន មានី ជាប្រធានសហភាពសហព័ន្ធយុវជនកម្ពុជា។ ក្រុមការងារ ក៏បានធ្វើការផ្សព្វផ្សាយនិងចែកខិត្តប័ណ្ណ ដែលទទួលបានពីទីស្នាក់ការកណ្ដាលកាកបាទក្រហមកម្ពុជា ស្ដីពីរបៀបលាងសម្អាតដៃ ជាមួយទឹក និងសាប៊ូ ដើម្បីបង្ការ ជំងឺកូវីដ១៩ និង វិធីកាត់បន្ថយហានិភ័យពីការឆ្លង ជំងឺកូវីដ១៩ តាមការណែនាំ របស់ក្រសួងសុខាភិបាល ដល់បងប្អូនប្រជាពលរដ្ឋទាំងអស់គ្នាផងដែរ។ ចំពោះបងប្អូន ដែលមានក្រុមគ្រួសារ ទៅធ្វើការងារនៅក្រៅប្រទេស ពេលត្រឡប់មកវិញ ត្រូវដាក់គាត់នៅដាច់ដោយឡែកចំនួន ១៤ថ្ងៃពីក្រុមគ្រួសារ ប្រសិនជាគ្រូពេទ្យពិនិត្យសុខភាព ពួកគាត់ទៅ មិនមានជំងឺកូវីដ១៩ នោះទេ ទើបអនុញ្ញាតឱ្យពួកគាត់ ទៅជួបជុំគ្រួសារវិញជាធម្មតា ធ្វើដូច្នោះដើម្បីឲ្យពួកគាត់ យល់ដឹងអំពីបញ្ហានៃជំងឺកូវីដ១៩ នឹងបានយល់អំពីការឆ្លងនៃវីរុសកូវីដ១៩ និងរយៈពេលនៃការចេញ រោគសញ្ញា។សូមឲ្យបងប្អូនទាំងអស់គ្នា ក៏ដូចជាក្រុមគ្រួសារ ត្រូវបន្តការថែទាំសុខភាព ហូបស្អាត ផឹកស្អាត និង រស់នៅស្អាតផងដែរ៕
ដោយៈអ៊ុងសារុំ