ភ្នំពេញ៖ ឯកឧត្តមឃួង ស្រេង អភិបាលរាជធានីភ្នំពេញ បានជំរុញឲ្យមន្ទីរជំនាញ និងអាជ្ញាធរមូលដ្ឋានសហការគ្នាពន្លឿន ការអភិវឌ្ឍប្រព័ន្ធប្រឡាយលូ នៅតំបន់ខាងកើត និងខាងត្បូងព្រលាន យន្តហោះអន្តរជាតិភ្នំពេញ ឲ្យហើយតាមផែនការដែលបានគ្រោងទុក នៅក្នុងរដូវវស្សានេះ ដើម្បីបញ្ជៀសការជន់លិចដោយជំនន់ទឹកភ្លៀង។
នារសៀលថ្ងៃព្រហស្បតិ៍ ទី២៣ ខែមេសា ឆ្នាំ២០២០នេះ រដ្ឋបាលរាជធានីភ្នំពេញ បានបើកកិច្ចប្រជុំស្ដីពីការត្រួតពិនិត្យវឌ្ឍនភាពការងារ ស្ដារប្រឡាយដើមស្លែង តភ្ជាប់មកប្រឡាយស្ទឹងមានជ័យ ក្នុងខណ្ឌពោធិ៍សែនជ័យ ខណ្ឌសែនសុខ និងខណ្ឌមានជ័យ រាជធានីភ្នំពេញ។
បើតាមឯកឧត្ដម ឃួង ស្រេង៖ ដើម្បីរកដំណោះស្រាយ នឹងរំដោះទឹកចេញពីតំបន់មុខ និងក្រោយព្រលានយន្តហោះអន្តរជាតិភ្នំពេញ ដែលតែងតែរងការជន់លិចក្នុងរដូវវស្សា ដែលហូរមកប្រឡាយស្ទឹងមានជ័យ ដែលរដ្ឋបាលរាជធានីភ្នំពេញ កំពុងតែស្ថាបនាជាប្រឡាយបេតុង និងមានផ្លូវអាចធ្វើដំណើរឆ្លងកាត់បាន ដោយស្ថាបនាបាន៧០ភាគរយនៃគម្រោងទាំងមូល។
ឯកឧត្តម ឃួង ស្រេង អភិបាលរាជធានីភ្នំពេញបានថ្លែងថា ប្រព័ន្ធប្រឡាយទាំងនេះមានតួនាទីសំខាន់ណាស់ ដើម្បីរំដោះការជន់លិចដោយជំនន់ទឹកភ្លៀង ដូច្នេះមន្ត្រីជំនាញត្រូវសហការគ្នាធ្វើឲ្យបានល្អ ពិសេសការត្រួតពិនិត្យលើក្រុមហ៊ុនស្ថាបនា ដើម្បីឲ្យការសាងសង់ធានាបានគុណភាពស្តង់ដារ កាត់បន្ថយ ការជន់លិចធានាបានប្រសិទ្ធភាព។
ឯកឧត្តមអភិបាលរាជធានីភ្នំពេញ បានបញ្ជាក់ថា ចំពោះគម្រោងស្ថាបនាប្រព័ន្ធប្រឡាយ លូនៅតំបន់ស្ពានស្ទឹងមានជ័យត្រូវធ្វើឲ្យរួចរាល់ ក្នុងរយៈពេល២ខែទៀត ដើម្បីផ្តល់លទ្ធភាពដល់ ប្រជាពលរដ្ឋសហគមន៍ស្ទឹងមានជ័យ ដែលកំពុងរស់នៅក្រោយស្ពានស្ទឹងមានជ័យ អាចរើទៅ រស់នៅទីតាំងដែលអាជ្ញាធររៀបចំ ជូននៅក្បែរប្រព័ន្ធប្រឡាយនោះ។
ឯកឧត្តមបានបញ្ជាក់ថា ការពន្លឿនអភិវឌ្ឍន៍ប្រព័ន្ធប្រលាយ លូនៅតំបន់ខាងកើត និងតំបន់ខាងត្បូងព្រលាន យន្តហោះអន្តរជាតិភ្នំពេញនេះ គឺដើម្បីបញ្ជៀសការជន់លិច ដោយជំនន់ទឹកភ្លៀងនារដូវ វស្សា ដែលសម្រួលដល់ការរស់នៅ និងការធ្វើដំណើររបស់ប្រជាពលរដ្ឋ។
លោកសាំ ពិសិដ្ឋ ប្រធានមន្ទីរសាធារណការនិងដឹកជញ្ជូនរាជធានីភ្នំពេញបានឲ្យដឹងថា គម្រោងស្ថាបនាប្រព័ន្ធប្រឡាយលូ នៅតំបន់ខាងកើត និងតំបន់ខាងត្បូងព្រលាន យន្តហោះអន្តរជាតិភ្នំពេញ មកដល់ពេលនេះ ដោយដំណាក់កាលទី១ ពីស្ពានស្ទឹងមានជ័យដល់ប្រឡាយទឹកដើមស្លែង សម្រេចបានជាង៧៨ភាគរយ ចំណែកតំបន់៤សម្រេចបានជាង៤០ភាគរយ៕ដោយ៖កូឡាប