CAMSOC-ភ្នំពេញ៖ ប្រតិបត្តិករកីឡាបានក្រើនរំលឹកជាថ្មីម្តងទៀត នៅថ្ងៃទី២៣ ខែមេសា ឆ្នាំ២០២០ ចំពោះកម្មវិធីហ្វឹកហាត់នៅតាមផ្ទះរបស់កីឡាករ កីឡាការិនីជម្រើសជាតិកម្ពុជាគ្រប់សហព័ន្ធកីឡាជាតិទាំងអស់ឲ្យពង្រឹងការហ្វឹកហាត់ឲ្យបាន៣ម៉ោង ក្នុង១ថ្ងៃៗ ព្រមទាំងបានបង្ហាញនូវបច្ចុប្បន្នភាពនៃហេដ្ឋារចនាសម្ព័ន្ធកីឡា ក្នុងដំណើរឆ្ពោះទៅទទួលរៀបចំធ្វើជាម្ចាស់ផ្ទះកីឡាស៊ីហ្គេម លើកទី៣២ ឆ្នាំ២០២៣ ដែលជាព្រឹត្តិការណ៍កីឡាប្រវត្តិសាស្ត្រលើកដំបូងរបស់ព្រះរាជាណាចក្រកម្ពុជា។
ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ (SEA Games) លើកទី៣២ ឆ្នាំ២០២៣ ហៅកាត់ គ.ជ.ប.អ (CAMSOC) មានប្រសាសន៍ថា ក្រោយពីការប្រកាសរំសាយការប្រមូលផ្តុំហ្វឹកហាត់ធ្វើឡើងដោយក្រសួងអប់រំ យុវជន និងកីឡា កាលពីខែមីនា ឆ្នាំ២០២០ កីឡាករ កីឡាការិនីជម្រើសជាតិកម្ពុជា ដែលកំពុងសម្រាកសកម្មនោះ កំពុងបន្តការហ្វឹកហាត់នៅតាមផ្ទះដោយខ្លួនឯង តាមកម្មវិធីដែលគ្រូបង្វឹកនៃសហព័ន្ធកីឡាជាតិនានាដាក់ឲ្យ ប៉ុន្តែឯកឧត្តមបានអំពាវនាវឲ្យហ្វឹកហាត់ឲ្យបាន៣ម៉ោង ក្នុងមួយថ្ងៃៗ។
ឯកឧត្តមបានបញ្ជាក់ជូនជាថ្មីទៀតថា នៅក្នុងសកម្មភាពកីឡា គឺមិនអាចសម្រាកអសកម្មបានទេ ដោយមូលហេតុនៃការសម្រាកអសកម្មធ្វើឲ្យប៉ះពាល់ដល់គុណផលកីឡា ប៉ះពាល់ដល់សមត្ថភាពផ្លូវកាយ បច្ចេកទេសរបស់ពួកគាត់ នៅពេលដែលពួកគាត់ចូលមកហ្វឹកហាត់វិញ។ នៅក្នុងកិច្ចប្រជុំ កាលពីម្សិលមិញនេះ ឯកឧត្តមបណ្ឌិត ថោង ខុន អនុប្រធានអចិន្ត្រៃយ៍ CAMSOC បានរំលឹកជាថ្មីឲ្យអត្តពលិកជម្រើសជាតិទាំងអស់ត្រូវតែបង្កើនស្មារតីយកចិត្តទុកដាក់ខ្ពស់ ក្នុងការបន្តការហ្វឹកហាត់ដោយខ្លួនឯងនៅតាមផ្ទះ ព្រោះថាការសម្រាកនេះទទួលរងផលប៉ះពាល់ច្រើនណាស់ ពោលគឺឡើងទម្ងន់ អាចនឹងមានជំងឺ ដោយសារធ្លាប់ហ្វឹកហាត់ខ្លាំង ហើយនៅពេលទំនេរនេះអាចហូបច្រើនពេក ឬហូបប្រៃពេក ផ្អែមពេក ដែលអាចធ្វើឲ្យរងផលប៉ះពាល់ ក្នុងការថែរក្សានិរន្តរភាពនៃបន្សាំគុណភាពកម្លាំងកាយរបស់ពួកគាត់ ដូច្នេះហើយឯកឧត្តមសូមណែនាំបន្ថែមឲ្យកីឡាករ កីឡាការិនី ជាពិសេសគឺគ្រូបង្វឹកលើប្រភេទកីឡាទាំងអស់ត្រូវយកចិត្តទុកដាក់ខ្ពស់ ក្នុងកម្មវិធីហ្វឹកហាត់ឲ្យបានខ្លាំងក្លា ឬយ៉ាងតិចឲ្យបាន៣ម៉ោង ក្នុង១ថ្ងៃៗ។ ដោយសារកម្ពុជាត្រៀមទទួលធ្វើម្ចាស់ផ្ទះ ស៊ីហ្គេម លើកទី៣២ នាឆ្នាំ២០២៣ ដូច្នេះហើយយើងមិនអាចផ្តេកផ្តួល នៅក្នុងស្ថានភាពនេះទេ ដោយពេលនេះគឺយើងត្រូវតែខិតខំប្រែក្លាយនៃការសម្រាកនេះ ទៅជាជំនឿចិត្តលើខ្លួនឯង ដោយហ្វឹកហាត់ឲ្យអស់ពីសមត្ថភាពនៅតាមផ្ទះរៀងៗខ្លួន។
ទាក់ទងនឹងហេដ្ឋារចនាសម្ព័ន្ធ ដែលបម្រើដល់ស៊ីហ្គេម លើកទី៣២ ឆ្នាំ២០២៣ នៅកម្ពុជានោះ ត្រូវបានឯកឧត្តម អគ្គលេខាធិការគូសបញ្ជាក់ថា កាលពីពេលថ្មីនេះ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធាន CAMSOC ក៏ដូចជាឯកឧត្តមបណ្ឌិត ថោង ខុន អនុប្រធានអចិន្ត្រៃយ៍ CAMSOC បានសង្កត់ធ្ងន់លើការរៀបចំហេដ្ឋារចនាសម្ព័ន្ធ ដែលជាតម្រូវការចាំបាច់ត្រៀមស៊ីហ្គេមនោះឲ្យបានចប់សព្វគ្រប់ នៅដំណាច់ឆ្នាំ២០២០នេះ។ ចំពោះការសាងសង់កីឡដ្ឋានធំ (Main Stadium) នៃពហុកីឡដ្ឋានជាតិមរតកតេជោ កំពុងដំណើរការសាងសង់តាមធម្មតា មិនមានការផ្អាកនោះទេ ដោយមានកម្មករខ្មែរ២០០នាក់ និងកម្មករចិន២០០នាក់ដែរ ស្ថិតនៅក្នុងការគ្រប់គ្រងយ៉ាងល្អ មិនអនុញ្ញាតឲ្យចេញចូលនោះទេ។ ពេលនេះ ការសាងសង់កីឡដ្ឋានធំ សម្រេចបានប្រមាណ៨០% ដែលជាកន្លែងប្រារព្ធពិធីបើក-បិទនៃស៊ីហ្គេម ២០២៣ ហើយផ្នែកសំណង់រឹង គឺត្រូវបានធ្វើសម្រេចបាន១០០%ហើយ ដោយនៅសល់តែការបំពាក់ដំបូល កៅអី កញ្ចក់ និងការរៀបចំហេដ្ឋារចនាសម្ព័ន្ធមួយចំនួនទៀត ដែលត្រូវបំពាក់នៅខាងក្រោមអគារនៃកីឡដ្ឋាន ដែលមានផ្សារទំនើប សណ្ឋាគារ សាលហ្វឹកហាត់មួយចំនួនទៀត នៅខាងក្រោមនោះដែរ។ ខាងភាគីចិនបានប្តេជ្ញាថានឹងសាងសង់ឲ្យរួចរាល់ជាស្ថាពរ នាថ្ងៃទី៣១ ខែធ្នូ ឆ្នាំ២០២០នេះ ហើយចាប់ពីឆ្នាំ២០២១តទៅយើងនឹងអាចប្រើប្រាស់នូវពហុកីឡដ្ឋានជាតិមរតកតេជោ សម្រាប់ការហ្វឹកហាត់បន្សាំទៅនឹងទីលានទាំងនោះ។
ហេដ្ឋារចនាសម្ព័ន្ធកីឡាសម្រាប់ស៊ីហ្គេម យើងមិនព្រួយបារម្ភខ្លាំងទេ ប៉ុន្តែអ្វីដែលជាក្តីបារម្ភខ្លាំងនោះ គឺការកសាងសមត្ថភាពកីឡាករ កីឡាការិនីជម្រើសជាតិកម្ពុជា។ ក្រោមការចង្អុលបង្ហាញរបស់សម្តេចពិជ័យសេនា ទៀ បាញ់ ប្រធាន CAMSOC ឲ្យប្រតិបត្តិករកីឡាសម្រួចគោលដៅលើផ្នែកបច្ចេកទេសកីឡារបស់អត្តពលិក ហើយនៅដើមឆ្នាំ២០២០នេះ ប្រសិនបើគ្មានជំងឺកូវីដ-១៩ កម្ពុជាបានបញ្ជូនអត្តពលិក១១០នាក់គ្រប់ប្រភេទកីឡាទាំងអស់ទៅហ្វឹកហាត់នៅប្រទេសចិនរួចហើយ។ ប៉ុន្តែឥឡូវនេះមានភាពប្រែប្រួលថ្មីៗ ដែលកម្ពុជាគ្រោងនឹងត្រូវបញ្ជូនអត្តពលិក១១០នាក់ទៅហ្វឹកហាត់ នៅប្រទេសចិនដដែល នាខែវិច្ឆិកា ឆ្នាំ២០២០ ប្រសិនបើ ២ឬ៣ខែឆាប់ៗនេះ មានលក្ខណៈល្អប្រសើរ ហើយត្រូវតែអនុវត្តវិធានការសុខាភិបាល១៤ថ្ងៃនៅកម្ពុជា និងបន្ត១៤ថ្ងៃនៅចិនទៀត។
ប្រសិនបើមិនអាចបញ្ជូនក្នុងខែវិច្ឆិកា ២០២០ គឺនឹងត្រូវបញ្ជូនទៅនាខែមីនា ឆ្នាំ២០២១ ដើម្បីគោលដៅដណ្តើមនូវមេដាយឲ្យបានច្រើននៅស៊ីហ្គេម លើកទី៣១ ឆ្នាំ២០២១ នៅប្រទេសវៀតណាម ដើម្បីជាសញ្ញាណល្អមួយ ឬជោគជ័យមួយជំហានទៀត ក្នុងដំណើរឆ្ពោះទៅស៊ីហ្គេម ២០២៣ នៅកម្ពុជា។ នេះជាការលើកឡើងបន្ថែមរបស់ឯកឧត្តម វ៉ាត់ ចំរើន៕
ដោយ៖កូឡាប